ଭୁବନେଶ୍ୱର:  ଆଜି ବିଧାନସଭା ଶୀତ ଅଧିବେଶନର ତୃତୀୟ ଦିନ । ତେବେ ଆଜି ବି ବିଧାନସଭା ଆରମ୍ଭରୁ ଚାଲିପାରିଲାନି । ଆଜି ବିଧାନସଭା ଆରମ୍ଭ ହେଉ ହେଉ ବିରୋଧୀ ସଦସ୍ୟମାନେ ପ୍ରବଳ ହଟ୍ଟଗୋଳ କରିଥିଲେ । ଫଳରେ ବାଚସ୍ପତି ସୂର୍ଯ୍ୟନାରାୟଣ ପାତ୍ର ଗୃହକୁ ସାଢେ ୧୧ଟା ପର୍ଯ୍ୟନ୍ତ ମୁଲତବୀ ଘୋଷଣା କରିଛନ୍ତି । ଦିବ୍ୟଶଙ୍କରଙ୍କୁ ବହିଷ୍କାର ନକରିବା ଯାଏଁ ବିରୋଧ ଜାରି ରହିବ ବୋଲି ବିଜେପି ବିଧାୟକ ମୋହନ ମାଝୀ କହିଛନ୍ତି ।

ତେବେ ସବୁଠାରୁ ବଡ଼ କଥା ହେଲା ଯେ, ଗୃହ ମୁଲତବୀ ପରେ ବିଜେପି ପକ୍ଷରୁ ଏକ ଅଭିନବ ଉପାୟରେ ବିରୋଧ କରାଯାଇଛି । ଦିବ୍ୟଶଙ୍କର ମିଶ୍ର ବିଧାନସଭାରେ ପ୍ରବେଶ କରିବା ଯୋଗୁଁ ପବିତ୍ର ଗୃହ ଅପବିତ୍ର ହୋଇଯାଇଛି । ତେଣୁ ଗୃହକୁ ପବିତ୍ର କରିବା ପାଇଁ ବିଜେପି ବିଧାୟକମାନେ ଗୃହ ବାହାରେ ପ୍ରଥମେ ଗୋବର ପାଣି ଓ ପରେ ଗଙ୍ଗା ଜଳ ସିଞ୍ଚନ କରିଛନ୍ତି । 

ପ୍ରକାଶ ଯେ, ସାରା ରାଜ୍ୟରେ ଏବେ ମମିତା ନିଆଁ ହୁତୁ ହୁତୁ ହୋଇ ଜଳୁଛି ।  ମମିତା ହତ୍ୟା ମାମଲାରେ ସମ୍ପୃକ୍ତି ଅଭିଯୋଗରେ ଗୃହରାଷ୍ଟ୍ରମନ୍ତ୍ରୀ ଦିବ୍ୟଶଙ୍କରଙ୍କୁ ମନ୍ତ୍ରିମଣ୍ଡଳରୁ ବହିଷ୍କାର କରିବା ପାଇଁ ବିରୋଧୀ ଦାବି କରିଆସୁଛନ୍ତି । ଏହା ସତ୍ତ୍ୱେ ବି ମୁଖ୍ୟମନ୍ତ୍ରୀ ତାଙ୍କୁ ବହିଷ୍କାର କରୁନାହାନ୍ତି । ଅନ୍ୟପଟେ ପ୍ରବଳ ବିରୋଧ ସତ୍ତ୍ୱେ ବି ଦିବ୍ୟଶଙ୍କର ଗତ ୩ ଦିନ ହେଲା ବିଧାନସଭା ଆସୁଛନ୍ତି । ଯାହାକୁ ବିରୋଧ କରି ବିରୋଧୀ ବିଧାନସଭାରେ ବିରୋଧ ପ୍ରଦର୍ଶନ ଜାରି ରଖିଛନ୍ତି ।

ବିଧାନସଭା ଆରମ୍ଭର ପ୍ରଥମ ଦିନରୁ ଚାଲି ପାରୁନି ଗୃହ । ଏଥିପାଇଁ ଶାସକ-ବିରୋଧୀ କେବଳ ଦୋଷ ଲଦାଲଦି ହୋଇ ରହିଯାଉଛନ୍ତି । ଗୃହ ଅଚଳ ପାଇଁ ଆଗତ ହେବାକୁ ଥିବା ବହୁ ଗୁରୁତ୍ବପୂର୍ଣ୍ଣ ବିଲ୍ କାର୍ୟ୍ୟକାରୀ ହୋଇପାରୁନାହିଁ । ଅଧିବେଶନର ତୃତୀୟ ଦିନରେ ରାଜସ୍ବ ସହିତ ବିପର୍ୟ୍ୟୟ ପରିଚାଳନା. ଜାତି ଓ ଜନଜାତି, ପଛୁଆ ବର୍ଗ ଓ କ୍ରୀଡା ବିଭାଗ ସମ୍ପର୍କିତ ପ୍ରଶ୍ନତ୍ତୋର କାର୍ୟ୍ୟକ୍ରମ ରହିଛି । ଏହା ସହିତ ଶିଳ୍ପ, ଇଲୋକ୍ଟ୍ରୋନିକ୍ସ, ଆଇଟି ବିଭାଗର ପ୍ରଶ୍ନକାଳ ମଧ୍ୟ ରହିଛି । ବିପର୍ୟ୍ୟୟ ଆଇନଶୃଙ୍ଖଳାକୁ ବିରୋଧୀ ମୁଖ୍ୟଅସ୍ତ୍ର କରିଥିବାବେଳେ ଶାସକ ଦଳ କେନ୍ଦ୍ର ଅବହେଳାକୁ ମୁଖ୍ୟ ପ୍ରସଙ୍ଗ କରିଛି ।

Powered by Froala Editor