ପ୍ରବଳ କୁହୁଡ଼ି, ଆଜି ୨୭୯ଟି ଟ୍ରେନ୍ ବାତିଲ
ନୂଆଦିଲ୍ଲୀ: ଉତ୍ତର ଭାରତରେ ପ୍ରବଳ କୁହୁଡ଼ି ଦେଖାଦେଇଛି । ଘନକୁହୁଡ଼ି ଯୋଗୁଁ ରେଳ ଓ ବିମାନ ଚଳାଚଳ ବାଧାପ୍ରାପ୍ତ ହୋଇଛି । ଖରାପ ପାଗକୁ ଦୃଷ୍ଟିରେ ରଖି ରେଳ ବିଭାଗ ପକ୍ଷରୁ ଆଜି ପାଇଁ ୨୭୯ଟି ଟ୍ରେନ୍ ବାତିଲ କରାଯାଇଛି । ସେହିପରି ୧୦୦ରୁ ଅଧିକ ବିମାନ ଉଡାଣରେ ବିଳମ୍ବ ହେବା ନେଇ ସୂଚନା ଦିଆଯାଇଛି ।
ଆଜି ସକାଳୁ ସକାଳୁ ଦିଲ୍ଲୀର ଏନସିଆର ସମେତ ଉତ୍ତରପ୍ରଦେଶ, ବିହାର, ହରିୟାଣା, ପଞ୍ଜାବ, ରାଜସ୍ଥାନରେ ପ୍ରବଳ ଥଣ୍ଡା ଅନୁଭୂତ ହେଉଛି । ତାହା ସହ ଘନକୁହୁଡ଼ି ମଧ୍ୟ ଲାଗି ରହିଥିବା ଦେଖିବାକୁ ମିଳିଛି । ଗତକାଲି ମଙ୍ଗଳବାର ମଧ୍ୟ ରାଜଧାନୀ ଦିଲ୍ଲୀର ଅନେକ ସ୍ଥାନରେ ଘନକୁହୁଡ଼ି ଲାଗି ରହିଥିଲା । ୫୦ମିଟର ଦୂରରୁ କିଛି ଦୃଶ୍ୟମାନ ହେଉନଥିଲା । ଏହି କାରଣରୁ ଦିଲ୍ଲୀରେ୧୫ଟି ଟ୍ରେନ୍ ବିଳମ୍ବରେ ଚାଲିଥିବାବେଳେ ଦୁଇଟି ଟ୍ରେନର ସମୟକୁ ପରିବର୍ତ୍ତନ କରାଯାଇଥିଲା ।
ସେହିପରି ଆଜି ମଧ୍ୟ ଦିଲ୍ଲୀରେ ପ୍ରବଳ ଥଣ୍ଡା ସହ ଘନକୁହୁଡ଼ି ହୋଇଛି । ଦିଲ୍ଲୀର ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦରରେ କୁହୁଡ଼ି ଯୋଗୁଁ ବିମାନ ଉଡାଣ ବାଧାପ୍ରାପ୍ତ ହୋଇଛି । ପ୍ରାୟ ୧୦୦ଟି ବିମାନ ଉଡ଼ାଣ ପ୍ରଭାବିତ ହୋଇଛି । ବିମାନବନ୍ଦର ଅଧିକାରୀଙ୍କ କହିବାନୁସାରେ, ମଙ୍ଗଳବାର ସକାଳେ ସ୍ପାଇସଜେଟ ଏବଂ ଇଣ୍ଡିଗୋର ଦୁଇଟି ବିମାନ ଜୟପୁରକୁ ପଠାଯାଇଥିଲା। ବର୍ତ୍ତମାନର ପାଗକୁ ଦୃଷ୍ଟିରେ ରଖି ପ୍ରଥମ ଥର ପାଇଁ ବିମାନଗୁଡ଼ିକୁ ଉଡାଣରେ ବାରଣ କରାଯାଇଛି ।
Powered by Froala Editor
