ମୁଖ୍ୟମନ୍ତ୍ରୀଙ୍କ ପିଏଙ୍କ ମୃତ୍ୟୁ ମାମଲାରେ କାର୍ ଚାଳକ ଗିରଫ
ଭୁବନେଶ୍ୱର ଡେଲ୍ଟା ଛକ ନିକଟରେ ଦୁର୍ଘଟଣାରେ ମୁଖ୍ୟମନ୍ତ୍ରୀ ମୋହନ ମାଝିଙ୍କ ପିଏ ଚନ୍ଦନ ମହାପାତ୍ର(୩୧)ଙ୍କ ମୃତ୍ୟୁ ମାମଲାରେ ଫେରାର୍ ଥିବା କାର୍ ଚାଳକକୁ ଗିରଫ କରିଛି ପୁଲିସ । ଚନ୍ଦନଙ୍କ ବଡ଼ଭାଇ ରଞ୍ଜନ ମହାପାତ୍ରଙ୍କ ଅଭିଯୋଗ ଆଧାରରେ ନୂଆପଲ୍ଲୀ ଥାନା ପୁଲିସ ଏକ ମାମଲା ରୁଜୁକରି ତଦନ୍ତ ଚଳାଇଥିଲା । ଦୁର୍ଘଟଣା ଘଟାଇ ଫେରାର୍ ଥିବା କାର୍ ଚାଳକଙ୍କୁ ପୁଲିସ ଗିରଫ କରି କୋର୍ଟ ଚାଲାଣ କରିଛି । ତାଙ୍କ ନାମ ସନ୍ତୋଷ କୁମାର ସ୍ୱାଇଁ(୩୨) । ଘର ନୂଆପଲ୍ଲୀ ବଡ଼ସାହିରେ । ଗତ ୧୧ ତାରିଖ ଦିନ ୧୧ଟାରେ ମୁଖ୍ୟମନ୍ତ୍ରୀ ଶ୍ରୀ ମାଝିଙ୍କ ପିଏ ଥିବା ଚନ୍ଦନ ପାତ୍ରପଡ଼ା ବାଇକ୍ ଯୋଗେ ଅଫିସ ଯାଉଥିଲେ । ଡେଲ୍ଟା ଛକ ନିକଟରେ ସନ୍ତୋଷଙ୍କ କାର ତାଙ୍କୁ ଧକ୍କା ଦେଇ ଅନ୍ୟ ଏକ ବାଇକ୍ ଓ କାର୍କୁ ଧକ୍କା ଦେଇଥିଲେ । ଫଳରେ ଦୁଇ କାର୍ ମଝିରେ ଚନ୍ଦନ ବାଇକ୍ ସହ ଚାପି ହୋଇ ଯାଇଥିଲେ । ଘଟଣାସ୍ଥଳରୁ ସନ୍ତୋଷ ଫେରାର୍ ହୋଇ ଯାଇଥିଲେ ।
ସ୍ଥାନୀୟ ଲୋକେ ଗୁରୁତର ଅବସ୍ଥାରେ ଚନ୍ଦନ ଓ ଆହତ ଅନ୍ୟଜଣେ ବାଇକ୍ ଚାଳକକୁ ଉଦ୍ଧାର କରି କ୍ୟାପିଟାଲ ହସ୍ପିଟାଲ ପଠାଇଥିଲେ । ହସ୍ପିଟାଲରେ ଡାକ୍ତର ଚନ୍ଦନଙ୍କୁ ମୃତ ଘୋଷଣା କରିଥିଲେ । ଚନ୍ଦନଙ୍କ ମୃତ୍ୟୁ ଖବରପାଇ ମୁଖ୍ୟମନ୍ତ୍ରୀ ଶ୍ରୀ ମାଝି କ୍ୟାପିଟାଲ ହସ୍ପିଟାଲରେ ପହଞ୍ଚିଥିଲେ ।
Powered by Froala Editor
