ଫେସବୁକର ନୂଆ ନାଁ ହୋଇଛି ମେଟା । ଗୁରୁବାର ‘ଫେସ୍‌ବୁକ୍‌ ଇନ୍‌କର୍ପୋରେଟେଡ୍‌’ର ସହ-ସଂସ୍ଥାପକ ତଥା ମୁଖ୍ୟ କାର୍ଯ୍ୟ ନିର୍ବାହୀ ଅଧିକାରୀ ମାର୍କ ଜୁକର୍‌ବର୍ଗ କହିଛନ୍ତି ଯେ, ଏଥର ତାଙ୍କ କମ୍ପାନି ‘ମେଟା ପ୍ଲାଟ୍‌ଫର୍ମସ୍‌ ଇନ୍‌କର୍ପୋରେଟେଡ୍‌’ ବା ସଂକ୍ଷେପରେ ‘ମେଟା’ ଭାବେ ପରିଚୟ ପାଇବ। ‘ମେଟାଭର୍ସ’ ଭାବେ ସୁପରିଚିତ ‘ଡିଜିଟାଲ୍‌ ଓ୍ଵାର୍ଲଡ୍‌’ ପ୍ରତି ଦୃଷ୍ଟି ଦିଆଯାଇ କମ୍ପାନିର ଏଭଳି ନାମ କରଣ କରାଯାଇଥିବା କଥା ସେ କହିଛନ୍ତି।

ଫେସବୁକର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ବା ସିଇଓ ମାର୍କ ଜୁକରବର୍ଗ ଘୋଷଣା କରିଥିଲେ ଯେ, ଫେସବୁର କେବଳ ଏକ ସୋସିଆଲ ମିଡିଆ କମ୍ପାନୀରୁ ଆଗକୁ ବଢି ମେଟାଭର୍ସ କମ୍ପାନୀ ହେବ ।

ସୂଚନାଯୋଗ୍ୟ, ଦୁର୍ଦ୍ଦଶାଗ୍ରସ୍ତ ଜନତାଙ୍କ ଜୀବନ ଉପରେ ଆଧାରିତ ୧୯୯୨ ମସିହାର ଉପନ୍ୟାସ ‘ସ୍ନୋ କ୍ରାସ୍‌’ରେ ଲେଖକ ନିଲ୍‌ ଷ୍ଟିଫେନ୍‌ସନ୍‌ ‘ମେଟାଭର୍ସ’ ଶବ୍ଦ ବ୍ୟବହାର କରିଥିଲେ। ଏଥିରେ କମ୍ପୁଟର୍‌ ଖେଳ ଭଳି ଗୋଟାଏ ‘ଡିଜିଟାଲ୍‌ ଦୁନିଆ’ରେ ଆଳାପ ଆଲୋଚନା ପାଇଁ ଲୋକେ ‘ଭର୍ଚ୍ୟୁଆଲ୍‌ ରିଅଲିଟି ହେଡ୍‌ସେଟ୍‌’ ପରିଧାନ କରିଛନ୍ତି। ଜୁକର୍‌ବର୍ଗ ମଧ୍ୟ ‘ମେଟାଭର୍ସ’କୁ ‘ଭର୍ଚ୍ୟୁଆଲ୍‌ ସଂସାର’ ଭାବେ ବର୍ଣ୍ଣନା କରିଛନ୍ତି। ଜୁକର୍‌ବର୍ଗ କହିଛନ୍ତି, ଆଜିଠାରୁ ଆମ କମ୍ପାନିର ନାଁ ‘ମେଟା’ ହେବା କଥା ଘୋଷଣା କରି ମୁଁ ଗୌରବାନ୍ଵିତ ମନେକରୁଛି। ଜନତାଙ୍କୁ ଏକତ୍ର କରୁଥିବା ଆମର ‘ଆପ୍‌ସ୍‌’ ଏବଂ ସେମାନଙ୍କର ‘ବ୍ରାଣ୍ଡ୍‌’ ବଦଳିବ ନାହିଁ। ଆମର ‘ମିସନ୍‌’ ବା ଲକ୍ଷ୍ୟ ମଧ୍ୟ ପୂର୍ବପରି ରହିବ। ତେବେ କମ୍ପାନୀର ନାଁ ପରିବର୍ତ୍ତନକୁ ନେଟିଜେନ୍ସ ମଜାକ ଉଡାଇଛନ୍ତି । ଆଉ କେହିକେହି ଟ୍ରୋଲ ମଧ୍ୟ କରିଛନ୍ତି ।

Powered by Froala Editor