ନୂଆଦିଲ୍ଲୀ: ଋଣ ନେଇ ଘର ଓ ଗାଡି କିଣିବାକୁ ଚାହୁଁଥିବା ଲୋକମାନଙ୍କୁ ଅଧିକ ସୁଧ ଗଣିବାକୁ ପଡିବ । ଦେଶର ପ୍ରମୁଖ ବ୍ୟାଙ୍କ  ଗୁଡିକ ଋଣ ସୁଧରେ ବୃଦ୍ଧି ଘୋଷଣା କରିଛନ୍ତି । ଭାରତୀୟ ଷ୍ଟେଟ୍ ବ୍ୟାଙ୍କ, ବ୍ୟାଙ୍କ ଅଫ୍ ବରୋଦା, ଆକ୍ସିସ୍ ବ୍ୟାଙ୍କ ଓ କୋଟାକ୍ ମହିନ୍ଦ୍ରା ବ୍ୟାଙ୍କ ପକ୍ଷରୁ ଋଣ ସୁଧ ବୃଦ୍ଧି କରାଯାଇଛି । ସେଥିପାଇଁ ନୂଆ ଗ୍ରାହକ ଋଣ ନେବାବେଳେ ଅଧିକ ସୁଧ ଗଣିବେ ଓ ଋଣ ନେଇଥିବା ପୁରୁଣା ଗ୍ରାହକମାନଙ୍କ ମାସିକ କିସ୍ତି (ଇଏମଆଇ) ମଧ୍ୟ ବଢିବ । ବ୍ୟାଙ୍କଗୁଡିକ ଋଣ ସୁଧରେ ୦.୧୦ପ୍ରତିଶତ ପର୍ଯ୍ୟନ୍ତ ବୃଦ୍ଧି କରିଛନ୍ତି । ପ୍ରାୟ ତିନି ବର୍ଷର ବ୍ୟବଧାନ ପରେ ଋଣ ସୁଧ ବଢିଛି ।

ଷ୍ଟେଟ୍ ବ୍ୟାଙ୍କ ପକ୍ଷରୁ ଏକ ବର୍ଷିଆ ଅବଧିର ଋଣ ସୁଧ ୭%ରୁ ୭.୧୦% ବୃଦ୍ଧି କରାଯାଇଛି । ଓଭରନାଇଟ୍ ଏମସିଏଲ୍ଆର୍ ୬.୭୫% ଓ ଛଅ ମାସିଆ ଏମ୍ସିଏଲ୍ଆର ୭.୦୫% ଓ ଦୁଇ ବର୍ଷିଆ  ଏମ୍ସିଏଲ୍ଆର ୭.୩୦ପ୍ରତିଶତ ଓ ତିନି ବର୍ଷିଆ ଏମ୍ସିଏଲ୍ଆର ୭.୪୦ପ୍ରତିଶତକୁ ବୃଦ୍ଧି ପାଇଛି । 

ଷ୍ଟେଟ ବ୍ୟାଙ୍କର ସଂଶୋଧିତ ଏମ୍ସିଏଲ୍ଆର ଏପ୍ରିଲ ୧୫ରୁ ଲାଗୁ ହୋଇଛି । ବ୍ୟାଙ୍କ ଅଫ ବରୋଦା, ଆକ୍ସିସ୍ ବ୍ୟାଙ୍କ ଓ କୋଟାକ୍ ମହିନ୍ଦ୍ରା ବ୍ୟାଙ୍କ ମଧ୍ୟ ଏକ ବର୍ଷିଆ  ଏମ୍ସିଏଲ୍ଆର ୦.୦୫% ବୃଦ୍ଧି କରିଛନ୍ତି । ବ୍ୟାଙ୍କ ଅଫ୍ ବରୋଦାର ସଂଶୋଧିତ ଏମସିଏଲଆର୍ ଏପ୍ରିଲ ୧୨ରୁ ଲାଗୁ ହୋଇଛି । ସେହିପରି, ଆକ୍ସିସ ବ୍ୟାଙ୍କ ଓ କୋଟାକ୍ ମହିନ୍ଦ୍ରା ବ୍ୟାଙ୍କର ସଂଶୋଧିତ ଏମସିଏଲଆର୍ ଯଥାକ୍ରମେ ଏପ୍ରିଲ ୧୮ ଓ ଏପ୍ରିଲ ୧୬ରୁ ଲାଗୁ ହୋଇଛି । 

Powered by Froala Editor