ଅଜଣା ରୋଗ ଆତଙ୍କ : କେନ୍ଦୁଝର ଜୁଆଙ୍ଗ ଗାଁରେ ପହଞ୍ଚିଲେ ୫ ଜଣିଆ ଡାକ୍ତରୀ ଟିମ୍
କେନ୍ଦୁଝର ବାଂଶପାଳ ବ୍ଲକ ଗୋନାସିକାର ଜନ୍ତାରୀ ଜୁଆଙ୍ଗ ବସ୍ତିରେ ଅଜଣା ରୋଗରେ ମାସକ ଭିତରେ ୧୧ରୁ ଅଧିକ ଲୋକଙ୍କ ମୃତ୍ୟୁ ହୋଇଛି। ଏଥିସହ ବହୁ ଲୋକ ଜ୍ୱରରେ ପୀଡ଼ିତ ହୋଇ ଘରେ ଚିକିତ୍ସିତ ହେଉଛନ୍ତି। ଏ ନେଇ ଖବର ଗଣମାଧ୍ୟମରେ ପ୍ରକାଶ ପାଇବା ପରେ କେନ୍ଦୁଝର ଜିଲ୍ଲା ପ୍ରଶାସନ ତତ୍ପର ହୋଇଛି। ବାଂଶପାଳ ଗୋଷ୍ଠୀ ଉନ୍ନୟନ ଅଧିକାରୀ, ପିଏ- ଆଇଟିଡିଏ, ସ୍ଵାସ୍ଥ୍ୟ ଅଧିକାରୀ, ଜୁଆଙ୍ଗ ଉନ୍ନୟନ ସଂସ୍ଥା ତଥା ସିଡିପିଓ ଗାଁରେ ପହଞ୍ଚି ପାରିପାର୍ଶ୍ୱିକ ସ୍ଥିତି ଅନୁଧ୍ୟାନ କରିଛନ୍ତି। ଏଥିସହ ଭୁବନେଶ୍ୱରରୁ ୫ ଜଣିଆ ମେଡିକାଲ୍ ଟିମ୍ କେନ୍ଦୁଝର ଯାଇଛି। ସେମାନେ ରୋଗର କାରଣ ଓ ନିରାକଣ ନେଇ ଲୋକଙ୍କୁ ପରାମର୍ଶ ଦେବେ ବୋଲି ଜଣାପଡ଼ିଛି।
ତେବେ କେନ୍ଦୁଝର ସ୍ୱାସ୍ଥ୍ୟ ଅଧିକାରୀ କହିଛନ୍ତି ଯେ, ମାସକରେ ୧୧ ଜଣଙ୍କ ନୁହେଁ ବରଂ ୩ ମାସରେ ୯ ଜଣଙ୍କ ମୃତ୍ୟୁ ଘଟିଛି । କିଡ୍ନୀ, ଜ୍ୱର, ବୃଦ୍ଧାବସ୍ଥା, ଜଣ୍ଡିସ, ରକ୍ତହୀନତା ଓ ଅନ୍ୟାନ୍ୟ କାରଣରୁ ଏସବୁ ମୃତ୍ୟୁ ଘଟିଛି । ରିପୋର୍ଟରେ ସ୍ପଷ୍ଟ ଯେ, ୧୧ ଜଣଙ୍କ ମୃତ୍ୟୁ ଘଟିବା କଥା ମିଥ୍ୟ । ତଥାପି ଅଞ୍ଚଳରେ ଡାକ୍ତରୀ ଟିମ୍ ପରୀକ୍ଷା ଆରମ୍ଭ କରିଛନ୍ତି ।
ମେଡ଼ିକାଲ୍ ଟିମ୍ ପ୍ରଥମେ ଗାଁରେ ବସିଥିବା ଦୁଇଟି ସୌର ଚାଲିତ ପାନୀୟ ଜଳ ପ୍ରକଳ୍ପର ରକ୍ଷଣାବେକ୍ଷଣ ଯାଞ୍ଚ କରିଥିଲେ। ସେହି ସମୟରେ ପାତୀୟ ଜଳ ଟ୍ୟାଙ୍କ ନିୟମିତ ସଫେଇ ହେଉନଥିବା ଦେଖିବାକୁ ମିଳିଥିଲା। ଯେଉଁଥିପାଇଁ ପାଣି ଟ୍ୟାଙ୍କରେ ପୋକ ଭାସୁଥିବା ବେଳେ ଦୁର୍ଗନ୍ଧ ବାହାରୁଥିଲା। ଯେଉଁ ପାନୀୟ ଜଳ ପିଇବା ଯୋଗ୍ୟ ନୁହେଁ। ତେଣୁ ଲୋକମାନେ ଚୁଆରୁ ପାଣି ସଂଗ୍ରହ ପିଇବାକୁ ବାଧ୍ୟ ହେଉଥିଲେ। ଯେଉଁଥିପାଇଁ ଲୋକଙ୍କ ରକ୍ତ ଓ ଗାଁରୁ ପାନୀଜଳର ନମୂନା ସଂଗ୍ରହ କରିଛି ମେଡ଼ିକାଲ୍ ଟିମ୍।
Powered by Froala Editor
