ନାବାଳିକା ସହିତ ଦୁଷ୍କର୍ମ କରିଥିବା ଅଭିଯୁକ୍ତଙ୍କୁ ଜାମିନ
![ନାବାଳିକା ସହିତ ଦୁଷ୍କର୍ମ କରିଥିବା ଅଭିଯୁକ୍ତଙ୍କୁ ଜାମିନ](https://odishanewslens.com/news_gallery/27288_1705175039.jpg)
ଜଣେ ୧୩ ବର୍ଷୀୟ ବାଳିକା ସହିତ ଦୁଷ୍କର୍ମ କରିଥିବା ଅଭିଯୋଗରେ ଗିରଫ ହୋଇଥିବା ୨୬ ବର୍ଷିୟ ଯୁବକଙ୍କୁ ବମ୍ବେ ହାଇକୋର୍ଟର ନାଗପୁର ବେଞ୍ଚ୍ ଜାମିନ ମଞ୍ଜୁର କରିଛନ୍ତି। ଅଭିଯୁକ୍ତଙ୍କୁ ଜାମିନ ଦେବା ବେଳେ କୋର୍ଟ କହିଛନ୍ତି, ପୀଡ଼ିତା ଓ ଅଭିଯୁକ୍ତଙ୍କ ମଧ୍ୟରେ ପ୍ରେମ ବ୍ୟାପାର ରହିଥିଲା। ତେଣୁ ସେମାନଙ୍କ ଭିତରେ ଥିବା ପ୍ରେମ ଯୋଗୁ ତଥାକଥିତ ଶାରିରୀକ ସମ୍ପର୍କ ସୃଷ୍ଟି ହୋଇଥିଲା। ଉକ୍ତ ଶାରିରୀକ ସମ୍ପର୍କ ବାସନା ପାଇଁ ଘଟି ନଥିଲା।
ନାବାଳିକାଙ୍କ ବାପା ଫାଇଲ୍ କରିଥିବା ମାମଲାରେ ନୀତିନ ଧାବେରାଓ ନାମକ ଉକ୍ତ ଅଭିଯୁକ୍ତଙ୍କ ଜାମିନ ଆବେଦନ ଶୁଣାଣି କରି ନାଗପୁର ବେଞ୍ଚ୍ର ବିଚାରପତି ଊର୍ମିଳା ଯୋଶୀ-ଫାଲ୍କେ କହିଲେ ଯେ, ସ୍ବ ଇଚ୍ଛାରେ ଘରୁ ବାହାରିଥିଲା ବୋଲି ଝିଅ କହିଛି। ସେହିପରି, ଅଭିଯୁକ୍ତ ବି ସ୍ବଳ୍ପ ବୟସ୍କ ଏବଂ ପ୍ରେମ ଯୋଗୁଁ ଦୁହେଁ ଏକତ୍ର ହୋଇଥିଲେ।ପ୍ରେମ ହେତୁ ଦୁହିଁଙ୍କ ମଧ୍ୟରେ ନିବିଡ଼ତା ଆସିଛି। ମନେ ହେଉଛି, ଯୁବାଙ୍କ ମଧ୍ୟରେ ପରସ୍ପର ପ୍ରତି ଆକର୍ଷଣ ଥିବାରୁ ଦୈହିକ ସମ୍ପର୍କ ସ୍ଥାପିତ ହୋଇଛି। ଏହା କାମୁକତାଜନିତ ଯୌନ ଉତ୍ପୀଡ଼ନ ନୁହେଁ।
ନାବାଳିକାଙ୍କ ବାପା ଅଭିଯୋଗ କରିଥିଲେ ଯେ, ବହି ଆଣିବା ବାହାନାରେ ତାଙ୍କ ୧୩ ବର୍ଷୀୟ ଝିଅ ୨୦୨୦ ଅଗଷ୍ଟ ୨୩ ତାରିଖରେ ଘରୁ ବାହାରକୁ ଯାଇ ଆଉ ଫେରି ନ ଥିଲା। ସେ ନିରୁଦ୍ଦିଷ୍ଟ ରିପୋର୍ଟ କରିବା ପରେ ପୁଲିସ ତାକୁ ଠାବ କରିଥିଲା।
ପୀଡ଼ିତା ଜଣଙ୍କ କହିଛନ୍ତି ଯେ ତାଙ୍କ ସହ ବଳପୂର୍ବକ ଅଭିଯୁକ୍ତ ଜଣଙ୍କ କିଛି ବି କରି ନାହାନ୍ତି। ଉଭୟ ଏକାଠି ଓ ସହମତି ଭିତ୍ତିରେ ଘର ଛାଡ଼ି ରାଜ୍ୟ ବାହାରର ବିଭିନ୍ନ ସ୍ଥାନରେ ରହିଥିଲେ। ତେଣୁ ବାସନାର ବଶବର୍ତ୍ତୀ ହୋଇ ଅଭିଯୁକ୍ତ ଜଣଙ୍କ ଯୌନ ନିର୍ଯାତନା ଦେଇଥିବାର କୌଣସି ପ୍ରମାଣ ନାହିଁ ବୋଲି ଜଷ୍ଟିସ ଉର୍ମିଲା କହିଛନ୍ତି।
Powered by Froala Editor