ଭୁବନେଶ୍ୱର :  ଦାରିଦ୍ର‌୍ୟ ହ୍ରାସରେ କଳାହାଣ୍ଡି ଜିଲ୍ଲା ସବୁଠାରୁ ଆଗରେ ଅଛି । ୫ ବର୍ଷ ତଳେ (୨୦୧୫-୧୬) ଜିଲ୍ଲାର ୪୭.୨୮% ଲୋକ ଦରିଦ୍ର ଥିଲେ । ସଦ୍ୟତମ ହିସାବ ହେଲା ମାତ୍ର ୧୯.୪% ଏବେ ଦରିଦ୍ର । ଅର୍ଥାତ ସାମଗ୍ରିକ ଦାରିଦ୍ର‌୍ୟରୁ ପାଖାପାଖି ୨୮% ଲୋକ ମୁକ୍ତ ହୋଇଛନ୍ତି । ରାଜ୍ୟର ଅନୁନ୍ନତ ଅଞ୍ଚଳ ଭାବେ ପରିଚିତ କେବିକେ ଜିଲ୍ଲା ସମୂହର ନବରଙ୍ଗପୁରରେ ୫ ବର୍ଷ ତଳେ ଯେତିକି ଦରିଦ୍ର ଥିଲେ ସେଥିରୁ ଅଧା ମୁକୁଳିଛନ୍ତି ଏ ତାଡ଼ନାରୁ । ୨୦୧୫-୧୬ରେ ଜିଲ୍ଲାର ୫୯.୩୨ ପ୍ରତିଶତ ଲୋକ ବହୁମୁଖୀ ଦରିଦ୍ର ଭାବେ ଗଣାଯାଉଥିଲେ । ଏବେ ଏ ହାର ୩୪.୪୫% । ଜିଲ୍ଲାର ପାଖାପାଖି ୨୬ ପ୍ରତିଶତ ଗରିବି ଶିକୁଳିରୁ ମୁକ୍ତ ହୋଇଛନ୍ତି । ସେହିଭଳି ବଲାଙ୍ଗୀରରେ ପ୍ରାୟ ୧୮%, ଦେବଗଡ଼ରେ ୨୧%, କନ୍ଧମାଳରେ ୧୯% ଓ କୋରାପୁଟରେ ୧୮% ଲୋକ ଦାରିଦ୍ର‌୍ୟରୁ ମୁକ୍ତି ପାଇଛନ୍ତି ।
   ନୀତି ଆୟୋଗ ପକ୍ଷରୁ ପ୍ରକାଶିତ ‘ଜାତୀୟ ବହୁମୁଖୀ ଦାରିଦ୍ର‌୍ୟ ସୂଚୀ’ ସମୀକ୍ଷା ରିପୋର୍ଟରେ ଏହି ତଥ୍ୟ ଦର୍ଶାଯାଇଛି । ଏଥିରେ କୁହାଯାଇଛି ଗତ ୫ ବର୍ଷରେ ଶିକ୍ଷା, ସ୍ୱାସ୍ଥ୍ୟ ସମେତ ଜୀବନ ଧାରଣର ମାନରେ ଉନ୍ନତି ଆସିଛି । ଦାରିଦ୍ର‌୍ୟ ମାପିବାକୁ ଯେଉଁ ମାନଦଣ୍ଡ ଗ୍ରହଣ କରାଯାଇଛି ସେଥିମଧ୍ୟରୁ ଶିକ୍ଷା, ସ୍ୱାସ୍ଥ୍ୟ ରହିଛି । ସ୍ୱାସ୍ଥ୍ୟରେ ପୋଷଣ, ମାତୃ ଓ ଶିଶୁ ମୃତ୍ୟୁହାର ହ୍ରାସକୁ ହିସାବକୁ ନିଆଯାଇଛି । ସେହିପରି ଜୀବନ ଧାରଣର ମାନ ଭିତରେ ବିଦ୍ୟୁତ୍‌, ବ୍ୟାଙ୍କ ସେବା, ଜାଳେଣି ଗ୍ୟାସ୍‌, ପରିମଳ, ପକ୍କାଘର ଆଦି ବିଚାରକୁ ନିଆଯାଇଛି । ଏହି ସମସ୍ତ ମାନଦଣ୍ଡରେ ଓଡ଼ିଶା ବେଶ ସଫଳତା ହାସଲ କରିଛି ।

୫ ବର୍ଷ ତଳେ ରାଜ୍ୟରେ ୬.୯୪% ଲୋକଙ୍କ ବ୍ୟାଙ୍କ ଆକାଉଣ୍ଟ ନ ଥିଲା । ଏବେ ଏ ହାର ୧ ପ୍ରତିଶତ ତଳକୁ ଖସିଛି । ଅର୍ଥାତ ରାଜ୍ୟ ଜନସଂଖ୍ୟାର ପ୍ରାୟ ୬% ଅର୍ଥାତ ୨୦ ଲକ୍ଷରୁ ଅଧିକ ଲୋକ ବ୍ୟାଙ୍କ ସେବା ସହ ଯୋଡି ହୋଇଛନ୍ତି । ୨୦୧୫-୧୬ରେ ରାଜ୍ୟର ୮.୯୩% ଲୋକ ବିଦ୍ୟୁତ୍‌ ସେବାରୁ ବଂଚିତ ଥିଲେ । ୫ ବର୍ଷରେ ଏହା ହ୍ରାସ ପାଇ ୧.୮୫%ରେ ପହଞ୍ଚଛି  । ସେହିପରି ୫ ବର୍ଷ ତଳେ ୨୫% ଲୋକଙ୍କ ମୁଣ୍ଡ ଉପରେ ଛାତ ଘର ନ ଥିଲା । ୧୩ ପ୍ରତିଶତରୁ ଅଧିକ ଖସିଛି ଏହି ବର୍ଗର ବଞ୍ଚିତଙ୍କ ହାର । ଏବେ ମାତ୍ର ୧୨% ଲୋକ ପକ୍କା ଘରରୁ ବଂଚିତ ଅଛନ୍ତି ।

ସେହିପରି ଜାଳେଣି ଗ୍ୟାସ୍‌ ବ୍ୟବହାର, ପରିମଳ ବା ଶୌଚାଳୟ ବ୍ୟବହାର ଆଦି କ୍ଷେତ୍ରରେ ଉଲ୍ଲେଖନୀୟ ଅଗ୍ରଗତି ହୋଇଛି । ୫ ବର୍ଷରେ ଓଡ଼ିଶାରେ ୬୨ ଲକ୍ଷ ୬୨ ହଜାର ଲୋକ ଦାରିଦ୍ର‌୍ୟମୁକ୍ତ ହୋଇଛନ୍ତି ବୋଲି ରିପୋର୍ଟରେ ଦର୍ଶାଯାଇଛି । ୨୦୧୫-୧୬ରେ ରାଜ୍ୟର ୨୯.୩୪% ଲୋକ ଦରିଦ୍ର ଥିଲା ବେଳେ ୨୦୧୯-୨୧ ବେଳକୁ ଏହା ୧୫.୮୬%କୁ କମିଯାଇଛି । ଏବେ ଗ୍ରାମୀଣ ଓଡ଼ିଶାରେ ୧୭.୭୨% ଓ ସହରାଞ୍ଚଳରେ ୫.୪୨% ଲୋକ ଦରିଦ୍ର ଅଛନ୍ତି । ରିପୋର୍ଟ କହୁଛି ଏବେ ବି ରାଜ୍ୟର ୫ଟି ଜିଲ୍ଲାରେ ଦାରିଦ୍ର‌୍ୟ ହାର ଉଦବେଗଜନକ ଅର୍ଥାତ ୩୦%ରୁ ଅଧିକ ରହିଛି । ମାଲକାନଗିରିରେ ୪୫% ଲୋକ ଏବେ ବି ଦରିଦ୍ର ।

Powered by Froala Editor