ଇନ୍ଦ୍ରାବତୀ ଜଳ ବିଦ୍ୟୁତ୍ ପ୍ରକଳ୍ପକୁ ବିତିଲାଣି ୩୦ ବର୍ଷ । ଅଥଚ ବିସ୍ଥାପିତଙ୍କ ଦୁଃଖ ସରୁନି । ସେତେବେଳେ ପ୍ରକଳ୍ପ ପାଇଁ ଜମିବାଡି ସବୁଦେଲେ ଚାଷୀ । ଜଳଭଣ୍ଡାରରେ ଲୀନ ହେଲା ୨୦ ହଜାର ଏକରରୁ ଊର୍ଦ୍ଧ୍ୱ ଜମି । ଭାବିଥିଲେ ଲୋକଙ୍କ ହିତରେ ଜମି ଯାଇଛି । ତାର କ୍ଷତିପୂରଣ ସରକାର ଦେବେ । ହେଲେ ଜମି ହରାଇ ଜମିଦାର ଏବେ ଦିନ ମଜୁରିଆ ।  

୧୯୮୫ ମସିହାରେ ଇନ୍ଦ୍ରାବତୀ ଜଳ ବିଦ୍ୟୁତ୍ ପ୍ରକଳ୍ପ ପାଇଁ ଜମି ଅଧିଗ୍ରହଣ ହେଲା । ୧୯୯୦ରୁ ୧୯୯୨ ମଧ୍ୟରେ କଳାହାଣ୍ଡି, ନବରଙ୍ଗପୁର ଓ କୋରାପୁଟ ଜିଲ୍ଲାର ୧୦୫ ଖଣ୍ଡ ଗ୍ରାମର ୬ ହଜାର ୧୩୩ ପରିବାର ବାସଚ୍ୟୁତ ହେଲେ । ନବରଙ୍ଗପୁର ଜିଲ୍ଲା ତେନ୍ତୁଳିଖୁଂଟି ବ୍ଲକ୍‌ର ଗେଡ଼଼ଦେଓପାଲ୍ଲି, ମାଗାଁ, ଲମତାଗୁଡା, ଅଂଚଳଗୁମ୍ମା, ବରେହିପଦର ଓ ତେନ୍ତୁଳିଖୁଂଟି ପଂଚାୟତର ୩୪ଟି କ୍ଲଷ୍ଟର ଗ୍ରାମରେ ୧୨ ଶହ ବିସ୍ଥାପିତ ପରିବାରଙ୍କୁ ଥଇଥାନ କରାଗଲା । 

ସେହିପରି ନନ୍ଦାହାଣ୍ଡି ବ୍ଲକରେ ପ୍ରାୟ ୩୦୦ ପରିବାର, କଳାହାଣ୍ଡି ଜିଲ୍ଲାର ଜୟପାଟଣା ଓ ଥୁଆମୂଳ ରାମପୁର ବ୍ଲକରେ ୩ ହଜାର ୧୨୧ ପରିବାର, କୋରାପୁଟ ଜିଲ୍ଲାର ବୋରିଗୁମ୍ମା, ଦଶମନ୍ତପୁର ବ୍ଲକର ବିଭିନ୍ନ ଗ୍ରାମରେ ୧୦୬୧ ପରିବାର ଥଇଥାନ ହୋଇଛନ୍ତି । ବିସ୍ଥାପିତଙ୍କୁ କ୍ଷତିପୂରଣ ବାବଦରେ ପ୍ରଥମ ଓ ଦ୍ୱିତୀୟ ପର୍ଯ୍ୟାୟରେ ୩୫ ହଜାର ୫୦୦ ଟଙ୍କା, ତୃତୀୟ ଓ ଚତୁର୍ଥ ପର୍ଯ୍ୟାୟରେ ୪୨ ହଜାର ୨୦୦ ଓ ପଂଚମ ପର୍ଯ୍ୟାୟରେ ୭୦ ହଜାର ଟଙ୍କା ଲେଖାଏଁ କ୍ଷତିପୂରଣ ମିଳିଥିଲା । ତେବେ କ୍ଷତିପୂରଣ ପ୍ରଦାନରେ ପାତର ଅନ୍ତର କାରଣରୁ ବିସ୍ଥାପିତ ସେମାନଙ୍କ ହକ୍ ପାଇଁ ୩୦ ବର୍ଷ ଧରି ଲଢ଼େ଼ଇ ଜାରି ରଖିଛନ୍ତି । ଇନ୍ଦ୍ରାବତୀ ବୁଡ଼଼ି ଅଂଚଳ ବିକାଶ ପରିଷଦ ଏହାର ନେତୃତ୍ୱ ନେଉଛି । 

ପରିଷଦର ସମ୍ପାଦକ ସୁଧୀର ସୁନାଙ୍କ ଦାବି ହେଲା କ୍ଷତିପୂରଣ ପ୍ରଦାନରେ ପାତର ଅନ୍ତର ଦୂର କରିବା ପାଇଁ ଆର୍‌ଡିସିସ୍ତରରେ ୨୦୦୮ ମସିହାରେ ଉଚ୍ଚସ୍ତରୀୟ ବେଠକ କରାଯାଇ ପୁନଃ କ୍ଷତିପୂରଣ ପ୍ରଦାନ ଲାଗି ପ୍ରାୟ ୧୬ କୋଟି ଟଙ୍କାର ଅଟକଳ ରଖାଯାଇଥିଲା । ଯାହା ଆଜି ସୁଦ୍ଧା ବିସ୍ଥାପିତଙ୍କୁ ମିଳିପାରିନି । କେବଳ ସେତିକି ନୁହେଁ ଯେଉଁ ବିସ୍ଥାପିତ ପରିବାର ସରକାରୀ ଜମିରେ ଘର କରିଛନ୍ତି ଏଯାବତ୍ ବହୁ ପରିବାରଙ୍କୁ ଘରଡ଼ିହ ଜମିର ପଟ୍ଟା ମିଳିପାରୁନି । 

୧୯୯୪ ମସିହାରେ ବିସ୍ଥାପିତ ପରିବାରଙ୍କୁ ବିଦ୍ୟୁତ୍ ଯୋଗାଣ ପାଇଁ ୧ କୋଟି ୬ ଲକ୍ଷ ଟଙ୍କାର ଅନୁଦାନ ମିଳିଥିଲା । କିନ୍ତୁ ବିଦ୍ୟୁତ୍ ସଂଯୋଗ ବେଳକୁ ପ୍ରତି ପରିବାର ପିଛା ୫ରୁ ୬ ହଜାର ଟଙ୍କା ଆଦାୟ କରି ସଂଯୋଗ ଦିଆଯାଇଥିବା ଅଭିଯୋଗ କରିଛନ୍ତି ବିସ୍ଥାପିତ । ତେବେ ବିସ୍ଥାପିତଙ୍କ ପ୍ରତି ଦୃଷ୍ଟି ଦେବାକୁ ସେ ଅନୁରୋଧ କରିଛନ୍ତି । 

Powered by Froala Editor