ନୂଆଦିଲ୍ଲୀ: କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ତଥା ବିଜେପିର ବଡ ଚେହେରା ବି.ଏସ୍ ୟେଦୁରୁପ୍ପା ଏକ ବଡ଼ ଘୋଷଣା କରିଛନ୍ତି । ବିଧାୟକ ପଦ ଛାଡି ପୁଅ ବିଜୟନ୍ଦ୍ରଙ୍କ ପାଇଁ ଆସନ ଖାଲି କରୁଛନ୍ତି ବୋଲି ସେ କହିଛନ୍ତି । ଏଥି ସହ ୟେଦୁରୁପ୍ପା ଆସନ୍ତା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ ନାହିଁ ବୋଲି ଘୋଷଣା କରିଛନ୍ତି। ଶିକରିପୁରା ବିଧାନସଭା ନିର୍ବାଚନ ମଣ୍ଡଳୀବାସୀଙ୍କୁ ନିବେଦନ କରିଛନ୍ତି ପୂର୍ବତନ ମୁଖ୍ୟମନ୍ତ୍ରୀ । ସେ କହିଛନ୍ତି ଯେ ଲୋକମାନେ ତାଙ୍କ ପୁଅକୁ ସମର୍ଥନ କରନ୍ତୁ ।  ଫଳରେ ସେ ନିର୍ବାଚନରେ ଏକ ବଡ଼ ବିଜୟ ହାସଲ କରିପାରିବେ ।

ପୂର୍ବରୁ ହେଉଥିବା ଆଲୋଚନାକୁ ଖଣ୍ଡନ କରିଛନ୍ତି ୟେଦୁରୁପ୍ପା । ବିଜେପି ତାଙ୍କୁ ଦଳରୁ ଦୂରେଇ ରଖୁଥିବା କଥା ସାଧାରଣରେ ଚର୍ଚ୍ଚା ହେଉଥିଲା । ଏନେଇ ସେ ଗଣମାଧ୍ୟମ ଆଗରେ କହିଛନ୍ତି ଯେ ସେ ଦଳର ଜଣେ ଦାୟିତ୍ବବାନ ଶ୍ରମିକ । କଂଗ୍ରେସକୁ ରାଜ୍ୟରେ କ୍ଷମତାକୁ ଆସିବାକୁ ଦେବେ ନାହିଁ । ସେ କହିଛନ୍ତି ଯେ କଂଗ୍ରେସର ବରିଷ୍ଠ ନେତାଙ୍କ ମଧ୍ୟରେ ସମନ୍ୱୟର ଅଭାବ ରହିଛି ଏବଂ ଏହି କାରଣରୁ ଉଭୟ ସିଦ୍ଧରମୈୟା-ଡି.କେ ଶିବକୁମାର ମୁଖ୍ୟମନ୍ତ୍ରୀ ହେବା ପାଇଁ ନିଜ ମଧ୍ୟରେ ଲଢୁଛନ୍ତି । ୟେଦୁରୁପ୍ପା ଦାବି କରିଛନ୍ତି ଯେ ରାଜ୍ୟରେ ପୁଣିଥରେ ସରକାର ଗଠନ କରିବାକୁ ଯାଉଛନ୍ତି ।

Powered by Froala Editor