ମହଙ୍ଗା ହେଲା କମର୍ସିଆଲ ଗ୍ୟାସ୍ ସିଲିଣ୍ଡର, କେତେ ଜାଣନ୍ତୁ
![ମହଙ୍ଗା ହେଲା କମର୍ସିଆଲ ଗ୍ୟାସ୍ ସିଲିଣ୍ଡର, କେତେ ଜାଣନ୍ତୁ](https://odishanewslens.com/news_gallery/7664_1635758093.jpg)
ନୂଆଦିଲ୍ଲୀ: ମହଙ୍ଗା ହେଲା କମର୍ସିଆଲ ଗ୍ୟାସ୍ ସିଲିଣ୍ଡର। ୨୬୬ ଟଙ୍କା ବଢ଼ିଲା କମର୍ସିଆଲ ଗ୍ୟାସ୍ ସିଲିଣ୍ଡର ଦାମ୍ । ବର୍ଦ୍ଧିତ ଦର ଆଜିଠୁ ଲାଗୁ ହୋଇଛି । ଦିଲ୍ଲୀରେ ୧୯ କେଜି କମର୍ସିଆଲ ଗ୍ୟାସ୍ ସିଲିଣ୍ଡର ଦାମ୍ ୨ ହଜାର ଟଙ୍କା ୫୦ ପଇସା ହୋଇଛି । ପୂର୍ବରୁ ଏହା ୧୭ ଶହ ୩୪ଟଙ୍କା ଥିଲା । ଭୁବନେଶ୍ବରରେ କମର୍ସିଆଲ ଗ୍ୟାସ ସିଲିଣ୍ଡର ଦର ୨୭୦ ଟଙ୍କା ବୃଦ୍ଧି ହୋଇଛି । ୨୧ଶହ ଟଙ୍କା ହୋଇଛି ବର୍ଦ୍ଧିତ ଦର । ଆଗରୁ ଏହା ୧୮ ଶହ ୩୦ ଟଙ୍କା ଥିଲା । ଘରୋଇ ଗ୍ୟାସ ସିଲିଣ୍ଡର ଦର ଅପରିବର୍ତ୍ତିତ ରହିଛି ।
ସୂଚନାଯୋଗ୍ୟ ଯେ, ଅକ୍ଟୋବର ୬, ୨୦୨୧ରେ କରାଯାଇଥିବା ସମୀକ୍ଷା ଅନୁଯାୟୀ, ଦିଲ୍ଲୀରେ ୧୯.୨ କିଲୋଗ୍ରାମ ସିଲିଣ୍ଡରର ମୂଲ୍ୟ ମାତ୍ର ୧୭୩୬.୫୦ ଟଙ୍କା ଥିଲା, କିନ୍ତୁ ନଭେମ୍ବର ମାସ ଆରମ୍ଭ ଅର୍ଥାତ୍ ଆଜି ଠାରୁ ଏଥିରେ ୨୬୬ ଟଙ୍କା ବୃଦ୍ଧି କରାଯାଇଛି । ଇଣ୍ଡିଆନ୍ ଅଏଲ୍ ୱେବସାଇଟ୍ ଅନୁଯାୟୀ, ବର୍ତ୍ତମାନ ଦିଲ୍ଲୀରେ ବ୍ୟବସାୟିକ ସିଲିଣ୍ଡରର ମୂଲ୍ୟ ୨୦୦୦.୫୦ ଟଙ୍କାକୁ ବୃଦ୍ଧି ପାଇଛି। ସେହିଭଳି କୋଲକାତାରେ ୧୯.୨ କିଲୋଗ୍ରାମ ସିଲିଣ୍ଡରର ମୂଲ୍ୟ ୨୦୭୩.୫ ଟଙ୍କା, ମୁମ୍ବାଇରେ ୧୯୫୦ ଟଙ୍କା ଏବଂ ଲକ୍ଷ୍ନୌରେ ୨୦୯୩ ଟଙ୍କାକୁ ବୃଦ୍ଧି ପାଇଛି ।ଏହି କାରଣରୁ ରେଷ୍ଟୁରାଣ୍ଟର ଖାଦ୍ୟ ଆହୁରି ମହଙ୍ଗା ହୋଇଯିବ ।
ଅନ୍ୟପଟେ ପେଟ୍ରୋଲ ଏବଂ ଡିଜେଲ ମୂଲ୍ୟ କ୍ରମାଗତ ଷଷ୍ଠ ଦିନ ପାଇଁ ସାରା ଦେଶରେ ବୃଦ୍ଧି କରାଯାଇଥିଲା । ପେଟ୍ରୋଲ ଓ ଡିଜେଲ ଦର ୩୫ପଇସା ଲେଖାଏ ବୃଦ୍ଧି ହୋଇଛି । ଦିଲ୍ଲୀରେ ପେଟ୍ରୋଲ ଦର ୧୦୯ଟଙ୍କା ୬୯ ପଇସା ଥିବା ବେଳେ ଡିଜେଲ ଦର ଲିଟର ପିଛା ୯୮ଟଙ୍କା ୪୨ ପଇସା ହୋଇଛି । ମୁମ୍ବାଇରେ ପେଟ୍ରୋଲ ଦର ୧୧୫ ଟଙ୍କା ୫୦ ପଇସା ଡିଜେଲ ଦର ୧୦୬ ଟଙ୍କା ୪୨ ପଇସା ହୋଇଛି ।
ସେହିପରି କୋଲକାତାରେ ପେଟ୍ରୋଲ ଲିଟର ପିଛା ୧୦୬ଟଙ୍କା ୩୫ ପଇସା ଥିବା ବେଳେ ଡିଜେଲ ଦର ୧୦୧ଟଙ୍କା ୫୬ ପଇସା ରହିଛି । ଭୁବନେଶ୍ବରରେ ପେଟ୍ରୋଲ ଦର ୧୧୦ଟଙ୍କା ୬୭ପଇସା ଥିବା ବେଳେ ଡିଜେଲ ଦର ୧୦୭ଟଙ୍କା ୩୪ ପଇସା ହୋଇଛି । ରାୟଗଡ଼ାରେ ପେଟ୍ରୋଲ ଦର ୧୧୪ ଟଙ୍କା ୧୫ ପଇସା ଥିବା ବେଳେ ଡିଜେଲ ଦର ୧୧୦ ଟଙ୍କା ୬୮ ପଇସା ହୋଇଛି । ମାଲକାନଗିରିରେ ପେଟ୍ରୋଲ ୧୧୫ଟଙ୍କା ୯୦ ପଇସା ଥିବା ବେଳେ ଡିଜେଲ ଦର ୧୧୨ଟଙ୍କା ୩୯ ପଇସା ହୋଇଛି ।
Powered by Froala Editor