ନୂଆଦିଲ୍ଲୀ : ଅକ୍ଷୟ ତୃତୀୟାରେ ସୁନା କିଣିଲେ ଘରକୁ ଲକ୍ଷ୍ମୀ ଆସନ୍ତି ବୋଲି ଭାରତୀୟମାନଙ୍କ ବିଶ୍ୱାସ ରହିଛି । ଏହି ଦିନ ସୁନାର ଚାହିଦା ବହୁତ ବଢ଼ିଯାଇଥାଏ । ଗ୍ରାହକମାନଙ୍କ ଚାହିଦା ପୂରଣ କରିବା ଲାଗି ସୁନା ଦୋକାନୀମାନେ ମଧ୍ୟ ନିଜ ଆଡ଼ୁ ସବୁ ପ୍ରକାର ପ୍ରସ୍ତୁତି କରିଥାନ୍ତି । ଚଳିତ ବର୍ଷ କରୋନା ମହାମାରୀ ପ୍ରଭାବ ଯୋଗୁଁ ବିଭିନ୍ନ ରାଜ୍ୟରେ ଲକଡାଉନ ଘୋଷଣା କରାଯାଇଥିବାରୁ ସୁନା କାରବାର ପ୍ରଭାବିତ ହୋଇଛି । ତେବେ ଷ୍ଟୋର ପରିଦର୍ଶନ କରିବାକୁ ଚାହୁନଥିବା ଗ୍ରାହକମାନେ ଚାହିଲେ ଅନଲାଇନରେ ଡିଜିଟାଲ ସୁନା କିଣିପାରିବେ । ଦେଶର କିଛି ସ୍ୱତନ୍ତ୍ର ପ୍ରତିଷ୍ଠାନ ଏହି ସୁବିଧା ପ୍ରଦାନ କରୁଛନ୍ତି । ଗ୍ରାହକମାନେ ପେଟିଏମ୍, ଆମାଜନ୍ ପେ’, ଗୁଗୁଲ୍ ପେ’ ଓ ଫୋନ ପେ’ ଜରିଆରେ ଡିଜିଟାଲ୍ ଗୋଲ୍ଡ ମଧ୍ୟ କିଣିପାରିବେ ।
ଅନଲାଇନରେ ସୁନା କିଣିବା ବେଳେ ଗ୍ରାହକମାନଙ୍କୁ ସୁନାର ଶୁଦ୍ଧତା ପ୍ରତି ଧ୍ୟାନ ଦେବାକୁ ପଡ଼ିବ । ଡିଜିଟାଲ ଗୋଲ୍ଡକୁ ଲୋକମାନେ ୧ ଟଙ୍କା ଭଳି କମ୍ ମୂଲ୍ୟରେ କିଣିପାରିବେ । ଏହା କୌଣସି ପ୍ରତ୍ୟକ୍ଷ ସୁନା ନୁହେଁ । ବରଂ ସୁନା ମୂଲ୍ୟ ଅନୁସାରେ ଡିଜିଟାଲ ଭାବେ ସଂରକ୍ଷିତ ରହିପାରୁଥିବା ୟୁନିଟ । ଡିଜିଟାଲ୍ ଗୋଲ୍ଡକୁ ୱାଲେଟ ଭିତରେ ରଖାଯାଉଛି । ଗ୍ରାହକଙ୍କ ପାଖରେ କେତେ ଗ୍ରାମ ସୁନା ରହିଛି ତାହା ୱାଲେଟ ଜଣାଇ ଦେଉଛି । ଗ୍ରାହକମାନେ ତାହାକୁ ବଦଳାଇ ଅସଲି ସୁନା ନେଇପାରିବେ ଅନ୍ୟଥା ଆପ୍ଲିକେସନ୍ ଜରିଆରେ ବିକ୍ରି ମଧ୍ୟ କରିପାରିବେ । ସାଧାରଣ ସୁନା ଭଳି ଡିଜିଟାଲ ଗୋଲ୍ଡ କିଣିବା ବେଳେ ମଧ୍ୟ ୩% ଜିଏସଟି ଗଣିବାକୁ ପଡ଼ିବ । ଡିଜିଟାଲ ଗୋଲ୍ଡ ବିକ୍ରି କରୁଥିବା ସଂସ୍ଥାଗୁଡ଼ିକ ମଧ୍ୟ ଷ୍ଟୋରେଜ ଖର୍ଚ୍ଚ, ବୀମା ଏବଂ ଟ୍ରଷ୍ଟି ଫି’ ବାବଦରେ ୨-୩ ପ୍ରତିଶତ ଶୁଳ୍କ ନେଉଛନ୍ତି । ଯେଉଁ ଗ୍ରାହକମାନେ ଡିଜିଟାଲ ଗୋଲ୍ଡ ବଦଳରେ ଅସଲି ସୁନା ନେବାକୁ ଚାହୁଛନ୍ତି ସେମାନଙ୍କୁ ଗଢ଼ା ମୂଲ୍ୟ ଦେବାକୁ ପଡ଼ିବ । ହୋମ୍ ଡେଲିଭରି ଚାହିଲେ ସେଥିପାଇଁ ଆଉ କିଛି ଟଙ୍କା ଅଧିକ ଗଣିବାକୁ ପଡ଼ିପାରେ । ଡିଜିଟାଲ ଗୋଲ୍ଡ କିଣିବାକୁ ଚାହୁଥିବା ଲୋକମାନେ ଏହା ଜାଣିବା ଦରକାର ଯେ ସେହି ସୁନାକୁ ସେମାନେ କିିଛି ବର୍ଷ ପର୍ଯ୍ୟନ୍ତ ସେହିଭଳି ରଖିପାରିବେ । ତାହାକୁ ହୋଲଡିଂ ପିରିୟଡ କୁହାଯାଉଛି । ଏହି ଅବଧି ଶେଷ ହେବା ପରେ ଡିଜିଟାଲ ଗୋଲ୍ଡକୁ ବିକ୍ରି କରିବାକୁ ହେବ ଅନ୍ୟଥା ଗୋଲ୍ଡ କଏନରେ ପରିଣତ କରିବାକୁ ପଡ଼ିବ । କମ ସମୟ ପାଇଁ ଡିଜିଟାଲ ଗୋଲ୍ଡ ରଖିଲେ ତାହା ଉପରେ ଯେଉଁ ରିଟର୍ଣ୍ଣ ମିଳିବ ସେଥିରେ ଟିକସ ଲାଗିନପାରେ । କିନ୍ତୁ ଅଧିକ ବର୍ଷ ପର୍ଯ୍ୟନ୍ତ ରଖିଲେ ସେଥିରୁ ଯେଉଁ ରିଟର୍ଣ୍ଣ ମିଳିବ ତାହା ଉପରେ ଦୀର୍ଘମିଆଦୀ ପୁଞ୍ଜି ଲାଭ ଟିକସ ଓ ୪% ସେସ ଲାଗିବ ।

Powered by Froala Editor