ନାଗ ସହ ସେଲ୍ଫି ମହଙ୍ଗା ପଡିଲା, ଜୀବନ ହାରିଲେ ଯୁବକ
ବିଷାକ୍ତ ସାପ ସହ ସେଲ୍ଫି ନେଇ ଜୀବନ ହାରିଛନ୍ତି ଜଣେ ଯୁବକ । ଏହି ଅଘଟଣ ଘଟିଛି ମାଲକାନଗିରି ଥାନା ଗଙ୍ଗଲା ଗାଁରେ। ମୃତକ ଜଣକ ଏହି ଗାଁର ଅଜୟ ପାଟଲା। ସ୍ଥାନୀୟ ଲୋକେ ତାଙ୍କୁ ତୁରନ୍ତ ମେଡିକାଲ ନନେଇ ଗୁଣିଆ ନିକଟରେ ଝଡ଼ାଫୁଙ୍କା କରାଇଥିଲେ। ଫଳରେ କିଛି ସମୟ ପରେ ଅଜୟଙ୍କ ମୃତ୍ୟୁ ହୋଇଯାଇଥିଲା। ଏହି ଘଟଣା ସ୍ଥାନୀୟ ଗ୍ରାମରେ ଶୋକର ଛାୟା ଖେଳାଇ ଦେଇଛି।
ସୂଚନା ଯେ, ଗାଁର ଜଣେ ବ୍ୟକ୍ତିଙ୍କ ଘରେ ଏକ ବିଷଧର ନାଗ ସାପ ପଶି ଯାଇଥିଲା। ଖବର ପାଇ ସହାୟତା କରିବାକୁ ଅଜୟ ପହଞ୍ଚି ଯାଇଥିଲେ। ସେ ଏହି ଘରୁ ନାଗ ସାପକୁ ଉଦ୍ଧାର କରିଥିଲେ। ହେଲେ କିଛି ସମୟ ସାପକୁ ଖେଳାଇବା ପରେ ସେଲ୍ଫି ନେଉଥିବା ବେଳେ ଅଜୟଙ୍କୁ ଚୋଟ ମାରିଥିଲା ନାଗ।
ତେବେ ବିଷଧର ପ୍ରାଣୀ କିମ୍ବା ଜୀବଜନ୍ତୁଙ୍କ ସହ ଖେଳିବା ଅପରାଧ ହୋଇଥିବାବେଳେ କିଛି ଲୋକ ଏହାକୁ ଖାଲଖିଆଲ ଭାବେ ନେଇଛନ୍ତି । ଏଥିପାଇଁ ବାରମ୍ବାର ସଚେତନ ବି କରାଯାଉଛି । ଏବେ ବନ୍ୟପ୍ରାଣୀ ସୁରକ୍ଷା ସପ୍ତାହ ମଧ୍ୟ ପାଳନ କରାଯାଉଛି । ତଥାପି ଲୋକେ ଚେତୁ ନାହାନ୍ତି । ଯାହାର ଫଳ ସ୍ୱରୂପ ଏଭଳି ଘଟଣାମାନ ଘଟୁଛି ।
Powered by Froala Editor
