ଆପ୍ର ଆଉ ଏକ ସଫଳତା : ୫ ରାଜ୍ୟସଭା ପ୍ରାର୍ଥୀ ନିର୍ଦ୍ୱନ୍ଦ୍ୱରେ ବିଜୟୀ
ପଞ୍ଜାବ ବିଧାନସଭା ନିର୍ବାଚନରେ ଆମ ଆଦମି ପାର୍ଟିର (ଆପ) ବିଜୟ ପରେ ସେଠାରେ ଆପ ଆଉ ଏକ ସଫଳତା ହାସଲ କରିଛି । ନିର୍ବାଚନ ହେବା ପୂର୍ବରୁ ୫ ରାଜ୍ୟସଭା ଆସନରେ ଆପ୍ର ପ୍ରାର୍ଥୀମାନେ ନିର୍ଦ୍ୱନ୍ଦ୍ୱରେ ବିଜୟୀ ହୋଇଛନ୍ତି। ସୂଚନା ଥାଉକି, ପଞ୍ଜାବର ରାଜ୍ୟସଭା ନିର୍ବାଚନ ପାଇଁ ଗୁରୁବାର ଅପରାହ୍ଣ ୩ଟା ପର୍ଯ୍ୟନ୍ତ ନାମାଙ୍କନ ପତ୍ର ଦାଖଲ କରିବାର ଶେଷ ସମୟ ଥିଲା । ପଞ୍ଜାବରେ ଆମ ଆଦମୀ ପାର୍ଟି ଦିଲ୍ଲୀର ରାଜିନ୍ଦର ନଗର ବିଧାନସଭାରୁ ବିଧାୟକ ରାଘବ ଚଡଢା, କ୍ରିକେଟର ହରଭଜନ ସିଂହ, ସନ୍ଦୀପ ପାଠକ, ସନ୍ଦୀପ ଅରୋଡ଼ା, ଓ ଅଶୋକ ମିତ୍ତଲଙ୍କୁ ପ୍ରାର୍ଥୀ ଭାବେ ଘୋଷଣା କରିଥିଲା ।
ଆପ୍ର ୫ ଆଶାୟୀଙ୍କ ବିରୋଧରେ କେହି ନାମାଙ୍କନ ଦାଖଲ କରି ନଥିବାରୁ ଏମାନେ ସମସ୍ତେ ରାଜ୍ୟସଭାକୁ ଯିବା ନିଶ୍ଚିତ ହୋଇଛି। ଅବଶ୍ୟ ନିର୍ବାଚନ କମିଶନଙ୍କ ପକ୍ଷରୁ ମାର୍ଚ୍ଚ ୩୧ ତାରିଖରେ ଏନେଇ ବିଧିବଦ୍ଧ ଘୋଷଣା କରାଯିବ। ଏହି ୫ ଜଣଙ୍କୁ ମିଶାଇ ରାଜ୍ୟସଭାରେ ଏବେ ଆପ୍ର ସାଂସଦଙ୍କ ସଂଖ୍ୟା ୮କୁ ବଢ଼ିଛି। କାରଣ ପୂର୍ବରୁ ଦିଲ୍ଲୀରୁ ଆପ୍ର ୩ ସଦସ୍ୟ ରାଜ୍ୟସଭାକୁ ନିର୍ବାଚିତ ହୋଇଥିଲେ। ସୂଚନା ଯେ, ପଞ୍ଜାବରେ ଏଥର ବିଧାନସଭା ନିର୍ବାଚନରେ ୧୧୭ଟି ଆସନରୁ ଆପ ୯୧ ଟି ଆସନରେ ଜିତି ରାଜ୍ୟରେ ଶାସନ କ୍ଷମତାକୁ ଆସିଛି ।
Powered by Froala Editor
