ବାୟୋଗ୍ୟାସ୍ ଟାଙ୍କିରେ ପଡ଼ିଗଲା ବିଲେଇ, ବାହାର କରିବାକୁ ଯାଇ ପରିବାରର ୫ ମୃତ
![ବାୟୋଗ୍ୟାସ୍ ଟାଙ୍କିରେ ପଡ଼ିଗଲା ବିଲେଇ, ବାହାର କରିବାକୁ ଯାଇ ପରିବାରର ୫ ମୃତ](https://odishanewslens.com/news_gallery/29253_1712777720.jpg)
ଗୋଟିଏ ବିଲେଇର ଜୀବନ ବଞ୍ଚାଇବାକୁ ଯାଇ ୫ ଜଣଙ୍କ ମୃତ୍ୟୁ ଘଟିଛି । ମହାରାଷ୍ଟ୍ରର ଅହମଦ ନଗର ଜିଲ୍ଲାର ନେଭାସା ତହସିଲରେ ଥିବା ଗୋବର ଭର୍ତ୍ତି ବାୟୋଗ୍ୟାସ୍ କୂଅରେ ଏକ ବିଲେଇ ପଡି ଯାଇଥିଲା। ସେହି ବିଲେଇକୁ ବଞ୍ଚାଇବା ପାଇଁ ପ୍ରଥମେ ଜଣେ ବ୍ୟକ୍ତି ଉକ୍ତ ବାୟୋଗ୍ୟାସ କୂଅ ଭିତରକୁ ଓହ୍ଲାଇଥିଲେ। ହେଲେ କିଛି ସମୟରେ ଉକ୍ତ ବ୍ୟକ୍ତି ଯେତେବେଳେ ଫେରିନଥିଲେ ସେତେବେଳେ ତାଙ୍କୁ ବଞ୍ଚାଇବାକୁ ଆଉ ଜଣେ ସେହି ବାୟୋଗ୍ୟାସ୍ କୂଅ ଭିତରକୁ ଯାଇଥିଲେ। ଏହାପରେ ଜଣଙ୍କ ପରେ ଜଣେ କରି ଗୋଟିଏ ପରିବାରର ୬ ଜଣ ବ୍ୟକ୍ତି ସେହି ବାୟୋଗ୍ୟାସ୍ ଗର୍ତ୍ତରେ ଫସି ଯାଇଥିଲେ। ପରେ ବହୁ କଷ୍ଟରେ ୬ ଜଣଙ୍କ ମଧ୍ୟରୁ ଜଣଙ୍କୁ ଜୀବନ୍ତ ଉଦ୍ଧାର କରାଯାଇଥିବା ବେଳେ ଅନ୍ୟ ୫ ଜଣଙ୍କ ମୃତ୍ୟୁ ହୋଇଛି।
ବାୟୋଗ୍ୟାସ୍ ଗର୍ତ୍ତରେ ଫସିଯିବା ଯୋଗୁ ସମସ୍ତଙ୍କ ମୃତ୍ୟୁ ହୋଇଥିବା କୁହାଯାଉଛି। ପୁଲିସ ଏବଂ ତହସିଲଦାର ଘଟଣାସ୍ଥଳରେ ପହଞ୍ଚି ପୂରା ଘଟଣାର ଯାଞ୍ଚ କରିଛନ୍ତି।
ସୂଚନା ଅନୁଯାୟୀ, ଏହି ବାୟୋଗ୍ୟାସ୍ କୂଅକୁ ଜଣେ କୃଷକ ତିଆରି କରିଥିଲେ। ମଙ୍ଗଳବାର ଏହି ଦୁର୍ଘଟଣା ଘଟିଥିଲା ଏବଂ ବିଳମ୍ବିତ ରାତି ପର୍ଯ୍ୟନ୍ତ ଲୋକଙ୍କୁ ବାହାରକୁ ଆଣିବା ପାଇଁ ଉଦ୍ୟମ ଜାରି ରହିଥିଲା।
Powered by Froala Editor