ଭୁବନେଶ୍ୱର:  କାମିୟା ଜାନୀଙ୍କ ସ୍ପଷ୍ଟୀକରଣ ଉପରେ ପ୍ରତିକ୍ରିୟା ରଖିଛନ୍ତି ବିଜେପି ବିଧାୟକ ସୂରଜ ସୂର୍ୟ୍ୟବଂଶୀ । ସେ କହିଛନ୍ତି ଜଗନ୍ନାଥଙ୍କୁ ନେଇ ରାଜନୀତି ଓ ମହାପ୍ରସାଦକୁ ନେଇ ମାର୍କେଟିଂ କରାଯାଉଛି । ଅଭଡା ରେଷ୍ଟୁରାଂଟର ଖାଦ୍ୟ ନୁହେଁ । କାମିୟାଙ୍କ ଖାଇବା ଟେବୁଲରେ ଗୋମାଂସ ରହିଛି । ଯାହା ଧରିଥିଲେ ତାହା ଗୋମାଂସ । ସେ ଖାଆନ୍ତୁ କି ନଖାଆନ୍ତୁ, ସେ ଗୋମାଂସର ପ୍ରଚାର କରୁଛନ୍ତି । ଗୋମାଂସକୁ ପ୍ରଚାର ପ୍ରସାର ଓ ଉତ୍ସାହିତ କରୁଥିବା ଲୋକଙ୍କୁ ମନ୍ଦିର ଭିତରକୁ କିପରି ପ୍ରବେଶ କରାଗଲା ବୋଲି ସେ ପ୍ରଶ୍ନ କରିଛନ୍ତି ।

ପ୍ରକାଶ ଯେ ବ୍ଲଗର କାମିୟା ଜାନୀଙ୍କ ପୁରୀ ଶ୍ରୀମନ୍ଦିର ମଧ୍ୟକୁ ପ୍ରବେଶ ଓ ଅବଢ଼ା ଖାଇବାକୁ ନେଇ ବିବାଦ ଦେଖା ଦେଇଥିବା ବେଳେ ସେ ଏକ ଭିଡିଓ ବାର୍ତ୍ତାରେ ସ୍ପଷ୍ଟୀକରଣ ଦେଇଛନ୍ତି। ସେ କହିଛନ୍ତି ଯେ ସେ ଗୋମାଂସ ଖାଆନ୍ତି ନାହିଁ କି ଏହାର ପ୍ରୋତ୍ସାହନ କରନ୍ତି ନାହିଁ। ସେ ଭିଡିଓ ବାର୍ତାରେ କହିଛନ୍ତି, ମୁଁ ଶ୍ରୀଜଗନ୍ନାଥଙ୍କ ଆଶୀର୍ବାଦ ପାଇବାକୁ ପୁରୀ ଯାଇଥିଲି ଓ ଲୋକଙ୍କ ପାଖରେ ଶ୍ରୀମନ୍ଦିରର ନିର୍ମାଣ ଓ ସଂସ୍କୃତି ପହଞ୍ଚାଇବା ଉଦ୍ଦେଶ୍ୟ ଥିଲା। ସେ କହିଛନ୍ତି ଯେ ଦୁର୍ଭାଗ୍ୟବଶତଃ ମୋର ଏହି ଭ୍ରମଣ ବିବାଦୀୟ ହୋଇଛି ଓ ଭ୍ରମଣ ସମୟରେ ସେ କୌଣସି ନିୟମ ଭଙ୍ଗ କରି ନ ଥିବା କହିଛନ୍ତି।

ସେ ହିନ୍ଦୁ ଧର୍ମକୁ ଅନୁସରଣ କରନ୍ତି ବୋଲି କହିଛନ୍ତି। ଗୋମାଂସ ଖାଇବା ନେଇ ସେ କହିଛନ୍ତି ଯେ ସେ କେବଳ କେରଳ ଫୁଡ୍‌ ବ୍ଲଗ ଭିଡିଓର ଏକ ସ୍କ୍ରିନସଟ୍‌ ବ୍ୟବହାର କରିଛନ୍ତି କିନ୍ତୁ ସେଠାରେ ବିଫ୍‌ ଖାଇ ନାହାନ୍ତି ବରଂ ନିରାମିଷ ଖାଦ୍ୟ ଖାଇଛନ୍ତି। ସେ ସଫେଇ ଦେଇଛନ୍ତି ଯେ ସେ ଯେଉଁ ଫୁଡ୍‌ ବ୍ଲଗ କରୁଛନ୍ତି ସେସବୁ ସ୍ଥାନରେ ସବୁ ଖାଦ୍ୟ ଖାଉ ନାହାନ୍ତି। ଏହି ଭିଡିଓ ବିବାଦ ଦୂର କରିବ ବୋଲି କାମିଆ ଆଶା କରିଛନ୍ତି।

Powered by Froala Editor