ଟିକାକରଣ ପ୍ରଚାର କରିବେ ସବୁ ବିଶ୍ୱବିିଦ୍ୟାଳୟ
ଦେଶରେ କରୋନା ବିରୋଧରେ ଲଢେଇ ଜାରି ରହିଛି । ଟିକାକରଣକୁ ଅଧିକ ଗୁରୁତ୍ୱ ଦିଆଯାଉଛି । ହେଲେ ଏବେବିି ବହୁତ ଲୋକ ଅଛନ୍ତି, ଯେଉଁମାନେ ଟିକାକରଣ ବିଷୟରେ ସଚେତନ ନୁହଁନ୍ତି । ଏମାନଙ୍କୁ ସଚେତନ କରାଇବା ଓ ଟିକାର ଗୁରୁତ୍ୱ ବୁଝାଇବାକୁ ଏଣିକି ବିଶ୍ୱବିଦ୍ୟାଳୟ ଦାୟିତ୍ୱ ନେବ । ଟିକାକରଣ ଅଭିଯାନର ପ୍ରଚାର ପ୍ରସାର କରିବେ ସବୁ ବିଶ୍ୱବିଦ୍ୟାଳୟ । ପ୍ରଚାର ଓ ପ୍ରସାର, ବ୍ୟାନର/ହୋର୍ଡିଂ ଲଗାଇବା ପାଇଁ ବିଶ୍ୱବିଦ୍ୟାଳୟ ଅନୁମୋଦନ କମିଶନ(ୟୁଜିସି) ପକ୍ଷରୁ ନିର୍ଦ୍ଦେଶ ଦିଆଯାଇଛି। ତେବେ ୟୁଜିସି ପକ୍ଷରୁ ଗଣମାଧ୍ୟମକୁ ଏ ସମ୍ପର୍କରେ କୌଣସି ପ୍ରକାରର ପ୍ରତିକ୍ରିୟା ଦିଆଯାଇ ନାହିଁ।
ୟୁଜିସି ପକ୍ଷରୁ ଜୁନ୍ ୨୦ରେ ସବୁ ବିଶ୍ୱବିଦ୍ୟାଳୟ ପାଖକୁ ଏପରି ଚିଠି ପଠାଯାଇଛି। ଚିଠିରେ ୟୁଜିସି ସଚିବ ରଜନୀଶ ଜୈନ କହିଛନ୍ତି, ଭାରତ ସରକାର ୧୮ ବର୍ଷ ଓ ତା’ଠାରୁ ଅଧିକ ବୟସ୍କଙ୍କ ପାଇଁ ଆସନ୍ତାକାଲି(ଜୁନ୍ ୨୧) ଠାରୁ ମାଗଣା ଟିକା ଅଭିଯାନ ଆରମ୍ଭ କରୁଛନ୍ତି। ଏହି କାରଣରୁ ସମସ୍ତ କଲେଜ ଓ ବିଶ୍ୱବିଦ୍ୟାଳୟ ସେମାନଙ୍କ ଅନୁଷ୍ଠାନରେ ବ୍ୟାନର ଏବଂ ହୋର୍ଡିଂ ଲଗାନ୍ତୁ।
ୟୁଜିସି କହିଛି, ହିନ୍ଦୀ ଓ ଇଂରାଜୀ ଭାଷାରେ ସବୁ ବିଶ୍ୱବିଦ୍ୟାଳୟ ସରକାରଙ୍କ ପକ୍ଷରୁ ଆରମ୍ଭ ହୋଇଥିବା ଟିକାକରଣ ଅଭିଯାନର ପ୍ରଚାର ପାଇଁ ବ୍ୟାନର/ହୋର୍ଡିଂ ଲଗାଇବେ। ବ୍ୟାନର ଓ ପୋଷ୍ଟର ଡିଜାଇନ ମଧ୍ୟ ୟୁଜିସି ପଠାଇଛି। ସୂଚନା ଓ ପ୍ରସାରଣ ମନ୍ତ୍ରଣାଳୟ ଏହାର ଡିଜାଇନ କରିଛି। ଗୋଟିଏ ଡିଜାଇନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସରକାରଙ୍କ ମାଗଣା ଟିକା ପାଇଁ ଧନ୍ୟବାଦ ଦିଆଯାଇଛି। ଏଥିରେ କୁହାଯାଉଛି “ସମସ୍ତଙ୍କ ପାଇଁ ଟିକା, ମାଗଣାରେ ଟିକା।” ଏଭଳି ଏକ ବ୍ୟାନର ୟୁଜିସି ୱେବସାଇଟରେ ମଧ୍ୟ ରହିଛି। ଏଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଫଟୋ ରହିଛି।
Powered by Froala Editor