ଟିକୁ ତଲସାନିଆଙ୍କୁ ବ୍ରେନ୍ ଷ୍ଟ୍ରୋକ୍
ବଲିଉଡର ଖ୍ୟାତନାମା ଅଭିନେତା ଟିକୁ ତଲସାନିଆଙ୍କୁ ବ୍ରେନ୍ ଷ୍ଟ୍ରୋକ୍ ହେବା ଯୋଗୁ ତାଙ୍କୁ ଡାକ୍ତରଖାନାରେ ଭର୍ତ୍ତତ କରାଯାଇଛି। ଟିକୁ ହୃଦଘାତର ଶିକାର ହୋଇଥିବା ନେଇ ପ୍ରଥମେ ଖବର ମିଳିଥିଲା। ହେଲେ ଏବେ ହୃଦଘାତ ନୁହେଁ ଅଭିନେତା ଟିକୁ ତଲସାନିଆଙ୍କର ବ୍ରେନ ଷ୍ଟ୍ରୋକ୍ ହୋଇଥିବା ସାମ୍ନାକୁ ଆସିଛି। ତାଙ୍କ ପତ୍ନୀ ଦୀପ୍ତି ତଲସାନିଆ ଏହି ଖୁଲାସା କରିଛନ୍ତି।
ଦୀପ୍ତି କହିଛନ୍ତି, ଟିକୁଙ୍କୁ ବ୍ରେନ୍ ଷ୍ଟ୍ରୋକ୍ ହୋଇଛି, ହୃଦଘାତ ନୁହେଁ। ସେ ରାତି ପ୍ରାୟ ୮ଟାରେ ଫିଲ୍ମର ସ୍କ୍ରିନିଂ ପାଇଁ ଯାଇଥିଲେ। ସେଠାରେ ତାଙ୍କୁ ଅସୁସ୍ଥ ଅନୁଭବ ହୋଇଥିଲା। ଏହାପରେ ତାଙ୍କୁ ତୁରନ୍ତ ଡାକ୍ତରଖାନା ନିଆଯାଇଥିଲା। ଏବେ ସେ କୋକିଲାବେନ୍ ଧୀରୁଭାଇ ଅମ୍ବାନୀ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ତାଙ୍କ ଚିକିତ୍ସା ଜାରି ରହିଛି।
ଟିକୁ ତଲସାନିଆ ମନୋରଞ୍ଜନ ଜଗତର ଜଣେ ଲୋକପ୍ରିୟ ଚେହେରା। ଟିକୁ ଏଭଳି ଜଣେ ଅଭିନେତା ଯିଏ ୨୫୦ରୁ ଅଧିକ ଫିଲ୍ମରେ କାମ କରିଛନ୍ତି। ସେ ଅନ୍ଦାଜ୍ ଅପନା ଅପନା, ଇସ୍କ, ଯୋଡ଼ି ନମ୍ବର ୧, ହଙ୍ଗାମା, ସ୍ପେଶାଲ୍ ୨୬, ଧମାଲ ଓ ପାର୍ଟନର ଭଳି କମେଡି ଫିଲ୍ମରେ ତାଙ୍କର ଚମତ୍କାର ଅଭିନୟ ପାଇଁ ଜଣାଶୁଣା। ଏହାଛଡ଼ା ସେ ଅନେକ ଟେଲିଭିଜନ ଶୋ’ରେ ଅଭିନୟ କରିଛନ୍ତି। ବିଶେଷକରି ଜଣେ କମେଡିଆନ ଭାବେ ସେ ଖ୍ୟାତି ଅର୍ଜନ କରିଛନ୍ତି। ଏବେ ତାଙ୍କୁ ନେଇ ଖବର ସାମ୍ନାକୁ ଆସିବା ପରେ ପ୍ରଶଂସକମାନେ ଚିନ୍ତା ବ୍ୟକ୍ତ କରୁଛନ୍ତି।
୧୯୮୪ରେ ଟେଲି ଧାରାବାହିକ ‘ୟେ ହୈ ଜିନ୍ଦେଗୀ’ରୁ ଟିକୁ ନିଜର କ୍ୟାରିୟର ଆରମ୍ଭ କରିଥିଲେ। ପରେ ସେ ୧୯୮୬ରେ ‘ପ୍ୟାର କେ ଦୋ ପଲ’ରୁ ଡେବ୍ୟୁ କରିଥିଲେ। ଶେଷ ଥର ପାଇଁ ସେ ‘ବିକ୍କି ବିଦ୍ୟା କି ବୋ ଓ୍ବାଲା ଭିଡିଓ’ରେ ନଜର ଆସିଥିଲେ।
Powered by Froala Editor
