ଟୁଲକିଟ୍ ମାମଲାରେ କଂଗ୍ରେସର ରାଜୀବ ଗୌଡା ଏବଂ ରୋହନ ଗୁପ୍ତାଙ୍କୁ ଦିଲ୍ଲୀ ପୁଲିସ ସମନ କରିଛି। ନୋଟିସ ମିଳିବା ପରେ ରାଜୀବ ଗୌଡ଼ା କହିଛନ୍ତି, ସେ ଛତିଶଗଡ଼ରେ ବିଜେପି ନେତାଙ୍କ ବିରୋଧରେ ମାମଲା ରୁଜୁ କରିଥିଲେ । ତେଣୁ ସେଠିକା ପୁଲିସ ସମନ କରିବାର ଥିଲା। 

ଏହା ପୂର୍ବରୁ ଟୁଲକିଟ୍ ମାମଲାରେ ବିଜେପି ନେତା ସମ୍ୱିତ ପାତ୍ର ଏବଂ ରମଣ ସିଂହଙ୍କୁ ସମନ କରିଛି ଛତିଶଗଡ଼ ପୁଲିସ। ସମ୍ୱିତ ପାତ୍ରଙ୍କୁ ରବିବାର ଭିଡିଓ କନଫରେନସିଂ ଜରିଆରେ ହାଜର ହେବାକୁ ଛତିଶଗଡ ପୁଲିସ କହିଥିଲା। ସେ କିନ୍ତୁ ହାଜର ହେବା ପାଇଁ ୭ ଦିନର ସମୟ ଲୋଡିଛନ୍ତି। ସେହିପରି ସୋମବାର ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ ଡାକ୍ତର ରମଣ ସିଂହଙ୍କ ବୟାନ ରେକର୍ଡ କରିଛି ପୁଲିସ। ରମଣ ସିଂହ ଛତିଶଗଡ ପୁଲିସକୁ ଲିଖିତ ଆକାରରେ ସମସ୍ତ ପ୍ରଶ୍ନର ଉତ୍ତର ଜଣାଇଛନ୍ତି। ଏହାପରେ ରମଣ ସିଂହ କହିଛନ୍ତି ଛତିଶଗଡରେ ପୁଲିସ ଶାସକ ଦଳ କଂଗ୍ରେସ ଦ୍ୱାରା ପରିଚାଳିତ ଆଇନ୍ ଦ୍ୱାରା ନୁହେଁ। ବିଜେପି ନେତାଙ୍କ ବିରୋଧରେ ଛତିଶଗଡର ଶାସକ ଦଳର ଏହା ଏକ ଷଡ଼ଯନ୍ତ୍ର ବୋଲି ସେ କହିଛନ୍ତି।

ସୂଚନାଯୋଗ୍ୟ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଭାବମୂର୍ତ୍ତି କ୍ଷୁର୍ଣ୍ଣ କରିବା ପାଇଁ ବିଜେପି ନେତା ସମ୍ୱିତ ପାତ୍ର କଂଗ୍ରେସର ଏକ ଟୁଲକିଟକୁ ଟ୍ୱିଟ୍ କରିଥିଲେ। ହେଲେ ଏହା ଜାଲ୍ ବୋଲି କଂଗ୍ରେସ କହିଥିଲା। ପରେ ଟ୍ୱିଟର ସମ୍ୱିତଙ୍କ ସେହି ଟ୍ୱିଟକୁ 'ମାନିପୁଲେଟଡ୍ ମିଡିଆ' ବୋଲି ଦର୍ଶାଇଛି। ବିଜେପି କହିଛି ସେଣ୍ଟ୍ରାଲ ଭିଷ୍ଟା ପ୍ରକଳ୍ପକୁ ମୋଦିଙ୍କ ଘର କହି କଂଗ୍ରେସ ଯେଉଁ ଖରାପ ଭାବମୂର୍ତ୍ତି ତିଆରି କରିବାକୁ ଷଡ଼ଯନ୍ତ୍ର କରିଥିଲା ତାର ମୁଖ୍ୟ ନାୟିକା ସୌମ୍ୟା ବର୍ମା। କଂଗ୍ରେସ ଯେଉଁ ଟୁଲକିଟ୍ ତିଆରି କରିଛି ଏହାର ମୁଖ୍ୟ ଲେଖକ ସୌମ୍ୟା।  ସେ କଂଗ୍ରେସ ସାଂସଦ ପ୍ରଫେସର ରାଜୀବ ଗୌଡ଼ାଙ୍କ କାର୍ଯ୍ୟାଳୟ ସହିତ ଜଡ଼ିତ ବୋଲି ବିଜେପି ଅଭିଯୋଗ କରିଛି । 

Powered by Froala Editor