ଆପଣ ଜାଣିଛନ୍ତି କି ମହା ପ୍ରତାପି ରାଜା ଆଲେକଜାଣ୍ଡାର ଯିଏକି ଦିନେ ସମଗ୍ର ଭାରତବର୍ଷ ଅଧିକାର କରିଥିଲେ ତାଙ୍କର ବଂଶଧର ଏବେ ବି ଜୀବିତ । ସେମାନେ ଭାରତର ହିମାଚଳ ପ୍ରଦେଶର ଛୋଟ ଗାଁ ମଲାନାରେ ବାସ କରନ୍ତି । ପର୍ଯ୍ୟଟକଙ୍କ ପାଇଁ ଏହି ଗାଁ ବେଶ୍ ଲୋକପ୍ରିୟ । ଏହି ଗାଁର ଜନସଂଖ୍ୟା ହେଉଛି ପ୍ରାୟ ୧୭୦୦ । ମଲାନା ଗାଁ ପର୍ଯ୍ୟନ୍ତ ପହଞ୍ଚିବା ବେଶ୍ କଷ୍ଟସାଧ୍ୟ । କାରଣ ଏହି ଗାଁକୁ ଯିବା ପାଇଁ ଏବେ ମଧ୍ୟ ସଡକ ତିଆରି ହୋଇପାରିନାହିଁ । ପାହାଡ଼ ଚଢି ଏହି ଗାଁରେ ପହଞ୍ଚିବାକୁ ହୋଇଥାଏ । 

ଏହି ଗାଁକୁ ନେଇ ଅନେକ ମଜାଦାର କାହାଣୀ ଶୁଣିବାକୁ ମିଳେ । ଏଠାକାର ଲୋକମାନେ ନିଜକୁ ଗ୍ରୀକ୍ ବୀର ଆଲେକଜାଣ୍ଡାରଙ୍କ ବଂଶଧର ବୋଲି କହିଥାନ୍ତି । କୁହାଯାଏ ଯେତେବେଳେ ଆଲେକଜାଣ୍ଡାର ଭାରତ ଆକ୍ରମଣ କରିଥିଲେ ସେତେବେଳେ ତାଙ୍କର କିଛି ସୈନିକ ଏହି ମଲାନା ଗାଁରେ ଆଶ୍ରୟ ନେଇଥିଲେ । ତା’ପରେ ସେମାନେ ଆଉ ଗ୍ରୀକ୍ ନ ଫେରି ସେହି ସ୍ଥାନରେ ବସବାସ କରିଥିଲେ । ସେଥିପାଇଁ ଏହି ଗାଁର ଲୋକମାନେ ଆଲେକଜାଣ୍ଡାରଙ୍କବଂଶଧର ବୋଲି ଦାବି କରିଥାନ୍ତି । ଆଲେକଜାଣ୍ଡାରଙ୍କ ସମୟର ଅନେକ ଜିନିଷ ଏହି ଗାଁରୁ ମିଳିଛି । କୁହାଯାଏ ଆଲେକଜାଣ୍ଡାରଙ୍କ ସମୟର ଏକ ଖଣ୍ଡା ଏହି ଗାଁର ମନ୍ଦିରରେ ରଖାଯାଇଛି । ତେବେ ଖୁବ୍ କମ୍ ଲୋକ ଏହା ଜଣନ୍ତି ଯେ, ଏହି ଗାଁର ଲୋକମାନେ ଏମିତି ଏକ ଭାଷାରେ କଥା ହୁଅନ୍ତି ଯାହାକୁ କେବଳ ସେହି ଗାଁର ଲୋକଙ୍କ ବ୍ୟତୀତ ଅନ୍ୟମାନେ ବୁଝିପାରନ୍ତି ନାହିଁ । ଗାଁର ଲୋକମାନେ ‘କନାଶି’ ଭାଷାରେ କଥା ହୋଇଥାନ୍ତି । ଏହି ଭାଷାକୁ ସେମାନେ ପବିତ୍ର ବୋଲି ବିଶ୍ୱାସ କରନ୍ତି । ଏହି ଭାଷାର ସ୍ୱତନ୍ତ୍ରତା ହେଉଛି ଏହା ମଲାନା ବ୍ୟତୀତ ଦୁନିଆର ଅନ୍ୟ କେଉଁଠି କୁହା ଯାଇନଥାଏ । ଏମିତିକି ଏହି ଭାଷାକୁ ବାହାରୁ ଆସୁଥିବା ଲୋକଙ୍କୁ ମଧ୍ୟ ଶିକ୍ଷା ଯାଇନଥାଏ । ଏହି ଭାଷାକୁ ନେଇ ଅନେକ ଦେଶରେ ଗବେଷଣା ଚାଲିଛି । ମଲାନାର ବୟସ୍କ ବ୍ୟକ୍ତିମାନେ ବାହାର ଲୋକଙ୍କ ସହିତ ହାତ ମଧ୍ୟ ମିଳାନ୍ତି ନାହିଁ । ଗାଁର ଲୋକମାନଙ୍କୁ ବାହାର ବ୍ୟକ୍ତିଙ୍କ ସହ କଥା ହେବା, ହାତ ମିଳାଇବା ଏବଂ ଆଲିଙ୍ଗନ କରିବା ପସନ୍ଦ ନୁହେଁ । ହେଲେ ବର୍ତ୍ତମାନର ପିଢି ଏହିସବୁ କଥା ମାନନ୍ତି ନାହିଁ । 

ଏହି ଗାଁର ଲୋକମାନଙ୍କ ବାହାଘର ମଧ୍ୟ ଗାଁ ଭିତରେ ହୋଇଥାଏ । ଯଦି କେହି ଗାଁ ବାହାରେ ବିବାହ କରେ ତେବେ ସେହି ବ୍ୟକ୍ତିକୁ ସମାଜରୁ ବାସନ୍ଦ କରି ଦିଆଯାଏ । ହେଲେ ଏମିତି ଘଟଣା ଏହି ଗାଁରେ ଖୁବ୍ କମ ଘଟିଥାଏ । ଏହି ସବୁ କାରଣରୁ ଏହି ମଲାନା ଗ୍ରାମ ଏକ ଭିନ୍ନ ପରିଚୟ ବହନ କରିଛି । 

Powered by Froala Editor