‘ଡିଭାଇଡର୍’ ଉପରକୁ ମାଡିଗଲା ଟ୍ରକ୍, ୩ ମହିଳା ଚାଷୀଙ୍କ ମୃତ୍ୟୁ
ଦିଲ୍ଲୀ-ହରିୟାଣା ସୀମାନ୍ତବର୍ତ୍ତୀ ଟିକ୍ରି-ବାହାଦୂରଗଡ଼ ସୀମାରେ ଥିବା କୃଷକ ପ୍ରତିବାଦସ୍ଥଳ ନିକଟରେ ଦ୍ରୁତଗାମୀ ଟ୍ରକ୍ ‘ଡିଭାଇଡର୍’ ଉପରକୁ ମାଡ଼ିଯିବାରୁ ୩ଜଣ ମହିଳା ଚାଷୀଙ୍କର ମୃତ୍ୟୁ ଘଟିଛି। ମନସା ଯିବା ଲାଗି ଟ୍ରେନ୍ ଧରିବାକୁ ବାହାଦୁରଗଡ଼ ଷ୍ଟେସନ୍ରେ ପହଞ୍ଚିବା ପାଇଁ ଅଟୋରିକ୍ସାକୁ ଅପେକ୍ଷା କରି ମହିଳା ଚାଷୀମାନେ ଝାଜ୍ଜର୍ ରୋଡ୍ ‘ଡିଭାଇଡର୍’ ଉପରେ ବସିଥିଲେ। ଦ୍ରୁତ ଗତିରେ ଆସି ୬ ଜଣଙ୍କୁ ଏକ ଟ୍ରକ୍ ଦଳି ଦେଇଛି । ଘଟଣାସ୍ଥଳରେ ୨ ଜଣଙ୍କ ମୃତ୍ୟୁ ହୋଇଥିବା ବେଳେ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ଆଉ ଜଣଙ୍କ ମୃତ୍ୟୁ ହୋଇଛି। ସେହିପରି ୩ ଜଣଙ୍କ ଅବସ୍ଥା ଗୁରୁତର ଅଛି।
ଦୁର୍ଘଟଣାରେ ପ୍ରାଣ ହରାଇଥିବା ତିନିଜଣ ମହିଳା ହେଉଛନ୍ତି ପଞ୍ଜାବର ମାନସା ଜିଲ୍ଲାର ବାସିନ୍ଦା। ଏହି ମହିଳାମାନେ କୃଷକ ଆନ୍ଦୋଳନରେ ସାମିଲ ଥିଲେ। କୁହାଯାଉଛି ଯେ, ସକାଳେ ମହିଳାମାନେ ଡିଭାଇଡର୍ ଉପରେ ଘରକୁ ଯିବା ପାଇଁ ଅଟୋକୁ ଅପେକ୍ଷା କରି ବସିଥିଲେ। ତା’ପରେ ଏକ ଦ୍ରୁତ ଗତିରେ ଆସୁଥିବା ଟ୍ରକ ସେମାନଙ୍କ ଉପରେ ଚଢ଼ି ଯାଇଥିଲା। ଝାଜର ରାସ୍ତାରେ ଥିବା ଫ୍ଲାଏ ଓଭର ତଳେ ଏହି ଦୁର୍ଘଟଣା ଘଟିଥିଲା। ଦୁର୍ଘଟଣା ପରେ ଉକ୍ତ ଅଞ୍ଚଳରେ ଉତ୍ତେଜନା ସୃଷ୍ଟି ହୋଇଛି।
Powered by Froala Editor
