କେନ୍ଦ୍ର ସରକାର ଧାନ, ହରଡ଼, ହରଡ଼ ସମେତ ଖରିଫ ଫସଲର ସର୍ବନିମ୍ନ ସହାୟକ ମୂଲ୍ୟ ବା ଏମଏସପି ବୃଦ୍ଧି କରିଛନ୍ତି ।  ୨୦୨୩-୨୪ ଆର୍ଥିକ ବର୍ଷରେ ଖରିଫ ଫସଲର ଏମଏସପି ବୃଦ୍ଧିକୁ ଅନୁମୋଦନ ଦେଇଛନ୍ତି ସରକାର । ଧାନ ଦର ୧୪୩ ଟଙ୍କା ବୃଦ୍ଧି କରିଛନ୍ତି । ଧାନ ଦର ୧୪୩ ଟଙ୍କା ବୃଦ୍ଧି ପରେ ଏ ଗ୍ରେଡ୍ ଧାନ କ୍ୱିଣ୍ଟାଲ୍ ପିଛା ଚାଷୀ ୨୨୦୩ ଟଙ୍କା ପାଇବେ । ସେହିଭଳି ଅନ୍ୟ ଧାନ ବିକ୍ରି କଲେ କ୍ୱିଣ୍ଟାଲ ପିଛା ଚାଷୀଙ୍କୁ ମିଳିବ ୨୧୮୩ ଟଙ୍କା ।

ସେହିଭଳି କେନ୍ଦ୍ର ସରକାର ମାଣ୍ଡିଆର ସର୍ବନିମ୍ନ ସହାୟକ ମୂଲ୍ୟ ୨୬୮ ଟଙ୍କା ବୃଦ୍ଧି କରିଛନ୍ତି । ଫଳରେ ଚାଷୀ ଗୋଟିଏ କ୍ୱିଣ୍ଟାଲ୍ ମାଣ୍ଡିଆ ବିକ୍ରି କଲେ ୩ ହଜାର ୮୪୬ ଟଙ୍କ ପାଇବେ । ହରଡ଼ର ଏମଏସପି ୪୦୦ ଟଙ୍କା ବଢ଼ିଥିବା ବେଳେ ମୁଗର ଏମଏସପି ୮୦୩ ଟଙ୍କା, ବାଦାମର ଏମଏସପି ୫୨୭ ଟଙ୍କା, ବିରିର ଏମଏସପି ୩୫୦ ଟଙ୍କା ବୃ୍ଦ୍ଧି କରିଛନ୍ତି । ଏମଏସପି ବୃଦ୍ଧି ପରେ ଚାଷୀ ହରଡ଼ କ୍ୱିଣ୍ଟାଲ୍ ପିଛା ୭ ହଜାର ଟଙ୍କା, ମୁଗ ୮ ହଜାର ୫୫୮ ଟଙ୍କା, ବିରି ୬ ହଜାର ୯୫୦ ଟଙ୍କା, ବାଦାମ ୬ ହଜାର ୩୭୭ ଟଙ୍କାରେ ବିକ୍ରି କରିବେ ।

ବୁଧବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷକାରେ ବସିଥିବା କେନ୍ଦ୍ର କ୍ୟାବିନେଟର ବୈଠକରେ ଏହି ପ୍ରସ୍ତାବକୁ ଅନୁମୋଦନ ମିଳିଛି । ଏହି ନିଷ୍ପତ୍ତି ପରେ କେନ୍ଦ୍ରମନ୍ତ୍ରୀ ପୀୟୂଷ ଗୋୟଲ ଗଣମାଧ୍ୟମକୁ କହିଛନ୍ତି ଯେ କୃଷକଙ୍କ ସ୍ୱାର୍ଥକୁ ଦୃଷ୍ଟିରେ ରଖି ସରକାର ଏହି ନିଷ୍ପତ୍ତି ନେଇଛନ୍ତି। 

Powered by Froala Editor