ନିର୍ବାଚନୀ ମୈଦାନକୁ ଓହ୍ଲାଇବେ ଅଭନେତ୍ରୀ ରଚନା ବାନାର୍ଜୀ। ଏଥର ଲୋକସଭା ନିର୍ବାଚନ ଲଢ଼ିବାକୁ ତାଙ୍କୁ ଟିକେଟ୍‌ ମିଳିଛି । ଟିଏମ୍‌ସି ରଚନା ବାନାର୍ଜୀଙ୍କୁ ପଶ୍ଚିମବଙ୍ଗର ହୁଗଳିରୁ ପ୍ରାର୍ଥୀ କରିଛି। ସେ ଏହି ଆସନରୁ ନିର୍ବାଚନ ଲଢ଼ିବେ। ପଶ୍ଚିମବଙ୍ଗରେ ରଚନାଙ୍କ ଫ୍ୟାନ୍‌ ଫଲୋଇଂ ଅଧିକା ଥିବାରୁ ଟିଏମ୍‌ସି ସୁପ୍ରିମୋ ତଥା ମୁଖ୍ୟମନ୍ତ୍ରୀ ମମତା ବାନାର୍ଜୀ ତାଙ୍କ ଉପରେ ଏଥର ଭରସା ରଖିଛନ୍ତି। ବିରୋଧୀ ନେତାଙ୍କୁ ସେ କଡା ଟକ୍କର ଦେବେ।

ତାଙ୍କ ନାମ ଘୋଷଣା ହେବା ପରେ ସେ ଟିଏମସି ସୁପ୍ରିମୋ ମମତା ବାନାର୍ଜୀଙ୍କ ସହ କର୍ମୀମାନଙ୍କୁ ଭେଟିଥିଲେ । ଗୋଟାଏ ସମୟରେ ଓଲିଉଡ୍‌ରେ ଚହଳ ସୃଷ୍ଟି କରିଥିବା ନାୟିକା ହେଉଛନ୍ତି ରଚନା ବାନାର୍ଜୀ। କୋଲକାତାରେ ଜନ୍ମ ହୋଇଥିବା ଏହି ସୁନ୍ଦରୀ ନାୟିକା ଜଣକ କୋଲକାତାରେ ହେଉଥିବା ୧୯୯୪ ମସିହାରେ ‘ମିସ୍‌ କୋଲକାତା’ ହେବା ସହ ଦେଶର ୫ଟି ସୁନ୍ଦରୀ ପ୍ରତିଯୋଗିତାରେ ବିଜୟୀ ହୋଇଥିଲେ।

ଯଦିଓ ସେ ନିଜ ମାତୃଭାଷା ବଙ୍ଗଳାରୁ ନିଜର ଅଭିନୟ ଜୀବନ ଆରମ୍ଭ କରିଥିଲେ ମାତ୍ର ତାଙ୍କୁ ବିଶେଷ ସଫଳତା ଓଲିଉଡ୍‌ରୁ ହିଁ ମିଳିଛି। ପାଖାପାଖି ୨୦ରୁ ୩୦ଟି ଓଡ଼ିଆ ଫିଲ୍ମରେ ସେ ମୁଖ୍ୟ ଭୂମିକାରେ ଅଭିନୟ କରି ଦର୍ଶକଙ୍କ ହୃଦୟ ଜିତିଛନ୍ତି। ଅଭିନେତା ସିଦ୍ଧାନ୍ତ ମହାପାତ୍ରଙ୍କ ସହ ତାଙ୍କର ଜବର୍‌ଦସ୍ତ ଯୋଡ଼ିକୁ ଆଜି ବି ଝୁରି ହୁଅନ୍ତି ଓଡ଼ିଶାର ଦର୍ଶକ।

Powered by Froala Editor