ନୂଆଦିଲ୍ଲୀ: ଏଣିକି ଦ୍ୱିତୀୟ ବିବାହ କଲେ ଆପଣ ୧୦ ବର୍ଷ କାରାଦଣ୍ଡ ଭୋଗିବେ । ଆସାମ ସରକାର ବହୁବିବାହ ବିରୋଧୀ ବିଲ୍ ଆଗତ କରିଛନ୍ତି ଯେଉଁଥିରେ ଦ୍ୱିତୀୟ ବିବାହ ପାଇଁ ୧୦ବର୍ଷ ପର୍ଯ୍ୟନ୍ତ ଜେଲ୍ ବ୍ୟବସ୍ଥା ପ୍ରସ୍ତାବ କରିଛନ୍ତି । ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ମଙ୍ଗଳବାର ଦିନ ଆସାମ ବିଧାନସଭାରେ ଉପସ୍ଥାପିତ ଏକ ବହୁବିବାହ ବିରୋଧୀ ବିଲ୍ ଆଗତ କରିଛନ୍ତି ।  ଯେଉଁଥିରେ  ପ୍ରଥମ ବିବାହ ବୈଧ ଥିବା ପର୍ଯ୍ୟନ୍ତ ଦ୍ୱିତୀୟ ବିବାହ କରିବାରେ କିମ୍ବା ଲୁଚି ରହିବା ପାଇଁ ଜେଲ୍ ଏବଂ ଭାରୀ ଜରିମାନା ବ୍ୟବସ୍ଥା କରାଯାଇଛି । ଆସାମ ବହୁବିବାହ ନିଷେଧ ବିଲ୍ – ୨୦୨୫ ଅନୁସାରେ ବହୁବିବାହକୁ ଏକ ଅପରାଧରେ ଗଣାଯିବ , ଯେଉଁଥିରେ ସାତ ବର୍ଷ ପର୍ଯ୍ୟନ୍ତ ଜେଲ୍ ଏବଂ ଜରିମାନା ବ୍ୟବସ୍ଥା ରହିଛି, ଏବଂ ଯଦି ଜଣେ ବ୍ୟକ୍ତି ପୂର୍ବ ବିବାହକୁ ଲୁଚାଇ ରଖନ୍ତି ତେବେ ୧୦ ବର୍ଷ ପର୍ଯ୍ୟନ୍ତ ଜେଲ୍ ଦଣ୍ଡ ହୋଇପାରେ । ପୁନରାବୃତ୍ତି ଅପରାଧୀଙ୍କ ପାଇଁ ଦଣ୍ଡ ଦ୍ୱିଗୁଣିତ ହେବ ବୋଲି ଦର୍ଶାଯାଇଛି । କେବଳ ଷଷ୍ଠ ଅନୁସୂଚୀ ମାନଙ୍କୁ ଛାଡି ଦେଲେ, ଏହି ଆଇନ ସାରା ରାଜ୍ୟରେ ପ୍ରଯୁଜ୍ୟ ହେବ ଏବଂ ସମ୍ବିଧାନର ଧାରା ୩୪୨ ଅନୁଯାୟୀ ଅନୁସୂଚିତ ଜନଜାତିର ଲୋକମାନଙ୍କୁ ଏଥିରେ ଅନ୍ତର୍ଭୁକ୍ତ କରାଯିବ ନାହିଁ । ଆସାମରେ କିଛି ଜନଜାତି ପରମ୍ପରାଗତ ଆଇନ ଅନୁଯାୟୀ ବହୁବିବାହ କରନ୍ତି । ଏହି ବିଲ୍ , ବହୁବିବାହ ପ୍ରଥାକୁ ନିଷେଧ ବା ଦୂର କରିବା, ମହିଳାମାନଙ୍କୁ କଷ୍ଟରୁ ରକ୍ଷା କରିବା ଏବଂ ସମାଜକୁ ସୁବ୍ୟବସ୍ଥିତ କରିବା ଲକ୍ଷ୍ୟ ରଖିଛି । 

Powered by Froala Editor