ପୁଣି କାର୍ଯ୍ୟକାରୀ ହେବ ସମ୍ବଲପୁର, କେନ୍ଦୁଝର ବାଟାଲିୟନ୍
ପୁଣି ଥରେ ସମ୍ବଲପୁର ଓ କଟକରେ ହେବ ବାଟାଲିୟନ୍ । ଓଡ଼ିଶା ରାଜ୍ୟ ସଶସ୍ତ୍ର ପୁଲିସ୍ ବାହିନୀ ସ୍ପେସାଲ୍ ସିକ୍ୟୁରିଟି (ଓଏସ୍ଏପି-ଏସ୍ଏସ୍) ସମ୍ବଲପୁରଠାରେ ଥିବା ପ୍ରଥମ ବାଟାଲିୟନ୍ ଓ କେନ୍ଦୁଝରଠାରେ ଥିବା ଦ୍ୱିତୀୟ ସ୍ପେସାଲ୍ ସିକ୍ୟୁରିଟି ବାଟାଲିୟନ୍କୁ ଚାରି ବର୍ଷ ତଳେ ସରକାର ଭାଙ୍ଗି ଦେଇଥିଲେ । ଉଭୟ ବାଟାଲିୟନ୍ରେ ଥିବା ସିପାହୀମାନଙ୍କୁ ଜିଲ୍ଲା ପୁଲିସକୁ ବଦଳି କରିଦିଆଯାଇଥିଲା । ତେବେ ପୁଣି ଥରେ ଦୁଇଟି ଯାକ ବାଟାଲିୟନ୍ ଗଢ଼ା ହେବ ବୋଲି ସୂଚନା ମିଳିଛି ।
ରାଜ୍ୟରେ ଆଇନ୍ ଶୃଙ୍ଖଳା, ମାଓ ଦମନ ଆଦି କାର୍ଯ୍ୟରେ ଓଏସ୍ଏପି ବାହିନୀକୁ ସହାୟତା ଦେବା ଲାଗି ରାଜ୍ୟରେ ୪ଟି ସ୍ୱତନ୍ତ୍ର ସିକ୍ୟୁରିଟି(ଏସ୍ଏସ୍)ବାଟାଲିୟନ ଗଠନ ହୋଇଥିଲା । ପ୍ରଥମ ଏସ୍ଏସ୍ ବାଟାଲିୟନ ସମ୍ବଲପୁରରେ ସ୍ଥାପନ କରାଯାଇଥିବା ବେଳେ ଦ୍ୱିତୀୟ ଏସ୍ଏସ୍ ବାଟାଲିୟନ କେନ୍ଦୁଝରରେ, ତୃତୀୟ ବାଟାଲିୟନ ଗଜପତି ଜିଲ୍ଲାରେ ଓ ଚତୁର୍ଥ ବାଟାଲିୟନ ମାଲକାନଗିରିରେ ସ୍ଥାପନ ହୋଇଥିଲା । ଏହି ୪ଟି ଯାକ ବାଟାଲିୟନ୍ରେ ସ୍ୱତନ୍ତ୍ର ଭାବେ ସିପାହୀ ଓ ଅଫିସର ନିଯୁକ୍ତି ଦିଆଯାଇଥିଲା ।
ତେବେ କୋଭିଡ୍ ବେଳେ ଅର୍ଥାତ୍ ୨୦୨୧ରେ ହଠାତ୍ ସମ୍ବଲପୁର ଓ କେନ୍ଦୁଝରଠାରେ ଥିବା ଏସ୍ଏସ୍ ବାଟାଲିୟନ୍କୁ ଭାଙ୍ଗି ଦିଆଗଲା । ସମ୍ବଲପୁରଠାରେ ଥିବା ଏସ୍ଏସ୍ ବାଟାଲିୟନ୍ର ପ୍ରାୟ ୧୫ ପ୍ଲାଟୁନ୍ ଫୋର୍ସ (୬୦୦ ସିପାହୀ), କେନ୍ଦୁଝରଠାରେ ଥିବା ୧୫ ରୁ ଅଧିକ ପ୍ଲାଟୁନ୍ ଫୋର୍ସଙ୍କୁ ରାଜ୍ୟର ବିଭିନ୍ନ ଜିଲ୍ଲା ପୁଲିସ୍କୁ ପଠାଯାଇଥିଲା । ଏହାକୁ ନେଇ ସମ୍ପୃକ୍ତ ଦୁଇ ବାଟାଲିୟନ୍ର ସିପାହୀ, ହାବିଲଦାରଙ୍କ ସ୍ତରରେ ପ୍ରବଳ ଅସନ୍ତୋଷ ପ୍ରକାଶ ପାଇଥିଲା ।
ମାତ୍ର କୋଭିଡ୍ କଟକଣା ଥିବାରୁ ପ୍ରତିବାଦ ପାଇଁ କୌଣସି ସୁଯୋଗ ନଥିଲା । ଫଳରେ ଏକ ହଜାରରୁ ଅଧିକ ସିପାହୀ ଚାକିରି ବଞ୍ଚାଇବାକୁ ବିଭିନ୍ନ ଜିଲ୍ଲା ପୁଲିସ୍ କ୍ୟାଡରରେ ବାଧ୍ୟ ହୋଇ ଯୋଗଦେଇଥିଲେ । ବର୍ତ୍ତମାନ ଆର୍ମଡ୍ ପୁଲିସ୍ ଫୋର୍ସ ବଢ଼ିବା ଆବଶ୍ୟକ ହୋଇପଡ଼ିଛି ବୋଲି ଲ ଆଣ୍ଡ୍ ଅର୍ଡର ଅତିରିକ୍ତ ଡିଜି ସଞ୍ଜୟ କୁମାର କହିଛନ୍ତି । କେନ୍ଦୁଝର ଓ ସମ୍ବଲପୁରଠାରେ ଥିବା ଦୁଇଟି ଯାକ ସିକ୍ୟୁରିଟି ବାଟାଲିୟନ୍ ପୁନର୍ଗଠନ ନେଇ ପ୍ରସ୍ତାବ ସରକାରଙ୍କ ନିକଟରେ ବିଚାରାଧୀନ ରହିଛି ବୋଲି ସେ କହିଛନ୍ତି । ଏହି ନିଷ୍ପତ୍ତି କାର୍ଯ୍ୟକାରୀ ହେଲେ ସିପାହୀଙ୍କ ମଧ୍ୟରେ ଖୁସିର ଲହରୀ ଖେଳିଯିବ ।
Powered by Froala Editor
