ଗଜପତି ମହାରାଜାଙ୍କ ହେଲା ପୁଷ୍ୟାଭିଷେକ ନୀତି
ପୁରୀ : ବୁଧବାର ଶ୍ରୀନଅରରେ ଗଜପତି ମହାରାଜା ଶ୍ରୀ ଦିବ୍ୟସିଂହ ଦେବଙ୍କ ପୁଷ୍ୟାଭିଷେକ ଅନୁଷ୍ଠିତ ହୋଇଛି। ରାଜପୋଷାକରେ ରାଜ ସିଂହାସନ ଆରୋହଣ କରିଛନ୍ତି ଗଜପତି ମହାରାଜ। ପରମ୍ପରା ଅନୁଯାୟୀ, ପଇତାଲାଗି, ଦେବାର୍ଚ୍ଚନ, ମଙ୍ଗଳାର୍ପଣ ଏବଂ ଇଷ୍ଟଦେବୀଙ୍କୁ ପୂଜା ପରେ ପୁଷ୍ୟାଭିଷେକ ନୀତି ହୋଇଥିଲା। ବିଜେ କାହାଳୀ ସମେତ ତେଲିଙ୍ଗି ବାଜା ବାଜିଥିଲା। ରାଜଗୁରୁ ତଥା ରାଜ ପୁରୋହିତ ସହଯୋଗ କରିଥିଲେ। ରାଜଗୁରୁଙ୍କ ଧର୍ମପତ୍ନୀ ବନ୍ଦାପନା କରିଥିଲେ। ରାମାଭିଷେକ ପଟ୍ଟି ପୂଜା କରାଯାଇଥିଲା। ଷୋଳ ଶାସନ ବ୍ରାହ୍ମଣମାନେ ଗଜପତିଙ୍କ ଶ୍ରୀ ମସ୍ତକରେ ଅଭିମନ୍ତ୍ରିତ ଚାଉଳ ପକାଇ ଆଶୀର୍ବାଦ କରିଥିଲେ। ବୈଦିକ ମନ୍ତ୍ରରେ ପ୍ରକମ୍ପିତ ହୋଇଥିଲା ରାଜ ନଅର। ପୌଷ ପୂର୍ଣ୍ଣିମା ତିଥିରେ ମହାପ୍ରଭୁ ଶ୍ରୀଜଗନ୍ନାଥଙ୍କୁ ଶ୍ରୀମନ୍ଦିର ରତ୍ନ ସିଂହାସନରେ ସୋମବାର ରାଜାଧିରାଜ ବେଶ କରାଯାଇଥିଲା। ମହାପ୍ରଭୁଙ୍କୁ ଅଭିଷେକ କରାଯିବା ସହ ଜଳଲାଗି କରାଯାଇଥିଲା। ଏହି ତିଥିରେ ମର୍ୟ୍ୟାଦା ପୁରୁଷୋତ୍ତମ ଶ୍ରୀରାମଙ୍କ ରାଜାଭିଷେକ ହୋଇଥିବା ଉଲ୍ଲେଖ ରହିଛି। ତେଣୁ ପୁଷ୍ୟା ନକ୍ଷତ୍ର ତିଥିରେ ପୁରୀ ଗଜପତି ମହାରାଜା ଶ୍ରୀ ଦିବ୍ୟସିଂହ ଦେବଙ୍କ ପୁଷ୍ୟାଭିଷେକ ନୀତି ଅନୁଷ୍ଠିତ ହୋଇଛି।
Powered by Froala Editor
