କାର୍ତ୍ତିକ ଆର୍ଯ୍ୟନଙ୍କ ବହୁ ପ୍ରତୀକ୍ଷିତ ଫିଲ୍ମ 'ଚନ୍ଦୁ ଚାମ୍ପିଅନ' ଟ୍ରେଲର ରିଲିଜ। ଶନିବାର ଗ୍ୱାଲିୟରରେ ଫିଲ୍ମର ଟ୍ରେଲର ଲଞ୍ଚ ଇଭେଣ୍ଟ ଆୟୋଜିତ ହୋଇଥିଲା । ଏଠାରେ କାର୍ତ୍ତିକଙ୍କ ସହ ଫିଲ୍ମର ନିର୍ଦ୍ଦେଶକ କବୀର ଖାନ ସାମିଲ ହୋଇ ଟ୍ରେଲର ରିଲିଜ କରିଥିଲେ । ନିକଟରେ ଫିଲ୍ମରୁ ତାଙ୍କର ଅନେକ ଲୁକ୍ ମଧ୍ୟ ସାମ୍ନାକୁ ଆସିଥିଲା । ଯାହା ଦେଖିବା ପରେ ଏହି ଫିଲ୍ମକୁ ଦେଖିବା ପାଇଁ ଦର୍ଶକଙ୍କ ଉତ୍ସାହ ବଢିବାକୁ ଲାଗିଛି । ବର୍ତ୍ତମାନ ଫିଲ୍ମର ଟ୍ରେଲର ମଧ୍ୟ ରିଲିଜ ହୋଇଛି, ଯାହା ଆସିବା ମାତ୍ରେ ସୋସିଆଲ ମିଡିଆରେ ହଇଚଇ ସୃଷ୍ଟି କରିଛି । ଟ୍ରେଲରରେ କାର୍ତ୍ତିକଙ୍କୁ ଏକ ଭିନ୍ନ ଅବତାରରେ ଦେଖିବାକୁ ମିଳିଥିବା ବେଳେ ଫିଲ୍ମଟି ଦେଶଭକ୍ତିରେ ଭରପୁର ହୋଇଥିବା ଜଣାପଡିଛି । ତେବେ ଆସନ୍ତା ଜୁନ ୧୪ ତାରିଖରେ ଫିଲ୍ମଟି ରିଲିଜ ହେବ ।

କାର୍ତ୍ତିକ ମୁରଲିକାନ୍ତ ପେଟକରଙ୍କ ଭୂମିକାରେ ଦେଖାଯାଉଛନ୍ତି । ଟ୍ରେଲରରେ ୧୯୬୫ର ଯୁଦ୍ଧର ଝଲକ ମଧ୍ୟ ଦେଖିବାକୁ ମିଳୁଛି । ଟ୍ରେଲର ଆରମ୍ଭରେ କୁହାଯାଇଛି ଯେ ଯୁଦ୍ଧରେ ନଅ ଥର ଗୁଳି ଲାଗିବାରୁ ସେ ଦୁଇ ବର୍ଷ କୋମାରେ ରହିଛିନ୍ତି। ଏହା ପରେ ଚନ୍ଦୁଙ୍କ ଜୀବନର ପୂର୍ବ ଘଟଣାଗୁଡ଼ିକ ଦର୍ଶାଯାଇଛି ।

ପରେ ଆଉ ଏକ ଯୁଦ୍ଧ ସିକ୍ୱେନ୍ସ ଦେଖିବାକୁ ମିଳେ, ଯେଉଁଥିରେ କାର୍ତ୍ତିକ ବନ୍ଧୁକ ଧରି ଲଢୁଥିବାର ଦେଖାଯାଏ । ସେ ଦେଶ ପାଇଁ ପ୍ରଥମ ସ୍ୱର୍ଣ୍ଣ ପଦକ ବିଜେତା ହୋଇ ଇତିହାସ ରଚିଛନ୍ତି । କାର୍ତ୍ତିକ ଏହି ଫିଲ୍ମରେ ନିଜ ଭୂମିକା ପାଇଁ କଠିନ ପରିଶ୍ରମ କରିଛନ୍ତି । ତାଙ୍କର ବଡ଼ି ଟ୍ରାନ୍ସଫରମେସନ୍‌ ଟ୍ରେଲରରେ ଦେଖିବାକୁ ମିଳିଛି । ସେ ଏଥିପାଇଁ ୧୮ କିଲୋଗ୍ରାମ ଓଜନ ହ୍ରାସ କରିଛନ୍ତି । 

ଏହି ଫିଲ୍ମଟି ଭାରତର ପ୍ରଥମ ପାରାଅଲିମ୍ପିକ୍ସ ସ୍ୱର୍ଣ୍ଣ ପଦକ ବିଜେତା ମୁରଲିକାନ୍ତ ପେଟକରଙ୍କ ବାୟୋପିକ୍ ଅଟେ । ମୁରଲିକାନ୍ତ ହେଉଛନ୍ତି ଜଣେ ବ୍ୟକ୍ତି ଯିଏ ଯୁଦ୍ଧରେ ୯ଟି ଗୁଳିରେ ଆହତ ହୋଇଥିଲେ ଏବଂ ଦୁଇ ବର୍ଷ କୋମାରେ ଥିଲେ ମଧ୍ୟ ସେ ହାର ମାନିନଥିଲେ ଏବଂ ପରେ ଦମଦାର ପ୍ରତ୍ୟାବର୍ତ୍ତନ କରି କ୍ରୀଡା କ୍ଷେତ୍ରରେ ଭାରତ ପାଇଁ ପ୍ରଥମ ସ୍ୱର୍ଣ୍ଣ ପଦକ ହାସଲ କରିଥିଲେ ।

Powered by Froala Editor