ଲଗାତାର ଦୁର୍ଘଟଣା ପରେ ବାୟୁସେନାର ଘୋଷଣା : ଉଡ଼ିବନି ମିଗ୍-୨୧
ରାଜସ୍ଥାନରେ ମିଗ୍-୨୧ ବିମାନ ଦୁର୍ଘଟଣାଗ୍ରସ୍ତ ହେବାର ଦୁଇ ସପ୍ତାହ ପରେ ଭାରତୀୟ ବାୟୁସେନା ଏହି ବିମାନର ପୁରୁଣା ଫ୍ଲିଟ୍ର ଉଡାଣ ବନ୍ଦ କରିବାକୁ ନିଷ୍ପତ୍ତି ନେଇଛି। ଲଗାତାର ଦୁର୍ଘଟଣା ଘଟୁଥିବାରୁ ବାୟୁସେନା ମିଗ୍-୨୧ର ସମଗ୍ର ସ୍କ୍ବାଡ୍ରନର ଉଡ଼ାଣକୁ ବନ୍ଦ କରିବାକୁ ନିଷ୍ପତ୍ତି ନେଇଛନ୍ତି। ମେ’ ୮ରେ ହୋଇଥିବା ଦୁର୍ଘଟଣାର ତଦନ୍ତ ଏବେ ଜାରି ରହିଥିବା ବେଳେ ମିଗ୍-୨୧ ଲଢ଼ୁଆ ବିମାନର ପୂରା ଫ୍ଲିଟ୍କୁ ଗ୍ରାଉଣ୍ଡ୍ କରି ଦିଆଯାଇଛି ବୋଲି ଶୀର୍ଷ ସରକାରୀ ସୂତ୍ରରୁ ଜଣାପଡ଼ିଛି।
ମିଗ -୨୧ ଯୁଦ୍ଧ ବିମାନକୁ ୧୯୬୦ ଦଶକରେ ପୂର୍ବର ସୋଭିଏ ୟୁନିଅନ (ବର୍ତ୍ତମାନ ରୁଷିଆ) ରୁ କିଣାଯାଇଥିଲା। ଏହି ଯୁଦ୍ଧ ବିମାନକୁ ରୁଷିଆ ୧୯୮୫ରେ ଅବସର ଦେଇଛି। କିନ୍ତୁ ଏହି ଜାହାଜଗୁଡ଼ିକ ଭାରତୀୟ ସେନାରେ ବ୍ୟବହୃତ ହେଉଛି। ଏହି ଜାହାଜର ବିଶେଷତ୍ୱ ହେଉଛି, ଯଦି ଏହାକୁ ଅତ୍ୟଧିକ ଯତ୍ନ ଏବଂ ବୁଝାମଣା ସହିତ ଉଡ଼ାଯାଏ ତେବେ ଏହା କଦାପି ପ୍ରତାରଣା କରେ ନାହିଁ। ୧୯୭୧ ଯୁଦ୍ଧରେ ଏହି ସୁପରସୋନିକ ଜାହାଜର ଆକ୍ରମଣରେ ଶତ୍ରୁ କମ୍ପିତ ହୋଇଥିଲା। ମିଗ -୨୧ ହିଁ ଢାକାରେ ରାଜ୍ୟପାଳଙ୍କ ବାସଭବନରେ ଆକ୍ରମଣ କରିଥିଲା। ଏହା ବ୍ୟତୀତ ୧୯୬୫ ଏବଂ ୧୯୯୯ ପାକିସ୍ତାନ ଯୁଦ୍ଧରେ ଏହା ନିଜର ଶକ୍ତିକୁ ପ୍ରମାଣିତ କରିଥିଲା।
ବର୍ତ୍ତମାନ ଭାରତୀୟ ବାୟୁସେନା ପାଖରେ ୩ଟି ମିଗ୍-୨୧ ସ୍କ୍ବାଡନ୍ ଥିବା ବେଳେ ମୋଟ ୫୦ଟି ବିମାନ ରହିଛି। ଅବଶିଷ୍ଟ ମିଗ୍-୨୧ ଲଢୁଆ ସ୍କ୍ବାଡନକୁ ପର୍ଯ୍ୟାୟକ୍ରମେ ହଟାଇବା ପାଇଁ ଭାରତୀୟ ବାୟୁସେନା ଗତବର୍ଷ ତିନି ବର୍ଷର ସମୟସୀମା ଚୂଡ଼ାନ୍ତ କରିଥିଲା। ମିଗ୍-୨୧ ବିମାନ ବାହିନୀକୁ ପର୍ଯ୍ୟାୟକ୍ରମେ ବନ୍ଦ କରିବାର ଯୋଜନା ବାୟୁସେନାର ଆଧୁନିକୀକରଣ ଅଭିଯାନର ଏକ ଅଂଶବିଶେଷ ଥିଲା।
Powered by Froala Editor
