ଭୁବନେଶ୍ୱର: ଆଜି ବିଜୁ ଜନତା ଦଳର ପ୍ରତିଷ୍ଠା ଦିବସ । ଜନସେବାର ଜୟଯାତ୍ରାରେ ଆଉ ଏକବର୍ଷ ଅତିକ୍ରମ କରିବାକୁ ଯାଉଛି ବିଜେଡି । ୨୭ତମ ପ୍ରତିଷ୍ଠା ଦିବସ ପାଳନ କରୁଛି ବିଜେଡି । ୨୬ ପୂରି ୨୭ବର୍ଷରେ ପାଦ ଦେଇଛି ବିଜୁ ଜନତା ଦଳ ।୨୭ ବର୍ଷର ଦୀର୍ଘ ଯାତ୍ରା ପଥରେ ଦଳ ଅନେକ ସମୟରେ ଅନେକ ଅସମଞ୍ଜସ୍ୟ ପରିସ୍ଥିତି ସମ୍ମୁଖୀନ ହୋଇଛି। ରାଜନୈତିକ ବାଦବିବାଦ ଓ ବିରୋଧୀଙ୍କ ଘାତ ପ୍ରତିଘାତ ସତ୍ୱେ ବିଜେଡି ରାଜ୍ୟର ଶୀର୍ଷ ଓ ଅପ୍ରତିଦ୍ୱନ୍ଦ୍ୱୀ ରାଜନୈତିକ ଦଳରେ ପରିଣତ ହୋଇଛି। ସଂଖ୍ୟାଧିକ ମତଦାତା ବିଜେଡିକୁ ନିରବଚ୍ଛିନ୍ନ ଭାବରେ ସମର୍ଥନ ଦେଇ ଦଳକୁ କ୍ରମାନ୍ୱୟରେ ୫ମଥର କ୍ଷମତାସୀନ କରାଇଛନ୍ତି। ବିଜେଡି ଏକ ରାଜନୈତିକ ଦଳ ଅପେକ୍ଷା ଏକ ଅନୁଷ୍ଠାନରେ ଏବଂ ଏହାର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏକ ‘ବ୍ରାଣ୍ଡ’ରେ ପରିଣତ ହୋଇଛନ୍ତି। ରାଜ୍ୟବାସୀଙ୍କୁ ନିଜ ପରିବାରର ସଦସ୍ୟ ଭାବରେ ଗ୍ରହଣ କରି ସେମାନଙ୍କ ସ୍ୱାର୍ଥସାଧନ ସହ ରାଜ୍ୟର ସ୍ୱାର୍ଥ ନିମନ୍ତେ କେନ୍ଦ୍ର ସହ ଲଢ଼ିବାକୁ ନବୀନଙ୍କ ଆହ୍ୱାନକୁ ବୀଜମନ୍ତ୍ର ଭାବରେ ଗ୍ରହଣ କରିଛି ବିଜେଡି। ସମାଜର ଶେଷସ୍ଥାନରେ ଥିବା ଗରିବ ଲୋକଟିର ବିକାଶ ପାଇଁ କାର୍ୟ୍ୟ କରିବାକୁ ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନଙ୍କ ଆହ୍ୱାନକୁ କାର୍ୟ୍ୟକାରୀ କରିବା ଏବଂ ସ୍ୱତନ୍ତ୍ର ଓଡ଼ିଶା ପ୍ରଦେଶର ଶତବାର୍ଷିକୀ ପାଳନ ବେଳକୁ ଓଡ଼ିଶାକୁ ଦେଶର ଶୀର୍ଷ ରାଜ୍ୟରେ ପରିଣତ କରିବାକୁ ନବୀନଙ୍କ ପ୍ରତିବଦ୍ଧତାକୁ ସାକାର କରିବାକୁ ଦଳର ସମସ୍ତ କାର୍ୟ୍ୟକର୍ତ୍ତା ଆଗଭର ହୋଇଛନ୍ତି।
ଓଡ଼ିଶାର ବିକାଶ, ଓଡ଼ିଆଙ୍କ ଉନ୍ନତି, ଓଡ଼ିଆ ଅସ୍ମିତାର ସୁରକ୍ଷା, ମହିଳା ସଶକ୍ତିକରଣ ନିମନ୍ତେ ପ୍ରବାଦପୁରୁଷ ବିଜୁ ପଟ୍ଟନାୟକ ଯେଉଁ ସ୍ୱପ୍ନ ଦେଖିଥିଲେ ତାହାକୁ ସାକାର କରିବାକୁ ବିଜେଡ଼ି ଲକ୍ଷ୍ୟ ରଖିଛି। ଏହାକୁ କାର୍ୟ୍ୟକାରୀ କରିବାକୁ ପ୍ରତିବଦ୍ଧ ହୋଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଓଡ଼ିଆ ଜାତି ସମଗ୍ର ବିଶ୍ୱରେ ସମ୍ମାନର ସହ ମୁଣ୍ଡ ଟେକି ଠିଆ ହେବ ବୋଲି ବିଜୁ ସ୍ୱପ୍ନ ଦେଖିଥିଲେ ତାହାକୁ କାର୍ୟ୍ୟକାରୀ କରିବା ଏବେ ବିଜୁ ଜନତା ଦଳର ଦାୟିତ୍ୱ ହୋଇଛି। ଯେଉଁଥିପାଇଁ ଦୁଇ ଦଶନ୍ଧି ତଳେ ଏକ ଆର୍ଥିକ ଦୁଃସ୍ଥିତି, ନିଃସମ୍ବଳ ରାଜ୍ୟ ଭାବରେ ପରିଚିତ ଓଡ଼ିଶା ଆଜି ସାରା ଦେଶରେ ସମ୍ମାନର ସହ ମୁଣ୍ଡଟେକି ଠିଆ ହୋଇ ପାରିଛି। ଅନାହାର ମୃତ୍ୟୁର ପର୍ୟ୍ୟଟନସ୍ଥଳ କଳାହାଣ୍ଡି ଆଜି ଦେଶର ଧାନକ୍ଷେତରେ ପରିଣତ ହୋଇଛି। ମହାବାତ୍ୟା ବିଧ୍ୱସ୍ତ ଓଡ଼ିଶା ଏବେ ଦେଶର ପୁଞ୍ଜିନିବେଶର ପେଣ୍ଠ ପାଲଟିଛି। ବନ୍ୟା, ମରୁଡ଼ି ପରି ପ୍ରାକୃତିକ ବିପର୍ୟ୍ୟୟ ସତ୍ୱେ ନିରନ୍ତର ବିକାଶ କ୍ଷେତ୍ରରେ ଓଡ଼ିଶା ଜାତୀୟ ହାରଠାରୁ ଉଚ୍ଚସ୍ତରରେ ପହଞ୍ଚିଛି। ରାଜ୍ୟବାସୀଙ୍କ ଆୟ ବୃଦ୍ଧି ଜାତୀୟ ହାରକୁ ଅତିକ୍ରମ କରିଛି। ବିଭିନ୍ନ ସମୟରେ କେନ୍ଦ୍ରୀୟ ଅବହେଳା, ଅନୁଦାନ ହ୍ରାସ, ଯୋଜନାର ଅଂଶ ହ୍ରାସ ସତ୍ୱେ ଗତ ୨୧ ବର୍ଷ ମଧ୍ୟରେ ନବୀନଙ୍କ ନେତୃତ୍ୱାଧୀନ ବିଜେଡି ସରକାର ପାଖାପାଖି ୧୦୦ଟି ନିଜସ୍ୱ ଯୋଜନା ପ୍ରଣୟନ କରିଛି। ଏଥିରେ ସମାଜର ତଳସ୍ତରର ଲୋକମାନେ ଉପକୃତ ହୋଇଛନ୍ତି। ୭୦ ଲକ୍ଷ ମହିଳାଙ୍କୁ ସ୍ୱାବଲମ୍ବୀ କରିବାକୁ ସକ୍ଷମ ହୋଇ ପାରିଛି।

Powered by Froala Editor