ଭୁବନେଶ୍ୱର:  ବିଧାୟକ ସୌମ୍ୟରଞ୍ଜନ ପଟ୍ଟନାୟକ ବିଜେଡିରେ ରହି ମଧ୍ୟ ସରକାରଙ୍କୁ ତେରଛା ବାଣ ମାରିଛନ୍ତି । କେବଳ ସରକାର ନୁହନ୍ତି ୫-ଟିକୁ ମଧ୍ୟ ତେରଛା ବାଣ ମାରିବାରେ ସୌମ୍ୟ ପଛଘୁଞ୍ଚା ଦେଇନାହାନ୍ତି ।  ଆଜି ବିଧାନସଭାର ପ୍ରଶ୍ନକାଳରେ ଉଭୟ ୫-ଟି ଓ ସରକାରଙ୍କୁ ଟାର୍ଗେଟ କରି ସୌମ୍ୟ ତେରଛା ବାଣ ମାରିଛନ୍ତି । ବିଭାଗରେ ୫-ଟି ପ୍ରବେଶ ଦ୍ୱାରା ଜାତିଭେଦ ସୃଷ୍ଟି ହେଉଥିବା ସୌମ୍ୟ କହିଛନ୍ତି ।

ସେ କହିଛନ୍ତି ଯେ, ୫-ଟି ପ୍ରବେଶ ଦ୍ୱାରା ବିଭାଗର ପାରମ୍ପରିକ କାର୍ଯ୍ୟଗୁଡ଼ିକର ପ୍ରାଧାନ୍ୟ କମୁଛି ।  ଏହା ଦ୍ୱାରା ପ୍ରଶାସନର ସ୍ୱଚ୍ଛତା ଓ ଦକ୍ଷତା ନେଇ ଆଗକୁ ପ୍ରଶ୍ନବାଚୀ ସୃଷ୍ଟି ହେବ ।  ଯେଉଁ ବିଭାଗରେ ୫-ଟି ପଶୁଛି, ସେ ବିଭାଗରେ ଜାତିଭେଦ ସୃଷ୍ଟି ହେଉଛି କି ।

ସେ ଆହୁରି କହିଛନ୍ତି ମନ୍ତ୍ରୀଙ୍କର ଉତ୍ତର ଶୁଣିବାକୁ ବହୁତ ଭଲ ଲାଗୁଛି । ଅନେକ ଗୁଡିଏ ନୂଆ ନୂଆ କଥା ଜାଣିବାକୁ ପାଉଛୁ । ଜଳ ସାକ୍ଷରତା, ନିରନ୍ତର ଜଳ ପରିଚାଳନା,ଏବଂ ଜଳକୁ କିପରି ସୁରକ୍ଷିତ ରଖାଯିବ, ୟୁଥ ଫର ୱାଟର ଏବଂ ସର୍ଵ ଶେଷରେ ମୋ ନଦୀ ଅଭିଯାନ । ଏ ସବୁ କଥା ଗୁଡିକ ଆମ କାନକୁ ଭଲ ଶୁଭୁଛି । ସବୁ କଥାରେ ମୋ ଶବ୍ଦର ବ୍ୟବହାର କରିବାର ପ୍ରବଣତା ଆମର ଟିକିଏ ଅଧିକ ହୋଇଥିବା ମନେ ହେଉଛି ବୋଲି କହିଛନ୍ତି ବିଧାୟକ ସୌମ୍ୟ ।ସବୁ କଥାରେ ‘ମୋ’ ଶବ୍ଦ ପ୍ରୟୋଗ ପ୍ରବଣତା ଟିକେ ଅଧିକ ହୋଇଯାଉଛି ।  ଯେଉଁଥିରେ ମୋ ଶବ୍ଦ ଲଗାଉଛୁ, ସେଥିରେ ଆମେ ନିଜକୁ ସମ୍ପୃକ୍ତ କରୁଛୁ ।  କିନ୍ତୁ ସେହି ଅନୁପାତରେ ସେଥିରେ ବିକାଶ କରୁଛୁ କି ନାହିଁ , ନିର୍ଦ୍ଧିଷ୍ଟ ଉତ୍ତର ନାହିଁ ବୋଲି ସୌମ୍ୟରଞ୍ଜନ ପଟ୍ଟନାୟକ କହିଛନ୍ତି ।

ଅନ୍ୟପକ୍ଷରେ ଆଜି ବିଧାନସଭାର ପ୍ରଶ୍ନକାଳରେ ବିଧାୟକ ସୌମ୍ୟରଞ୍ଜନ ପଟ୍ଟନାୟକ ରାଜ୍ୟ ସରକାରଙ୍କୁ କଟାକ୍ଷ କରିଛନ୍ତି । ପାଣିକୁ ନେଇ ସେ ସରକାରଙ୍କୁ ଟାର୍ଗେଟ କରିଛନ୍ତି ।  ଶିଳ୍ପ ପାଇଁ ପାଣି ଦେବାକୁ ବ୍ୟାକୁଳ, କିନ୍ତୁ ପିଇବାକୁ ପାଣି ନାହିଁ ବୋଲି ସୌମ୍ୟ କହିଛନ୍ତି ।  ସରକାର ଜଳ ନୀତି ଆଣିଛନ୍ତି, ମାତ୍ର ସେ ଜଳ ନୀତିର ମାନେ କ’ଣ ।  ଜଳ ନୀତିର ଅର୍ଥ ପିଇବାକୁ ପାଣି, କୃଷି ପାଇଁ ପାଣି ଦେବା ଓ ତା’ ପରେ ପର୍ଯ୍ୟଟନ ।  ମାତ୍ର ଏବେ ଶିଳ୍ପ ପାଇଁ ପାଣି ଦେବାକୁ ବ୍ୟାକୁଳ, ମାତ୍ର ପିଇବା ପାଣି ପାଇଁ ନୁହେଁ ।  ଏବେ ନଦୀ ମାଫିଆ ଶୁଖି ଯାଉଥିବା ନଦୀକୁ ଅପହରଣ କରିନେଉଛନ୍ତି ବୋଲି ସୌମ୍ୟ କହିଛନ୍ତି । 

ଆଜି ଆଲୋଚନା ବେଳେ ଗୃହରେ ନଦୀ ଶୁଷ୍କ ହୋଇଯାଉଥିବା ନେଇ ଉଦବେଗ ପ୍ରକାଶ କରିଥିଲେ ସୌମ୍ୟ । ଏଥିସହ କହିଥିଲେ, ନଦୀ ଜଳ ଆମର ବଡ଼ ସଂପଦ । ସରକାର ଜଳ ନୀତି ଆଣିଛନ୍ତି । ହେଲେ ବୈତରଣୀରୁ ଲୋକେ ଆଉ ପାଣି ପାଉନାହାନ୍ତି ତେଣୁ ଏ ଜଳ ନୀତିର ମାନେ କଣ ବୋଲି ସେ ପ୍ରଶ୍ନ କରିଛନ୍ତି । ତେବେ ଯେଉଁଠି ନଦୀ ଶୁଷ୍କ ହେଉଛି, ସେଠି ଜଳ ପ୍ରବାହିତ ପାଇଁ ବିଭାଗ ପଦକ୍ଷେପ ନେଉଛି ବୋଲି ଜଳ ସଂପଦ ମନ୍ତ୍ରୀ ରଘୁନନ୍ଦନ ଦାସ କହିଛନ୍ତି  ।

Powered by Froala Editor