ନୂଆଦିଲ୍ଲୀ : ଜାପାନର ଟୋକିଓରେ ମଙ୍ଗଳବାର ବସିଛି କ୍ୱାଡ୍ ସମ୍ମିଳନୀ । କ୍ୱାଡ୍ ଦେଶ ସମୂହ ବୈଠକରେ ଯୋଗଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । କ୍ୱାଡର ଏହା ଚତୁର୍ଥ ବୈଠକ। ସମ୍ମିଳନୀରେ ଭାରତ -ପ୍ରଶାନ୍ତ ମହାସାଗର ଅଞ୍ଚଳରେ ଶାନ୍ତି, ସମୃଦ୍ଧି ଏବଂ ସ୍ଥିରତା ନେଇ ସକାରାତ୍ମକ ଏବଂ ଗଠନମୂଳକ ଏଜେଣ୍ଡା ଲାଗୁ କରିବା ନେଇ ଆଲୋଚନା ହୋଇଛି। ବିଶେଷଭାବେ ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ରରେ କେତେ ପ୍ରଗତି ହୋଇଛି ଏବଂ ଭବିଷ୍ୟତରେ କି କି ପଦକ୍ଷେପ ନିଆଯିବ ସେନେଇ ମଧ୍ୟ ଆଲୋଚନା ହୋଇଛି।

କ୍ୱାଡ୍ ସମ୍ମିଳନୀରେ ପ୍ରଧାନମନ୍ତ୍ରୀ କହିଛନ୍ତି ଯେ, କୋଭିଡ-୧୯ ଭଳି ବିପରୀତ ପରିସ୍ଥିତି ସତ୍ତ୍ୱେ ଭାରତ ଭାକସିନ୍ ବିତରଣ, ଜଳବାୟୁ, ବିପର୍ୟ୍ୟୟ ପରିଚାଳନା ଓ ଆର୍ଥିକ ସହଯୋଗ ଭଳି ପ୍ରସଙ୍ଗରେ ସମନ୍ୱୟ ରକ୍ଷା କରିଛି । କ୍ୱାଡରେ ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ରର ଶାନ୍ତି, ସମୃଦ୍ଧି ଓ ସ୍ଥିରତା ସୁନିଶ୍ଚିତ ଅଟେ ।  କୋଭିଡ୍-୧୯ର ଆତଙ୍କ ସତ୍ତ୍ୱେ କ୍ୱାଡର ଭୂମିକା ବ୍ୟାପକ ହୋଇଛି । ଆମେରିକା, ଅଷ୍ଟ୍ରେଲିଆ, ଜାପାନ ସମେତ କ୍ୱାଡର ଅନ୍ୟ ସଦସ୍ୟ ଦେଶ ବିଶ୍ୱର ବିଭିନ୍ନ ଗଣତାନ୍ତ୍ରିକ ଶକ୍ତିକୁ ନୂଆ ଜୋଶ ଓ ଶକ୍ତି ଦେଉଥିବା କ୍ୱାଡ୍ ସମ୍ମିଳନୀରେ କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ।

ଏହି ପରିପ୍ରେକ୍ଷୀରେ ମୋଦୀ ଅଷ୍ଟ୍ରେଲିଆର ନବ ନିର୍ବାଚିତ ପ୍ରଧାନମନ୍ତ୍ରୀ ଆନ୍ଥୋନୀ ଅଲବନୀଜଙ୍କୁ ଶୁଭେଚ୍ଛା ଜଣାଇଥିଲେ । ଏହାସହ କହିଥିଲେ ଯେ, ଶପଥ ନେବାର ୨୪ ଘଣ୍ଟାରେ ଆନ୍ଥୋନୀ ଏଠାରେ ଉପସ୍ଥିତ ହୋଇଛନ୍ତି । ଏହା କ୍ୱାଡ ବନ୍ଧୁତ୍ୱର ପ୍ରତୀକ । ଏହା କ୍ୱାଡ ପ୍ରତି ପ୍ରତିବଦ୍ଧତାକୁ ଦର୍ଶାଉଛି ।

Powered by Froala Editor