ଗୁଜରାଟରେ ମଦ ବିକିବା ଓ ପିଇବା ନିଷିଦ୍ଧ। ହେଲେ ଜଣେ ମହିଳା ନିଶାସକ୍ତ ଅବସ୍ଥାରେ ପୁଲିସ୍‌କୁ ନାଲି ଆଖି ଦେଖାଇଛନ୍ତି। ପୁଲିସକୁ ଚାପୁଡ଼ା ମାରିବା ସହ ଧକ୍କା ଦେଇଛନ୍ତି। ରବିବାର ରାତିରେ ମହିଳା ଜଣଙ୍କ ଭଦୋଦରାର ବିଚ୍‌ ରାସ୍ତାରେ କରୁଥିବା ଉତ୍ପାତ୍ତ କ୍ୟାମେରାରେ କଏଦ ହୋଇଛି। ଉପସ୍ଥିତ ଥିବା ଲୋକେ ଏହାର ଭିଡିଓ ରେକର୍ଡ କରିଥିବା ବେଳେ ଏହାକୁ ସୋସିଆଲ ମିଡିଆରେ ସେୟାର କରିଥିଲେ, ଯାହା ଏବେ ଭାଇରାଲ ହୋଇଛି।

ମହିଳା ଜଣଙ୍କ ରବିବାର ବିଳମ୍ବିତ ରାତିରେ ମଦ ପିଇ କାର୍‌ ଚଳାଇ ଯାଉଥିଲେ। ଏହି ସମୟରେ ତାଙ୍କ ଗାଡ଼ି ଆଉ ଗୋଟିଏ ଗାଡ଼ିକୁ ଧକ୍କା ଦେଇଥିଲା। ପୁଲିସ୍‌ ତୁରନ୍ତ ଘଟଣା ସ୍ଥଳରେ ପହଞ୍ଚି ମହିଳାଙ୍କୁ ଦୁର୍ଘଟଣା ସମ୍ପର୍କରେ ପଚରାଉଚରା କରିଥିଲା। ମଦ ନିଶାରେ ଚୂର ମହିଳା ଜଣଙ୍କ ପୁଲିସ୍‌ ଆଗରେ ନିଜର ଉଗ୍ର ରୂପ ଦେଖାଇଥିଲେ। ସେ ପୁଲିସ୍‌ ସହ ଝଗଡ଼ା କରିଥିଲେ।

ତାଙ୍କୁ ଶାନ୍ତ ହେବାକୁ କହୁଥିବା ପୁରୁଷ ପୁଲିସକର୍ମୀଙ୍କୁ ମହିଳା ଜଣକ ଧକ୍କା ମାରିଥିଲେ। ଟିମ୍ ସହିତ ଜଣେ ମହିଳା ପୁଲିସ ଥିବା ବେଳେ ମହିଳାଙ୍କୁ କାବୁ କରିବା ଅସମ୍ଭବ ଥିଲା। ତେଣୁ ଆଉ ୨-୩ଜଣ ମହିଳା ପୁଲିସଙ୍କୁ ଘଟଣାସ୍ଥଳକୁ ଡକାଯାଇଥିଲା। ଏହା ପରେ ମହିଳାଙ୍କୁ କାବୁ କରି ପୁଲିସ ଗାଡ଼ିରେ ବସାଯାଇଥିଲା। ହେଲେ ଏହି ସମୟରେ ମଧ୍ୟ ମହିଳାଜଣକ ପୁଲିସକୁ ମାଡ଼ ମାରିବା ସହ ଜଣେ ମହିଳା ପୁଲିସ କର୍ମୀଙ୍କୁ ଚାପୁଡ଼ା ମାରିଥିଲେ। ତାଙ୍କ ନାଁରେ ବିଭିନ୍ନ ଦଫାରେ ମାମଲା ରୁଜୁ କରାଯାଇଛି।

Powered by Froala Editor