ଭୁବନେଶ୍ୱର: ଆଜି ଆରମ୍ଭ ହୋଇଛି ପୌର ନିର୍ବାଚନ ପାଇଁ ଭୋଟିଂ  । ନେତା ବାଛୁଛନ୍ତି ସହରବାସୀ  । ଏନଏସି, ପୌର ଏବଂ ମହାନଗର ନିଗମର ୧୭ ଶହ ୩୭ ୱାର୍ଡରେ ନିର୍ବାଚନ ଆରମ୍ଭ ହୋଇଛି  । ରାଜ୍ୟର ୫୯ଟି ଏନଏସି, ୪୭ଟି ପୌର ପରିଷଦ ଏବଂ ୩ଟି ମହାନଗର ନିଗମରେ ଆରମ୍ଭ ହୋଇଛି ଭୋଟ  । ୪ ହଜାର ୩୭୩ ବୁଥରେ ମତଦାନ ସାବ୍ୟସ୍ତ କରୁଛନ୍ତି ମୋଟ ୪୦ ଲକ୍ଷରୁ ଅଧିକ ଭୋଟର  । ଅପରାହ୍ନ ୫ଟା ଯାଏ ଚାଲିବ ଭୋଟ ଗ୍ରହଣ  । ଚଳିତ ପୌର ନିର୍ବାଚନରେ ପ୍ରତି ବୁଥରେ ଦୁଇଟି ଇଭିଏମ୍ ରହିଛି  । ଗୋଟିଏ କାଉନସିଲର ବା କର୍ପୋରେଟରଙ୍କ ପାଇଁ ଏବଂ ଅନ୍ୟଟି ଅଧ୍ୟକ୍ଷ ବା ମେୟରଙ୍କ ପାଇଁ ରହିଛି  ।

 
ନା ଥିଲା କାରକେଡ  । ନା ଥିଲା ଗାଡ଼ି, ନା ଶୁଭୁଥିଲା ପୁଲିସ ସାଇରନ, ନା ଥିଲେ  ସୁରକ୍ଷା କର୍ମୀ  । ଆଜି ସକାଳୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନବୀନ ନିବାସରୁ ଚାଲିଚାଲି ଆସି ବିଏମସି ୫୩ ନମ୍ବର ୱାର୍ଡରେ ନିଜ ମତଦାନ ସାବ୍ୟସ୍ତ କରିଛନ୍ତି । ରାସ୍ତାରେ ଯିବା ବେଳେ ଦୁଇ ପଟେ ନିଜ ନିଜ  ଘର ଗେଟ ପାଖେ ଛିଡ଼ା ହୋଇଥିବା ଲୋକଙ୍କୁ ହାତ ହଲାଇ ଓ ଯୋଡ଼ ହସ୍ତରେ ସମ୍ବୋଧନ କରି ଆଗକୁ ମାଡ଼ିଚାଲିଥିଲେ ନବୀନ  । ପରେ ଭୋଟ ଦାନ କେନ୍ଦ୍ର ପାଖେ ପହଞ୍ଚି ନବୀନ ନିଜର ଭୋଟର କାର୍ଡକୁ ଗଣମାଧ୍ୟମକୁ ଦେଖାଇ ଭୋଟଦାନ କେନ୍ଦ୍ର ଭିତରକୁ ପଶିଥିଲେ  । ମୁଖ୍ୟମନ୍ତ୍ରୀଙ୍କ ଭୋଟ ଦାନ ପାଇଁ ବୁଥରେ କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯାିଥିଲା । ନବୀନ ନିବାସରୁ ୧୦୦ମିଟର ଦୂରରେ ବୁଥ୍ ଥିବାରୁ ମୁଖ୍ୟମନ୍ତ୍ରୀ ଚାଲିଚାଲି ଆସି ଭୋଟ ଦେଇଛନ୍ତି । ଏଥିପାଇଁ ନବୀନ ନିବାସରୁ ବୁଥ୍ ପର୍ଯ୍ୟନ୍ତ କଡାକଡି ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା । ତେବେ ଭୋଟ ପରେ ନବୀନ ପୁଣି ଚାଲି ଚାଲି ନବୀନ ନିବାସ ଫେରିଥିଲେ ।

Powered by Froala Editor