ସଂକ୍ରମଣ କମୁଥିବାରୁ ସରକାର କଟକଣା କୋହଳ କରିଛନ୍ତି । ଏହି କ୍ରମରେ ମଙ୍ଗଳବାରଠୁ ୪୩ଟି ରୁଟରେ OSRTC ବସ୍ ଚଳାଚଳ କରିବାକୁ ନିଷ୍ପତ୍ତି ନେଇଛି ରାଜ୍ୟ ସଡ଼କ ଓ ପରିବହନ ନିଗମ । ଏହି ରୁଟ୍ ଗୁଡ଼ିକ ମୁଖ୍ୟତଃ କ୍ୟାଟେଗୋରୀ-ଏରେ ଥିବା ଜିଲ୍ଲାଗୁଡ଼ିକରେ ଅବସ୍ଥିତ । ବସଗୁଡ଼ିକ ଓଏସଆରଟିସିର ୧୬ଟି ଡିପୋରୁ ଚଳାଚଳ କରିବ ବୋଲି ଓଏସଆରଟିସି ପକ୍ଷରୁ ଟ୍ବିଟ କରି ସୂଚନା ଦିଆଯାଇଛି ।

ଏସବୁ ବସଗୁଡ଼ିକରେ କୋଭିଡ ନିୟମକୁ କଡ଼ାକଡ଼ି ପାଳନ କରାଯିବ । ବସ ଗୁଡ଼ିକର କେବଳ ବସିବା କ୍ଷମତା ଅନୁସାରେ ଯାତ୍ରୀମାନଙ୍କୁ ଯାତ୍ରା କରିବାକୁ ଅନୁମତି ଦିଆଯିବ । କୌଣସି ଯାତ୍ରୀଙ୍କୁ ଛିଡ଼ା ହୋଇ ଯାତ୍ରା କରିବାକୁ ଅନୁମତି ଦିଆଯିବ ନାହିଁ । ମାସ୍କ ପିନ୍ଧିନଥିବା ଯାତ୍ରୀମାନଙ୍କୁ ଯାତ୍ରା କରିବାକୁ ଅନୁମତି ଦିଆଯିବ ନାହିଁ । ସେହିପରି ସାମାଜିକ ଦୂରତା ବଜାୟ ରଖିବା ସହ ବସରେ ଭିଡ ନକରିବାକୁ ପରାମର୍ଶ ଦେଇଛନ୍ତି ରାଜ୍ୟ ସଡ଼କ ଓ ପରିବହନ ନିଗର ଅଧ୍ୟକ୍ଷ ଓ ପରିଚାଳନା ନିର୍ଦ୍ଦେଶକ ଦୀପ୍ତେଶ ପଟ୍ଟନାୟକ । ଅନ୍ୟପକ୍ଷରେ କ୍ୟାଟେଗୋରୀ-ବିରେ ଥିବା ଉପକୂଳବର୍ତ୍ତୀ ୧୦ଟି ଜିଲ୍ଲାରେ କରୋନା ସଂକ୍ରମଣ କମୁନଥିବାରୁ ସେଠାରେ ବସ ଚଳାଚଳକୁ ଅନୁମତି ଦିଆଯାଇନାହିଁ । 

ଗତ ଜୁନ ୩୦ ତାରିଖରେ ରାଜ୍ୟ ସରକାର ସଂକ୍ରମଣ କମିଥିବା ୨୦ଟି ଜିଲ୍ଲାରେ କଟକଣାକୁ କୋହଳ କରିଥିଲେ । ଏହା ସହିତ ସେସବୁ ଜିଲ୍ଲାଗୁଡ଼ିରେ ବସ, ଅଟୋ ଓ ଟାକ୍ସି ପରିବହନକୁ ଅନୁମତି ଦେଇଥିଲେ ।

Powered by Froala Editor