ନେପାଳରେ ବଡ ଧରଣର ଭୂ-କମ୍ପ ଅନୁଭୂତ ହୋଇଛି। ରେକ୍ଟର ସ୍କେଲରେ ଏହି ଭୂକମ୍ପର ତୀବ୍ରତା ୬.୩ ରହିଥିବା ବେଳେ ଏଥିଯୋଗୁ ଏଯାଏ ୬ ଜଣଙ୍କ ମୃତ୍ୟୁ ଘଟିଛି। ମୃତକମାନେ ହେଲେ ପଶ୍ଚିମ ନେପାଳର ଦୋତି ଜିଲ୍ଲାର ବୋଲି ମୁଖ୍ୟ ଜିଲ୍ଲା ଅଧିକାରୀ କଳ୍ପନା ଶ୍ରେଷ୍ଠ ପ୍ରକାଶ କରିଛନ୍ତି। ଏହି ଘଟଣାରେ ୫ଜଣ ଗୁରୁତର ହୋଇଛନ୍ତି। ସେମାନଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି। ଉକ୍ତ ଘଟଣାରେ ବିଭିନ୍ନ ସ୍ଥାନରେ ପ୍ରାୟ ୧୨ ଘର ଭୁଶୁଡ଼ି ପଡ଼ିଛି । ନେପାଳ ସେନା ଉକ୍ତ ଅଞ୍ଚଳରେ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛି।

ସେହିପରି ନେପାଳର ଭୂକମ୍ପର କେନ୍ଦ୍ରସ୍ଥଳ ଥିଲା ବେଳେ ଏହାର ପ୍ରଭାବ ଦିଲ୍ଲୀ ଓ ଆଖପାଖ ଅଞ୍ଚଳରେ ମଧ୍ୟ ଅନୁଭୂତ ହୋଇଛି। ରାତି ପ୍ରାୟ ୨ଟା ବେଳେ ରାଜଧାନୀବାସୀ ଭୂକମ୍ପର ଝଟକା ଅନୁଭବ କରିଥିବା ରିପୋର୍ଟ ପ୍ରକାଶ ପାଇଛି।

ରିପୋର୍ଟ ଅନୁସାରେ, ଭୂକମ୍ପର କେନ୍ଦ୍ରସ୍ଥଳ ଭୂପୃଷ୍ଠ ଠାରୁ ୧୦ କିମି ଗଭୀରରେ ରହିଛି। ଉତ୍ତରାଖଣ୍ଡର ପିଥୋରଗଡ଼ ଠାରୁ ପୂର୍ବ ଦିଗର ୯୦ କିମି ଦୂର ନେପାଳ ସୀମାନ୍ତରେ ଭୂକମ୍ପର କେନ୍ଦ୍ରସ୍ଥଳ ରହିଛି। ଭାରତୀୟ ସମୟ ରାତି ୧.୫୭ ମିନିଟ ୨୪ ସେକେଣ୍ଡରେ ନେପାଳରେ ଭୂକମ୍ପ ଝଟକା ଅନୁଭବ କରିଛନ୍ତି। ତେବେ ଗତ ଦୁଇଦିନ ଭିତରେ ଏହା ଥିଲା ତୃତୀୟ ଭୂ-କମ୍ପ। ମଙ୍ଗଳବାର ଦୁଇଥର ହୋଇଥିଲା। ଭାରତରେ ଏହାର ତୀବ୍ରତା ସେତେ ନଥିଲେ ବି ଲୋ‌କଙ୍କ ମନରେ ଭୟ ସଂଚରି ଯାଇଥିଲା।

Powered by Froala Editor