ଭୁବନେଶ୍ୱର: ଆଗକୁ ୨୦୨୪ ସାଧାରଣ ନିର୍ବାଚନ । ହାତରେ ଆଉ ଅଳ୍ପ ସମୟ । ଏନେଇ ବିଭିନ୍ନ ରାଜନୈତକ ଦଳ ଚଳଚଞ୍ଚଳ ହୋଇପଡ଼ିଛନ୍ତି । ଆରମ୍ଭ କରିଦେଇଛନ୍ତି ନିର୍ବାଚନୀ ରଣନୀତି । ତେବେ ଏହାରି ଭିତରେ  ୧୦୮ ଦଫା ଚାର୍ଜସିଟ ସହ ରାଜ୍ୟ ସରକାରଙ୍କୁ ଘେରିବାକୁ ବିଜେପି ପକ୍ଷରୁ ଯୋଜନା କରାଯାଇଛି ।  ଏନେଇ ବିରୋଧୀ ଦଳ ନେତା ଜୟନାରାୟଣ ମିଶ୍ର ସୂଚନା ଦେଇଛନ୍ତି ।

 ଶ୍ରୀ ମିଶ୍ର କହିଛନ୍ତି ଯେ ଉକ୍ତ ଚାର୍ଜସିଟରେ ୫-ଟି ସଚିବଙ୍କ ଜିଲ୍ଲା ଗସ୍ତ ପ୍ରସଙ୍ଗ ରହିବ ।  ସେ କେଉଁ କ୍ଷମତା ବଦଳରେ ଜିଲ୍ଲା ବୁଲିବା ସହ ସବୁ କାମ ତାମିଲନାଡ଼ୁ ଲୋକଙ୍କୁ ଦେଉଛନ୍ତି ତାହା ମଧ୍ୟ ଉକ୍ତ ଚାର୍ଜସିଟରେ ଉଲ୍ଲେଖ ରହିବ । ସରକାରଙ୍କ ବିଫଳତା ଓ ଦୁର୍ନୀତିରେ ଲିପ୍ତ ପ୍ରସଙ୍ଗ ବି ରହିବ । କୋଇଲାରୁ ଆରମ୍ଭ କରି ଲୁହା ଦୁର୍ନୀତି ଓ ରତ୍ନଭଣ୍ଡାର ଚାବି ପ୍ରସଙ୍ଗ ମଧ୍ୟ ଉକ୍ତ ଚାର୍ଜସିଟରେ ଉଲ୍ଲେଖ କରାଯିବ ବୋଲି ଶ୍ରୀ ମିଶ୍ର କହିଛନ୍ତି ।

ସେହିପରି ଓଡ଼ିଶାର ୩୦ଟି ଜିଲ୍ଲାର ଦୁର୍ନୀତିକୁ ଚାର୍ଜସିଟରେ ଗୁରୁତ୍ୱ ଦିଆଯିବ । ପଞ୍ଚାୟତ, ବ୍ଲକ, ଜିଲ୍ଲା ଓ ରାଜ୍ୟସ୍ତରରେ ଚାର୍ଜସିଟ ଦିଆଯିବ ବୋଲି  ବିରୋଧୀ ଦଳ ନେତା ଜୟନାରାୟଣ ମିଶ୍ର ସୂଚନା ଦେଇଛନ୍ତି ।

ପ୍ରକାଶ ଯେ  ନବୀନ ସରକାରକୁ ଗାଦିଚ୍ୟୁତ କରିବା ପାଇଁ ବିଜେପିର ଆକ୍ସନ ପ୍ଲାନ। ଉଭୟ ବିଧାନସଭା ଓ ଲୋକସଭା ନିର୍ବାଚନରେ କିଭଳି ଅଧିକରୁ ଅଧିକ ସିଟ୍‌ ମିଳିବ, ସେଥିପାଇଁ ରୋଡ୍‌ ମ୍ୟାପ୍‌ ଉପରେ ଦଳର କୋର ଟିମ୍‌ ବୈଠକରେ ହୋଇଛି ବିସ୍ତୃତ ଆଲୋଚନା। ଆଗାମୀ ୨ ମାସ ଲାଗି କାର୍ୟ୍ୟକ୍ରମ ଖସଡ଼ା ପ୍ରସ୍ତୁତ କରାଯିବା ସହ ରାଜ୍ୟ ସରକାର ବିରୋଧରେ ଆନ୍ଦୋଳନ ଜୋରଦାର କରିବାକୁ ନିଷ୍ପତ୍ତି ହୋଇଛି।

ବିଜେପି ରାଜ୍ୟ କାର୍ୟ୍ୟାଳୟରେ ବସିଥିଲା ବିଜେପିର କୋର୍ କମିଟି ବୈଠକ। ସେପଟେ ସୁସ୍ଥ ହୋଇ ଫେରିବା ପରେ  କୋର୍ କମିଟି ବୈଠକରେ ଯୋଗ ଦେଇଥିଲେ ବିରୋଧୀ ଦଳ ନେତା ଜୟ ନାରାୟଣ ମିଶ୍ର। ବୈଠକ ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ୫-ଟି ସଚିବ ଭି.କେ ପାଣ୍ଡିଆନ୍‌ଙ୍କୁ ସିଧାସଳଖ ଟାର୍ଗେଟ କରିଛନ୍ତି ଜୟନାରାୟଣ। କହିଛନ୍ତି, ଲଢେଇ ଜୋରଦାର ହେବ। ନବୀନ ପଦଚ୍ୟୁତ ହେବେ। ସାଂଘାତିକ ଅଭିଯୋଗ ଆଣି ଶ୍ରୀ ମିଶ୍ର କହିଛନ୍ତି, ନବୀନ ପାଣ୍ଡିଆନଙ୍କୁ ଲିଜ ଦେଇ ସରକାର ଚଳାଉଛନ୍ତି। ଅନ୍ୟାୟ, ଅତ୍ୟାଚାରର ସୀମା ଡେଉଁଥିବାରୁ ଉଭୟ ଜେଲ୍ ଯିବେ। ସେପଟେ ବିଜେଡି ବିଧାୟକ ଦେବୀପ୍ରସାଦ ମିଶ୍ର କହିଛନ୍ତି, ଦଳ ଲୋକଙ୍କ ସହ ଯୋଡି ହୋଇ ରହିଛି। ତେଣୁ ଦଳକୁ ସଫଳତା ମିଳିବ।

Powered by Froala Editor