ଏମ୍ସରେ ପରିଚୟ ଅପେକ୍ଷାରେ ୨୮ ମୃତଦେହ
ଭୁବନେଶ୍ୱର : ବାଲେଶ୍ୱର ଜିଲ୍ଲା ବାହାନଗା ରେଳ ଦୁର୍ଘଟଣାକୁ ୩ ମାସ ବିତିଛି। ଦୁର୍ଘଟଣା ପରେ ଦୁଇଟି ପର୍ୟ୍ୟାୟରେ ମୋଟ ୧୬୨ଟି ମୃତଦେହ ଭୁବନେଶ୍ୱର ଏମ୍ସକୁ ଆସିଥିଲା। ସେଥିମଧ୍ୟରୁ ୧୩୪ଟିକୁ ଚିହ୍ନଟ କରାଯିବା ପରେ ସେମାନଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯାଇ ସାରିଲାଣି। ଅଗଷ୍ଟ ମାସ ୨ ତାରିଖ ସୁଦ୍ଧା ୧୩୩ଟି ମୃତଦେହ ଚିହ୍ନଟ କରାଯାଇ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିବା ବେଳେ ଗତ ମାସକ ମଧ୍ୟରେ ମାତ୍ର ଗୋଟିଏ ଶବ ଚିହ୍ନଟ କରାଯାଇ ହସ୍ତାନ୍ତର କରିଛନ୍ତି ରେଳବାଇ କର୍ତ୍ତୃପକ୍ଷ। ତେବେ ପରିଚୟ ମିଳି ନ ଥିବାରୁ ୨୮ ଶବ ଏମ୍ସରେ ବାତାନୁକୂଳିତ କଣ୍ଟେନରରେ ରହିଛି। କଣ୍ଟେନରରେ ଥିବା ୨୮ଟି ମୃତଦେହ ଓ ଡିଏନଏ ପରୀକ୍ଷା ପାଇଁ ଦାବିଦାରମାନଙ୍କ ଠାରୁ ନିଆଯାଇଥିବା ରକ୍ତ ନମୁନା ମେଳ ଖାଉ ନ ଥିବା ଜଣାପଡ଼ିଛି।ସେପଟେ କେତୋଟି ହାତଗଣତି ସମ୍ପର୍କୀୟଙ୍କୁ ଛାଡ଼ିଦେଲେ ପୂର୍ବାପେକ୍ଷା ଦାବିଦାର ଆସିବା ଢେର୍ କମିଲାଣି। ସେହି ଆଧାରରେ ଡିଏନ୍ଏ ପରୀକ୍ଷା ପ୍ରକ୍ରିୟା ମଧ୍ୟ ଏକପ୍ରକାର ବନ୍ଦ ହୋଇଯାଇଛି। ଏଭଳି ସ୍ଥିତିରେ ୨୮ଟି ଅଚିହ୍ନା ମୃତଦେହ ସେମାନଙ୍କ ସମ୍ପର୍କୀୟଙ୍କ ପାଖରେ କିପରି ପହଞ୍ଚିବ ତାକୁ ନେଇ ପ୍ରଶ୍ନ ଉଠିଛି।
ସୂଚନା ଅନୁସାରେ, ଗତ ଜୁନ ମାସ ୨ ତାରିଖରେ ବାଲେଶ୍ୱର ଜିଲ୍ଲା ବାହାନଗା ଠାରେ ଘଟିଥିବା ରେଳ ଦୁର୍ଘଟଣାର ୧୬୨ଟି ମୃତକଙ୍କ ଶବ ଦୁଇଟି ପର୍ୟ୍ୟାୟରେ ଭୁବନେଶ୍ୱର ଏମ୍ସକୁ ଅଣାଯାଇଥିଲା। ଫଟୋ ସମେତ ବିଭିନ୍ନ ଚିହ୍ନଟ ପ୍ରକ୍ରିୟା ମାଧ୍ୟମରେ ପର୍ୟ୍ୟାୟ କ୍ରମେ ୮୧ଟି ମୃତଦେହ ସେମାନଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିଲା। ବାକି ୮୧ଟି ଶବକୁ ଏକାଧିକ ଲୋକ ନିଜର ସମ୍ପର୍କୀୟ ବୋଲି ଦାବି କରିଥିଲେ। ଏମିତିକି ଗୋଟିଏ ମୃତଦେହର ୪/୫ଟି ଦାବିଦାର ବାହାରିଥିଲେ। ଏଭଳି ହେବା ଯୋଗୁଁ ମୃତଦେହ ହସ୍ତାନ୍ତରରେ ସମସ୍ୟା ଦେଖା ଦେଇଥିଲା। ଏକାଧିକ ଦାବିଦାର ଥିବା ମୃତଦେହ ଚିହ୍ନଟ ପାଇଁ ଡିଏନ୍ଏ ପରୀକ୍ଷା କରାଇବାକୁ ପ୍ରଶାସନିକ ସ୍ତରରେ ନିଷ୍ପତ୍ତି ହୋଇଥିଲା। ଏଯାବତ୍ ମୋଟ ୧୧୯ ଜଣ ଦାବିଦାରଙ୍କ ରକ୍ତ ନମୁନା ସଂଗ୍ରହ କରାଯାଇ ଦିଲ୍ଲୀସ୍ଥିତ ସେଣ୍ଟ୍ରାଲ ଫୋରେନସିକ ସାଇନ୍ସ ଲାବୋରଟୋରୀକୁ ପଠାଯାଇଥିଲା। ସେଠାରେ ମ୍ୟାଚିଂ ପ୍ରକ୍ରିୟା ସମ୍ପୂର୍ଣ୍ଣ କରାଯାଇ ଏମ୍ସକୁ ୫ଟି ପର୍ୟ୍ୟାୟରେ ରିପୋର୍ଟ ପ୍ରଦାନ କରାଯାଇଥିଲା। ୧୧୯ ଜଣ ସମ୍ପର୍କୀୟଙ୍କ ରକ୍ତ ନମୁନା ମୃତକଙ୍କ ଡିଏନଏ ସହିତ ମ୍ୟାଚ କରାଯିବା ପରେ ୫୩ ଜଣ ମୃତକଙ୍କ ପରିଚୟ ମିଳିଥିଲା।
ସେଥିମଧ୍ୟରୁ ୫୨ଟି ମୃତଦେହ ଅଗଷ୍ଟ ମାସ ୨ ତାରିଖ ସୁଦ୍ଧା ହସ୍ତାନ୍ତର କରାଯାଇଥିଲା। ଅଗଷ୍ଟ ମାସ ଠାରୁ ସେପ୍ଟେମ୍ୱର ମାସ ମଧ୍ୟରେ ଆଉ ମାତ୍ର ଗୋଟିଏ ମୃତଦେହ ଚିହ୍ନଟ କରାଯାଇ ହସ୍ତାନ୍ତର ହୋଇପାରିଛି। ମାସକ ମଧ୍ୟରେ ମାତ୍ର ଗୋଟିଏ ମୃତଦେହ ଚିହ୍ନଟ ହେବା ବାକି ୨୮ଟି ମୃତଦେହଙ୍କ ପରିଚୟ ମିଳିବା ପ୍ରକ୍ରିୟାକୁ ଅନିଶ୍ଚିତତା ଭିତରକୁ ଠେଲି ଦେଇଛି।
Powered by Froala Editor
