କେତେକ ପିଲା ଛୋଟ ବେଳୁ ଛୋଟ-ଛୋଟ କଥାରେ ଖୁବ୍‌ ରାଗିଯାଇଥାନ୍ତି । ସେମାନେ ନିଜ ପରିବାର ସହ ମଧ୍ୟ ଭଲରେ କଥାବାର୍ତ୍ତା କରି ନଥାନ୍ତି କିମ୍ବା ଭଲ ବ୍ୟବହାର ନ କରୁଥିବା ଦେଖିବାକୁ ମିଳିଥାଏ । ସେ ଛୋଟ ଛୋଟ କଥାରେ ଚିଡ୍‌ଚିଡା ବ୍ୟବହାର କରିଥାନ୍ତି । ପ୍ରାୟତଃ ପିଲା କିଛି ନୂଆ ଜିନିଷ ପାଇବା ଲୋଭରେ ରାଗ ପ୍ରକଟ କରିଥାନ୍ତି । ଏହିପରି ପିଲାଙ୍କ ରାଗ ପଛରେ ଅନେକ କାରଣ ରହିଛି, ତାହା ବ୍ୟବହାରିକ, ମାନସିକ ତଥା ଶାରିରୀକ ମଧ୍ୟ ହୋଇପାରେ । ତେବେ କାରଣ କ’ଣ ହୋଇପାରେ ଚାଲନ୍ତୁ ଜାଣିବା ବିଶେଷଜ୍ଞଠାରୁ

ଅନେକ ସମୟରେ ଅଭିଭାବକ ପିଲାଙ୍କ ରାଗକୁ ସେମାନଙ୍କ ଜିଦି ବୋଲି ଧରି ନେଇ ଅବହେଳା କରିଥାନ୍ତି । ଭଲ ଅଭିଭାବକ ଭାବେ ଆପଣ ଏମିତି କରିବା ଉଚିତ୍‌ ନୁହେଁ । ପିଲାର ରାଗ ପଛରେ ଥିବା କାରଣ ନ ଜାଣି ତାକୁ ଅବହେଳା କରିବା ଅନୁଚିତ୍‌ । କାରଣ ଏହା ପିଲାର ସ୍ୱାସ୍ଥ୍ୟ ଓ ମନ ଉପରେ ନକାରାତ୍ମକ ପ୍ରଭାବ ପକାଇପାରେ । ତେଣୁ ପ୍ରଥମେ ରାଗ ପଛର କାରଣ ଜାଣନ୍ତୁ । ତା’ ପରେ ପିଲାର ରାଗକୁ ନିୟନ୍ତ୍ରିତ କରିବା ପାଇଁ ବାଟ ବାହାର କରନ୍ତୁ ।

ପିଲାଙ୍କ ରାଗର କାରଣ ନିଜ କଥାକୁ ମନାଇବା ପିଲାମାନେ ଅଭିଭାବକଙ୍କୁ ନିଜକଥା ମନାଇବା ପାଇଁ ଅନେକ ପ୍ରକାରର ବାହାନା ଖୋଜିଥାନ୍ତି। ସେଥିପାଇଁ କେବେ କେବେ ରାଗିବା ସହ ନ ଖାଇବାର ଧମକ ଦେଇଥାନ୍ତି । କାରଣ ହେଲା ଏପରି କରିବା ଦ୍ୱାରା ଅଭିଭାବକ ସେମାନଙ୍କ ଜିଦି ମାନି ନେଇଥାନ୍ତି । ଏମିତି କେତେକ ସମୟରେ ରାଗିବା ଦ୍ୱାରା ଘରେ ବିଭିନ୍ନ ଜିନିଷ ଭଙ୍ଗାରୁଜା କରିବା ସହ ସ୍କୁଲ ମଧ୍ୟ ଯାଇ ନଥାନ୍ତି । ସେମାନେ ମୁଖ୍ୟତଃ କିଛି ନୂଆ ଜିନିଷ କିଣିବା, ବୁଲିବାକୁ ଯିବା ଓ ସାଙ୍ଗ ଘରକୁ ଯାଇ ଖେଳିବା ଆଦି ପାଇଁ ଜିଦି କରି ବସନ୍ତି ।

ଘର ପରିବର୍ତ୍ତନ କଲେ
କିଛି ପିଲା ପରିବର୍ତ୍ତନକୁ ସହଜରେ ସ୍ୱୀକାର କରି ପାରି ନଥାନ୍ତି । ଆପଣ ଅନେକ ସମୟରେ ଦେଖିଥିବା କିଛି ପିଲା ଘର ପରିବର୍ତ୍ତନ କିମ୍ବା ନୂଆ ଜାଗାକୁ ଗଲେ ସେଠାରେ ନୂଆ ସାଙ୍ଗସାଥୀ କରିବା କଷ୍ଟ ହୋଇଥାଏ । ଫଳରେ ସେମାନେ ନିଜ ପୁରୁଣା ସାଙ୍ଗମାନଙ୍କୁ ମିସ୍‌ କରିଥାନ୍ତି । ଏହି ସ୍ଥିତିରେ ସେମାନେ ଉଦାସ ରହିବା ସହ ବାପାମା’ଙ୍କ ଉପରେ ନିଜର ରାଗ ପ୍ରକଟ କରିଥାନ୍ତି । ଏହି ରାଗ ତାଙ୍କ ଭିତରେ ସାଙ୍ଗମାନଙ୍କୁ ଛାଡ଼ିବା ଓ ନୂଆ ଜାଗାକୁ ଯିବା ଯୋଗୁ ହୋଇଥାଏ । ଅବଶ୍ୟ ନୂଆ ଜାଗାରେ କିଛିଦିନ ଖାଇପଖୁଆଇ ନେବା ପରେ ସାଙ୍ଗସାଥୀ ମିଳିବା ଦ୍ୱାରା ସେମାନେ ଆପେ ଆପେ ଠିକ୍‌ ହୋଇଯାଇଥାନ୍ତି ।

ରାଗିବା ସ୍ୱଭାବ ବୟସ ବଢିବା ସହ ପିଲାଙ୍କ ଭିତରେ ବହୁ ପରିବର୍ତ୍ତନ ଆସିଥାଏ । ଅନେକ ସମୟରେ ପିଲାଙ୍କ ସ୍ୱଭାବରେ ପରିବର୍ତ୍ତନ ସାଙ୍ଗସାଥୀ, ପରିବେଶ ଓ ପାରିପାଶ୍ୱିର୍କ ପରିସ୍ଥିତି ଯୋଗୁ ହୋଇଥାଏ । ବିପରୀତ ପରିସ୍ଥିତି ଯୋଗୁ ସେମାନଙ୍କ ସ୍ୱଭାବରେ ଜିଦି ଓ ରାଗ ଆସିଥାଏ ।

ତାନ୍ତ୍ରିକ ତନ୍ତ୍ର ସମ୍ବନ୍ଧୀୟ ସମସ୍ୟା ଅନେକ ସମୟରେ ନ୍ୟୁରୋଲୋଜିକାଲ୍‌ ଡିସ୍‌ଅର୍ଡର କାରଣରୁ ପିଲାଙ୍କ ଭିତରେ ରାଗ ଆସିଥାଏ । କିନ୍ତୁ ଅଭିଭାବକ ପିଲାଙ୍କ ଏହି ସମସ୍ୟାକୁ ବୁଝିପାରି ନଥାନ୍ତି । ସେହିପରି ପିଲାଙ୍କ ରାଗର କାରଣ ଅଟିଜିମ୍‌, ଏସ୍ପଗର୍‌ ସିଣ୍ଡ୍ରୋମ୍‌ ଓ ଟୋରେଟ୍‌ ସିଣ୍ଡ୍ରୋମ୍‌ ଆଦି ମଧ୍ୟ ହୋଇପାରେ । ଏଭଳି ସମସ୍ୟା ଥିଲେ ପିଲାର ମୁଣ୍ଡରେ ଯନ୍ତ୍ରଣା ହେବା ସହ ମନ ଅଥୟ ହୋଇଥାଏ ।

ବଂଶାନୁକ୍ରମି ଗୁଣ ଥାଇପାରେ କେତେକ କ୍ଷେତ୍ରରେ ଅଭିଭାବକ ଯଦି ଅଧିକ ରାଗି ସ୍ୱଭାବର ହୋଇଥାନ୍ତି, ସେମାନଙ୍କ ପିଲାମାନେ ମଧ୍ୟ ରାଗି ହୋଇପାରନ୍ତି । ସେହି ପିଲାମାନେ ପ୍ରତିଟି ଛୋଟ ଛୋଟ କଥାରେ କ୍ରୋଧ ପ୍ରକାଶ କରିଥାନ୍ତି । ବାପାମା’ ଜଣେ କେହି ରାଗି ହୋଇଥିଲେ ପିଲାମାନେ ସେହି ଗୁଣକୁ ବଂଶାନୁକ୍ରମିକ ଭାବେ ଗ୍ରହଣ କରିଥାଇପାରନ୍ତି ।

କେମିତି ନିୟନ୍ତ୍ରଣ କରିବେ ପିଲାର କ୍ରୋଧ
ଅଭିଭାବକ ପ୍ରଥମେ ରାଗର କାରଣ ଖୋଜିବା ସହ ତା’ ବ୍ୟବହାରକୁ ସୁହାଇବା ଭଳି ଅନୁରୂପ ବ୍ୟବହାର କରିବା ଉଚିତ୍‌ ।
ଯଦି ପିଲାଟି ବିନା କାରଣରେ ରାଗିଥାଏ । ତେବେ କିଛି ସମୟ ପାଇଁ ତାକୁ ଏକା ଛାଡ଼ି ଦିଅନ୍ତୁ ।
ଯଦି ଘର ପରିବର୍ତ୍ତନ ବା ସାଙ୍ଗମାନଙ୍କଠାରୁ ଦୂରେଇବା ଯୋଗୁ ପିଲାଟି ରାଗୁଥାଏ ବା ଜିଦି କରୁଥାଏ । ତେବେ ପିଲାଟିକୁ ଟିକେ ଅଧିକ ସ୍ନେହ ସହ ନୂଆ ସାଙ୍ଗ କରିବାରେ ସାହାଯ୍ୟ କରନ୍ତୁ ।
ପିଲାଙ୍କୁ କେବେ ବି ମାରନ୍ତୁ ନାହିଁ । ମାରିବା ଦ୍ୱାରା ସେ ଅଧିକ ଚିଡ୍‌ଚିଡା ହୋଇପାରେ ।

Powered by Froala Editor