୮୯ ବର୍ଷରେ ମହାତ୍ମା ଗାନ୍ଧିଙ୍କ ନାତି ଅରୁଣ ମଣିଲାଲ ଗାନ୍ଧିଙ୍କ ପରଲୋକ
![୮୯ ବର୍ଷରେ ମହାତ୍ମା ଗାନ୍ଧିଙ୍କ ନାତି ଅରୁଣ ମଣିଲାଲ ଗାନ୍ଧିଙ୍କ ପରଲୋକ](https://odishanewslens.com/news_gallery/21267_1683048430.gif)
ରାଷ୍ଟ୍ରପିତା ମହାତ୍ମା ଗାନ୍ଧିଙ୍କ ନାତି ତଥା ସାମାଜିକ- ରାଜନୈତିକ କାର୍ଯ୍ୟକର୍ତ୍ତା ଅରୁଣ ମଣିଲାଲ ଗାନ୍ଧିଙ୍କର ମଙ୍ଗଳବାର ପରଲୋକ ଘଟିଛି। ଆଜି କୋଲହାପୁରରେ ସେ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ୧୯୩୪ରେ ଦକ୍ଷିଣ ଆଫ୍ରିକାର ଡର୍ବାନରେ ଜନ୍ମ ଗ୍ରହଣ କରିଥିବା ଅରୁଣଙ୍କୁ ମୃତ୍ୟୁ ବେଳକୁ ୮୯ ବର୍ଷ ବୟସ ହୋଇଥିଲା। ଅରୁଣ ଗାନ୍ଧିଙ୍କ ପୁଅ ତୁଷାର ଗାନ୍ଧି ମଙ୍ଗଳବାର ଟୁଇଟ କରି ଏହି ଦୁଃଖଦ ଖବରର ସୂଚନା ଦେଇଛନ୍ତି।
ଅରୁଣ ଗାନ୍ଧି ମହାତ୍ମା ଗାନ୍ଧିଙ୍କ ଦ୍ବିତୀୟ ପୁତ୍ର ମଣିଲାଲ ଗାନ୍ଧିଙ୍କ ପୁତ୍ର ଥିଲେ। ତେବେ ଅରୁଣ ଗାନ୍ଧି ଦୀର୍ଘଦିନ ହେବ ଅସୁସ୍ଥ ଥିଲେ। ସେ ଜଣେ ଲେଖକ ଭାବେ ବେଶ ଖ୍ୟାତି ଅର୍ଜନ କରିଥିଲେ। ଫେବୃଆରୀ ୨୮ରେ ଅରୁଣ ଗାନ୍ଧି କୋଲହାପୁର ଆସିଥିଲେ। ଏଠାରେ ଥିବା ଅବନୀ ସଂସ୍ଥାନରେ ସେ କିଛି ଦିନ ରହିବାର ଥିଲା। ଆଜି ସକାଳେ ସେଠାରେ ଥିବା ବେଳେ ଅରୁଣ ଗାନ୍ଧିଙ୍କ ଦେହାନ୍ତ ହୋଇଛି।
ସାମାଜିକ କର୍ମୀ ଅନୁରାଧା ଭୋସଲେଙ୍କ ଦ୍ୱାରା ପରିଚାଳିତ ଅବନୀ ସଂସ୍ଥାକୁ ବିଗତ ୨୪ ବର୍ଷ ହେଲାଣି ଅରୁଣ ଗାନ୍ଧି ନିୟମିତ ଆସୁଥିଲେ। ଏହି ସଂଗଠନ ବାସହୀନ ଝିଅ ଓ ମହିଳାଙ୍କ ସୁରକ୍ଷା ଉପରେ କାମ କରେ।
Powered by Froala Editor