ଭୁବନେଶ୍ବର: ଜମି କାଗଜପତ୍ରରେ ଜାଲିଆତି କରି ଲକ୍ଷାଧିକ ଟଙ୍କା ଠକେଇ ଘଟଣାରେ କ୍ରାଇମ୍‌ବ୍ରାଞ୍ଚ ଅର୍ଥନୈତିକ ଅପରାଧ ଶାଖା(ଇଓଡବ୍ଲୁ) ଆଉ ଜଣେ ଠକକୁ ଗିରଫ କରିଛି। ସେ ହେଲା ଖୋର୍ଦ୍ଧା ଜିଲ୍ଲା ପଲାହାଟ ଅଞ୍ଚଳର ଗୌର ପ୍ରସାଦ ମହାନ୍ତି। ଗତ ମାର୍ଚ୍ଚ ୫ ତାରିଖରେ ଏହି ଗୋଷ୍ଠୀର ମାଷ୍ଟରମାଇଣ୍ଡ କଟକ ଜିଲ୍ଲା ଆଠଗଡ଼ ମଞ୍ଜରିପଡା ଅଞ୍ଚଳର ଆଦିତ୍ୟ ସାହୁ ଓ ସହଯୋଗୀ ଜଗତସିଂହପୁର ଜିଲ୍ଲା ରାହାମା ଅଞ୍ଚଳର ସବିତା ଦାସକୁ ଗିରଫ କରାଯାଥିଲା। 

ସୂଚନା ମୁତାବକ, ଦୀର୍ଘଦିନ ହେବ ଆଦିତ୍ୟ, ସବିତା, ‌ଗୌର ଏବଂ ସେମାନଙ୍କ ସହଯୋଗୀ ମିଶି ଜମି ଜାଲିଆତି ଚଳାଇଥିଲେ। ପ୍ରକୃତ ଜମିମାଲିକ ନାମ, ଠିକଣା ଠାବ ପରେ ଜାଲିଆତି କରି ତାଙ୍କ ନାମରେ ଜାଲ୍‌ ଆଇଡି କାର୍ଡ ପ୍ରସ୍ତୁତ କରାଯାଉଥିଲା। ଏହାପରେ ସେମାନଙ୍କ ମଧ୍ୟରେ ଜମି କିଣାବିକା ହେଉଥିଲା। ପରେ ଲୋକଙ୍କୁ ଭୂଆଁ ବୁଲାଇ ନିଜକୁ ଜମି ମାଲିକ ଦର୍ଶାଉଥିଲେ। ଆଉ ଶସ୍ତାରେ ଜମି ଯୋଗାଇ ଦେବା ନାଁରେ ଲକ୍ଷ ଲକ୍ଷ ଟଙ୍କା ଲୁଟୁଥିଲେ। କିଛି ଦିନ ତଳେ ବାରଙ୍ଗର ବଚ୍ଛିପୁରର ରଙ୍ଗଲତା ସ୍ବାଇଁଙ୍କ ଜମିକୁ ଚଞ୍ଚକତା କରି ସବିତାଙ୍କ ନାମରେ କରାଯାଇଥିଲା।

ରଙ୍ଗଲତାଙ୍କ ଜାଲ୍‌ ଆଧାରକାର୍ଡ, ଭୋଟ ଆଇଡି ଆଦି ପ୍ରସ୍ତୁତ କରିଥିଲେ। ‌ସେଥିରେ ସବିତାଙ୍କ ଫଟୋକୁ ବ୍ୟବହାର କରାଯାଇଥିଲା। ୨କୋଟିର ଜମିକୁ ବିକ୍ରି ପାଇଁ ଶୈଳଶ୍ରୀବିହାର ଅଞ୍ଚଳର ସ୍ବସ୍ତିରଂଜନ ପାଣିଙ୍କ ସହ ଯୋଗାଯୋଗ କରିଥିଲେ। ସେ ସମସ୍ତ ପଟ୍ଟା, ପରିଚୟପତ୍ର ଯାଞ୍ଚ ପରେ ଜମି କିଣିବାକୁ ଡିଲ୍‌ ହୋଇଥିଲା। ସ୍ବସ୍ତିରଂଜନଙ୍କ ବିଶ୍ବାସ ଆସିବା ପରେ ସେ ଉଭୟଙ୍କୁ ଅଗ୍ରୀମ ୨୫ଲକ୍ଷ ଦେଇଥିଲେ। ଆର୍ଥିକ କାରବାର ପାଇଁ ଠକ ରଙ୍ଗଲତାଙ୍କ ନାମରେ ନିଜର ଫଟୋ, ପରିଚୟପତ୍ର ଦେଇ ବ୍ୟାଙ୍କରେ ଆକାଉଣ୍ଟ ଖୋଲିଥିଲେ। ତେବେ ଟଙ୍କା ନେବା ପରେ ଆଉ ଧରାଛୁଆଁ ଦେଇନଥିଲେ। ମୋବାଇଲ୍‌ ବନ୍ଦକରି ଦେଇଥିଲେ। ନା ଜମି ଦେଇଥିଲେ ନା ଟଙ୍କା ଫେରାଇଥିଲେ। 

Powered by Froala Editor