କମନ୍ ପିଜି ପ୍ରବେଶିକା ପରୀକ୍ଷା ଆଜି
ଭୁବନେଶ୍ୱର: ଗୁରୁବାର କମନ୍ ପିଜି ପ୍ରବେଶିକା ପରୀକ୍ଷା (ସିପିଇଟି) ଅନୁଷ୍ଠିତ ହେବ । ନିର୍ଦ୍ଧାରିତ ସମୟରେ ୩ଟି ସିଫ୍ଟରେ ପରୀକ୍ଷା ହେବ । ଉଚ୍ଚ ଶିକ୍ଷା ବିଭାଗର ଷ୍ଟେଟ୍ ସିଲେକ୍ସନ ବୋର୍ଡ ଦ୍ୱାରା ହେବାକୁ ଥିବା ପିଜି ପ୍ରବେଶିକା ପୂର୍ବ ନିର୍ଦ୍ଧାରିତ ସମୟରେ ଅନୁଷ୍ଠିତ ହେବ । ଏନେଇ ଉଚ୍ଚ ଶିକ୍ଷା ବିଭାଗ କମିଶନର ଅରବିନ୍ଦ ଅଗ୍ରୱାଲ ଜଣାଇଛନ୍ତି । ବିଭାଗ ପକ୍ଷରୁ ସମସ୍ତ ବିଶ୍ୱବିଦ୍ୟାଳୟର କୁଳପତି, ସମସ୍ତ ସରକାରୀ, ବେସରକାରୀ, ସରକାରୀ ଅନୁଦାନ ପ୍ରାପ୍ତ କଲେଜର ଅଧ୍ୟକ୍ଷଙ୍କୁ ଚିଠି କରାଯାଇଛି ।
ସୂଚନା ଯୋଗ୍ୟ, ପିଜି ନାମଲେଖା ପାଇଁ ରାଜ୍ୟରେ କମନ୍ ପିଜି ପ୍ରବେଶିକା ପରୀକ୍ଷା ଅନୁଷ୍ଠିତ ହେଉଛି । ଜୁନ୍ ୨୩ରୁ ଜୁଲାଇ ୪ ପର୍ୟ୍ୟନ୍ତ ରାଜ୍ୟର ବିଭିନ୍ନ ସ୍ଥାନରେ ପରୀକ୍ଷା କରାଯାଉଛି । ପ୍ରଥମ ସିଫ୍ଟରେ ଅର୍ଥାତ୍ ସକାଳ ୧୦ଟାରୁ ୧୧ଟା ମଧ୍ୟରେ ପବ୍ଲିକ୍ ଆଡମିନ୍ଷ୍ଟ୍ରେସନ୍ ପରୀକ୍ଷା ଅନୁଷ୍ଠିତ ହେବ । ଏଥିସହ ଦ୍ୱିତୀୟ ସିଫ୍ଟରେ ଅର୍ଥାତ୍ ମଧ୍ୟାହ୍ନ ୧୨ଟା ୩୦ରୁ ୧ଟା ୩୦ ପର୍ୟ୍ୟନ୍ତ କମ୍ପ୍ୟୁଟର ସାଇନ୍ସ ଓ ସୋସିଓଲୋଜି ଏବଂ ଅପରାହ୍ନ ୩ଟାରୁ ୪ଟା ପର୍ୟ୍ୟନ୍ତ ରାଜନୀତି ବିଜ୍ଞାନ ପାଇଁ ପ୍ରବେଶିକା ପରୀକ୍ଷା କରାଯିବ । ପୂର୍ବ ନିର୍ଦ୍ଧାରିତ ସମୟସୂଚୀରେ କୌଣସି ପରିବର୍ତ୍ତନ କରାଯାଇନାହିଁ । ରାଜ୍ୟର ୨୧ଟି ପରୀକ୍ଷା କେନ୍ଦ୍ର କରାଯାଇଛି । ପରୀକ୍ଷା କେନ୍ଦ୍ର ହୋଇଥିବା କଲେଜଗୁଡ଼ିକୁ ଖୋଲା ରଖିବାକୁ ବିବାଗ ପକ୍ଷରୁ ନିର୍ଦ୍ଦେଶ ଦିଆଯାଇଛି ।
Powered by Froala Editor
