ନେପାଳ ପାଇଁ ୧୦ ଟନ୍ ରିଲିଫ୍ ସାମଗ୍ରୀ ଓ ଜରୁରୀ ଔଷଧ ପଠାଇଲା ଭାରତ
ନେପାଳ ଭୟଙ୍କର ବନ୍ୟା ଯୋଗୁ ବ୍ୟାପକ କ୍ଷୟକ୍ଷତି ହୋଇଛି। ଏଭଳି କଠିନ ସମୟରେ ନେପାଳ ପାଇଁ ସହାୟତାର ହାତ ବଢ଼ାଇଛି ଭାରତ। ବନ୍ୟା ମୁକାବିଲା ପାଇଁ ଭାରତ ପକ୍ଷରୁ ୧୦ ଟନ୍ ରିଲିଫ୍ ସାମଗ୍ରୀ ଓ ଜରୁରୀ ଔଷଧ ପଠାଯାଇଥିବା ବିଦେଶ ମନ୍ତ୍ରୀ ଏସ୍. ଜୟଶଙ୍କର କହିଛନ୍ତି।
ବିଦେଶ ମନ୍ତ୍ରୀ ଏସ୍. ଜୟଶଙ୍କର କହିଛନ୍ତି ଯେ, ‘ଏଭଳି ସଙ୍କଟ ସମୟରେ ଭାରତ ନେପାଳ ଓ ନେପାଳବାସୀଙ୍କ ସହ ଦୃଢ଼ ଭାବେ ଛିଡ଼ା ହୋଇଛି। ବନ୍ୟାରେ ପ୍ରାଣ ହରାଇଥିବା ଲୋକଙ୍କ ପରିବାର ପ୍ରତି ସେ ଶୋକ ପ୍ରକାଶ କରିବା ସହ ବିପଦରେ ପଡ଼ିଥିବା ସମସ୍ତଙ୍କ ପ୍ରତି ସମବେଦନା ଜଣାଇଛନ୍ତି। ନେପାଳକୁ ପଠାଯାଇଥିବା ରିଲିଫ୍ ସାମଗ୍ରୀ ଓ ଔଷଧ ବନ୍ୟା ପ୍ରଭାବିତ ଲୋକଙ୍କୁ ତୁରନ୍ତ ସହାୟତା ଯୋଗାଇବାରେ ଗୁରୁତ୍ୱପୂର୍ଣ୍ଣ ହେବ।
କେବଳ ରିଲିଫ୍ ସାମଗ୍ରୀ ନୁହେଁ, ଉଦ୍ଧାର କାର୍ଯ୍ୟରେ ମଧ୍ୟ ନେପାଳକୁ ସହାୟତା କରିବାକୁ ଭାରତ ପ୍ରସ୍ତୁତ ହେଉଛି। ପ୍ରଭାବିତ ଅଞ୍ଚଳରେ ରିଲିଫ୍ ଓ ରେସ୍କ୍ୟୁ ଅପରେସନ୍କୁ ମଜବୁତ କରିବା ପାଇଁ NDRFର ଉଦ୍ଧାରକାରୀ ଦଳକୁ ନେପାଳ ପଠାଇବାର ଯୋଜନା ରହିଛି। ଭାରତୀୟ ବାୟୁସେନାର ବିମାନ ମାଧ୍ୟମରେ ଔଷଧ, ରାସନ ଓ ଅନ୍ୟାନ୍ୟ ଜରୁରୀ ସାମଗ୍ରୀ ନେପାଳକୁ ପଠାଯିବ। ଭାରତ ସରକାରଙ୍କ ମାନବୀୟ ସହାୟତା ଓ ବିପର୍ଯ୍ୟୟ ରିଲିଫ୍ (HADR) ପଦକ୍ଷେପ ଅଧୀନରେ ଏହି ସହାୟତା ପଠାଯାଉଛି।
ତିବ୍ବତ ସୀମାକୁ ଲାଗିଥିବା ନେପାଳର ରସୁୱା ଜିଲ୍ଲାରେ ବୁଧବାର ହଠାତ୍ ଆସିଥିବା ବନ୍ୟା ପରେ ପ୍ରାୟ ୪୦୦ ଜଣ ନିଖୋଜ ଥିବା ସୂଚନା ମିଳିଛି। ଏଥିରେ ଅତି କମ୍ରେ ୧୦୫ ଜଣ ଭାରତୀୟ ଏବଂ ୩୭ ଜଣ NRI ଥିବା ଅଧିକାରୀମାନେ କହିଛନ୍ତି। ବନ୍ୟାରେ ନଦୀ କୂଳରେ ଥିବା ବସତି ଓ ଅନ୍ୟାନ୍ୟ ଅଞ୍ଚଳରେ ବ୍ୟାପକ କ୍ଷୟକ୍ଷତି ହୋଇଛି।
Powered by Froala Editor
