କେନ୍ଦୁଝର ଜିଲ୍ଲା ଆନନ୍ଦପୁର ବ୍ଲକ୍‌ରେ କପି ଯୋଗାଇବାକୁ ନେଇ ଘଟିଛି ଘମାଘୋଟ ଗୋଷ୍ଠୀ ସଂଘର୍ଷ । ଦଶମ ଶ୍ରେଣୀ ପରୀକ୍ଷାରେ କପି ଦେବାକୁ କେନ୍ଦ୍ର କରି ଦୁଇ ଗାଁ ଯୁବକଙ୍କ ମଧ୍ୟରେ ଗଣ୍ଡଗୋଳ ହୋଇଛି । ଯେଉଁଥିରେ ବରିପାଳ ଗାଁର ଅଭିଷେକ ଦାସ ଗୁରୁତର ଆହତ ହୋଇଥିବାବେଳେ ସୌମ୍ୟରଞ୍ଜନ ଦାସ ଆହତ ହୋଇଛନ୍ତି । ଉଭୟଙ୍କୁ କେନ୍ଦୁଝର ଜିଲ୍ଲା ଆନନ୍ଦପୁର ଉପଖଣ୍ଡ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଅଭିଷେକଙ୍କ ଅବସ୍ଥା ସଙ୍କଟାପନ୍ନ ରହିଛି । ଗଣ୍ଡଗୋଳରେ ତାଙ୍କ ପିଠି ନୋଳା ଫାଟି ଯାଇଥିବା ଦେଖିବାକୁ ମିଳିଛି । ଯାହାର ଭିଡିଓ ମଧ୍ୟ ଭାଇରାଲ ହୋଇଛି ।

ଘସିପୁରା ବ୍ଲକ୍ ଦେଓଗାଁ କୁଶଳେଶ୍ୱର ଉଚ୍ଚ ବିଦ୍ୟାଳୟରେ ଦଶମ ଶ୍ରେଣୀ ବୋର୍ଡ ପରୀକ୍ଷା ଚାଲିଥିଲା । ଏହି ବିଦ୍ୟାଳୟରେ କେଶଦୁରାପାଳ, ବରିପାଳ, ବଳରାମପୁର ଓ ଦେଓଗାଁ ବାଳିକା ଉଚ୍ଚ ବିଦ୍ୟାଳୟର ଛାତ୍ରଛାତ୍ରୀଙ୍କ ପାଇଁ ପରୀକ୍ଷା କେନ୍ଦ୍ର ହୋଇଥିଲା । ସୋମବାର ଦିନ ପରୀକ୍ଷା ଚାଲିଥିବା ସମୟରେ ଝରକା ପାଖରେ ବସିଥିବା ପିଲାଙ୍କୁ ବାହାରୁ କପି ଯୋଗାଇ ଦିଆଯାଇଥିଲା । କିନ୍ତୁ କପି ଯୋଗାଣକୁ କିଛି ଛାତ୍ର ବାରଣ କରିଥିଲେ । ବାହାରେ ଥିବା ଛାତ୍ରଙ୍କ ଅଭିଭାବକମାନେ ମଧ୍ୟ ବିରୋଧ କରିଥିଲେ । ଫଳରେ ସେଠାରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା ।

ଘସିପୁରା ଥାନା ବରିପାଳ ଓ ତରୀମୂଳ ଗାଁ ଯୁବକଙ୍କ ମଧ୍ୟରେ ପ୍ରଥମେ ବଚସା ହୋଇଥିଲା । ବଚସା ଉଗ୍ରରୂପ ନେବାରୁ ହାତାହାତି ଯାଏ କଥା ଯାଇଥିଲା । ଉପସ୍ଥିତ ଅଭିଭାବକମାନେ ଏହାର ସମାଧାନ କରି ପରିସ୍ଥିତିକୁ ଶାନ୍ତ କରିଥିଲେ ।

ପୁଣି ଷେଣ୍ଢେଇ ଛକରେ ଘଟଣାକୁ କେନ୍ଦ୍ର କରି ବରିପାଳର ଦୁଇ ଯୁବକଙ୍କୁ ସଂଘବଦ୍ଧ ଆକ୍ରମଣ ହୋଇଥିଲା । ଆକ୍ରମଣରେ ଅଭିଷେକ ଗୁରୁତର ହୋଇପଡିଥିଲେ । ଏନେଇ ଥାନାରେ ଅଭିଯୋଗ ହେବା ପରେ ପୁଲିସର ତଦନ୍ତ ଆରମ୍ଭ କରିଛି ।

Powered by Froala Editor