ଆଜିଠୁ ପ୍ରଶାନ୍ତ ମହାସାଗରୀୟ ଅଲିଭ୍ ରିଡ୍ଲେ ସାମୁଦ୍ରିକ କଇଁଛ ସୁରକ୍ଷା କଟକଣା ଲାଗୁ
ଭୁବନେଶ୍ୱର: ଆଜିଠୁ ଉପକୂଳ ସମୁଦ୍ରରେ ପ୍ରଶାନ୍ତ ମହାସାଗରୀୟ ବିରଳ ପ୍ରଜାତିର ଅଲିଭ୍ ରିଡ୍ଲେ ସାମୁଦ୍ରିକ କଇଁଛ ସୁରକ୍ଷା କଟକଣା ଲାଗୁ ହେଉଛି। ଅଲିଭ ରିଡ୍ଲେ ବେଳାଭୂମିରେ ଅଣ୍ଡା ଦେବା ପର୍ୟ୍ୟନ୍ତ ଏହି କଟକଣା ବଳବତ୍ତର ରହିବ । ଉପକୂଳ ସମୁଦ୍ରର ୨୦ କିମି ମଧ୍ୟରେ ଯନ୍ତ୍ର ଚାଳିତ ବୋଟ୍ ଏବଂ ମାଛ ଧରା ଟ୍ରଲର ଚଳାଚଳ ସମ୍ପୂର୍ଣ୍ଣ ବନ୍ଦ ରହିବ । ଦେଶୀ ଡଙ୍ଗା ମାଛ ଧରା ଉପରେ କଟକଣା ରହିବ ନାହିଁ ।
ସୂଚନାଯୋଗ୍ୟ, ଅକ୍ଟୋବର ମଧ୍ୟଭାଗରୁ ପୁରୀ ଜିଲ୍ଲାର ଦେବୀ ମୁହାଣରୁ ଚିଲିକା ମୁହାଣ, ଋଷିକୁଲ୍ୟା ମହାଣ ପର୍ୟ୍ୟନ୍ତ ଏହି କଇଁଛ ମିଳନ ପର୍ବ ଆରମ୍ଭ ହୋଇଛି। ବିରଳ ପ୍ରଜାତିର ଏହି କଇଁଛଙ୍କୁ ସୁରକ୍ଷା ଦେବାକୁ କେନ୍ଦ୍ରୀୟ ପରିବେଶ ଆଇନରେ ସ୍ପଷ୍ଟ ନିର୍ଦ୍ଦେଶ ରହିଛି । ଆସନ୍ତାକାଲିଠାରୁ ଉପକୂଳ ସମୁଦ୍ରରେ କଇଁଛ ସୁରକ୍ଷା ପାଟ୍ରୋଲିଂ କିନ୍ତୁ ଆରମ୍ଭ ହୋଉଛି । ପ୍ରତିବର୍ଷ ଏହି ସବୁ ଇଲାକାରେ ଦଶ ଲକ୍ଷରୁ ଅଧିକ କଇଁଛ ପ୍ରଶାନ୍ତ ମହାସାଗର ଇଲାକାରୁ ଆସି ଅଣ୍ଡା ଦିଅନ୍ତି । ସମୁଦ୍ରିକ ପ୍ରାଣୀ ଜଗତରେ ଏହି ମିଳନ ଏବଂ ସମୂହ ଅଣ୍ଡାଦାନ ପ୍ରାକୃତିକ ବିସ୍ମୟର ମାନ୍ୟତା ପାଇଛି ।
ବାଲୁଖଣ୍ଡ ଅଭୟାରଣ୍ୟ ବନଖଣ୍ଡ ଡିଏଫଓ୍ ପି ରାମସ୍ୱାମୀ କହିଛନ୍ତି କଇଁଛ ସୁରକ୍ଷା ପାଇଁ ମିଳିତ ପାଟ୍ରୋଲିଂ ଦଳ ନିୟୋଜିତ ହେବେ । ମତ୍ସ୍ୟ ବିଭାଗ, ବନ ବିଭାଗ, ପୁଲିସ,ମେରାଇନ୍ ଥାନା, କୋଷ୍ଟଗାର୍ଡର ମିଳିତ ପାଟ୍ରୋଲିଂ ଉପକୂଳ ସମୁଦ୍ରରେ ମିଳନ ପର୍ବରେ ଲିପ୍ତ ପ୍ରଶାନ୍ତ ମହାସାଗରୀୟ ଓଲିଭ୍ କଇଁଛ ସମାଗମକୁ ସୁରକ୍ଷା ଦେବ । ଦୁଇଟି ସ୍ପିଡ୍ ବୋଟ୍ ଏବଂ ଗୋଟିଏ ଟ୍ରଲରରେ ମିଳିତ ଟାସ୍କ ଫୋର୍ସ ଦେବୀ ନଦୀ ମୁହାଣରୁ ଚିଲିକା ମୁହାଣ ପର୍ୟ୍ୟନ୍ତ ପାଟ୍ରୋଲିଂରେ ମୁତୟନ ହେବେ ।
Powered by Froala Editor
