ସୋ’ରୁମରେ ଅଗ୍ନିକାଣ୍ଡ, ଜଳିଗଲା ୪୦୦ ବାଇକ୍
ଆନ୍ଧ୍ରପ୍ରଦେଶର ବିଜୟୱାଡ଼ାରେ ଏକ ବାଇକ୍ ସୋ’ରୁମରେ ଭୟାବହ ଅଗ୍ନିକାଣ୍ଡ ଘଟି 400 ରୁ ଅଧିକ ଦୁଇ ଚକିଆ ଯାନ ପୋଡ଼ି ପାଉଁଶ ହୋଇଯାଇଛି। କୋଟି କୋଟି ଟଙ୍କାର ସମ୍ପତ୍ତି ନଷ୍ଟ ହୋଇଯାଇ ଥିବାବେଳେ ଶୌଭାଗ୍ୟବଶତଃ ଏଥିରେ କୌଣସି ଜୀବନହାନୀ ଘଟିନାହିଁ। ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଛନ୍ତି। ସର୍ଟ ସର୍କିଟ ରୁ ଏହା ଘଟିଥିବା ସନ୍ଦେହ କରାଯାଉଛି ।
ସୂଚନା ଅନୁଯାୟୀ, ଜଳିଯାଇଥିବା ସୋ’ରୁମଟି ଚେନ୍ନାଇ-କୋଲକାତା ଜାତୀୟ ରାଜପଥ ପାର୍ଶ୍ବରେ ଥିବା କେପି ନଗରରେ ଥିଲା ଓ ସେଥିରେ ଟିଭିଏସ କମ୍ପାନିର ପେଟ୍ରୋଲ ଓ ଇଲେକ୍ଟ୍ରିକ୍ ବାଇକ୍ ଓ ସ୍କୁଟର ଥିଲା । ସୋ’ରୁମ୍ ର ପ୍ରଥମ ମହଲାରୁ ନିଆଁ ଆରମ୍ଭ ହୋଇ ନିକଟସ୍ଥ ଗୋଦାମକୁ ବ୍ୟାପିଯାଇଥିଲା। ସୁରକ୍ଷାକର୍ମୀମାନେ ଅଗ୍ନିଶମ ବିଭାଗକୁ ଖବର ଦେବା ପରେ ୫ଟି ଦମକଳ ଗାଡ଼ି ଘଟଣାସ୍ଥଳରେ ପହଞ୍ଚିଥିଲେ। ତେବେ ଦମକଳ ବାହିନୀ ପହଞ୍ଚିବାବେଳକୁ ନିଆଁ ସମଗ୍ର ସୋ’ରୁମ ଓ ଗୋଦାମକୁ କବଳିତ କରିସାରିଥିଲା ।
ନିଆଁକୁ ଆୟତ୍ତ କରିବା ପାଇଁ ଘଣ୍ଟାଏରୁ ଦେଢ ଘଣ୍ଟା ସମୟ ଲାଗି ଯାଇଥିଲା। ଶୋ' ରୁମରେ ଥିବା 1000 ବାଇକ୍ ମଧ୍ୟରୁ ପ୍ରାୟ 400 ବାଇକ୍ ପୋଡି ନଷ୍ଟ ହୋଇଯାଇଛି।
Powered by Froala Editor
