ନୂଆଦିଲ୍ଲୀ: ଅକ୍ଟୋବରରୁ ନୂଆ ଅଟୋ ଡେବିଟ ପେମେଣ୍ଟ ସିଷ୍ଟମ ଲାଗୁ ହେବାକୁ ଯାଉଛି । ଏହା ଅଧୀନରେ ବ୍ୟାଙ୍କ ଏବଂ ପେଟିଏମ, ଫୋନ ପେ ଭଳି ଡିଜିଟାଲ ପେମେଣ୍ଟ ପ୍ଲାଟଫର୍ମକୁ କିସ୍ତି କିମ୍ବା ବିଲ ବାବଦ ଟଙ୍କା କାଟିବା ପୂର୍ବରୁ ପ୍ରତିଥର ଗ୍ରାହକଙ୍କ ଅନୁମତି ନେବାକୁ ପଡିବ । ନିଜ ସିଷ୍ଟମରେ ଏମାନେ ଏଭଳି ପରିବର୍ତ୍ତନ ଆଣିବେ, ଯାହା ଦ୍ୱାରା ଗୋଟିଏ ଥର ଅନୁମତି ମିଳିବା ପରେ ପ୍ରତି ଥର ଟଙ୍କା ଆପଣାଛାଏଁ କଟିବନି । ମୋବାଇଲ ଆପ କିମ୍ବା ଇଣ୍ଟରନେଟ ବ୍ୟାଙ୍କିଙ୍ଗରେ ଯଦି ବିଦୁ୍ୟତ ବିଲ କିମ୍ବା ନେଟଫ୍ଲିକ୍ସ ପେମେଣ୍ଟ ଆଦିକୁ ଗ୍ରାହକ ଅଟୋ ଡେବିଟ ମୋଡରେ ପକାଇଥିବେ ତେବେ ଏକ ନିର୍ଦ୍ଧିଷ୍ଟ ତାରିଖରେ ଟଙ୍କା ଆପଣାଛାଏଁ କଟିଯିବାକୁ ଅଟୋ ଡେବିଟ କୁହାଯାଇଥାଏ । ଏହି ସୁବିଧାର ଲାଭ ନେବା ପାଇଁ ଗ୍ରାହକଙ୍କର ଏକ ସକି୍ରୟ ମୋବାଇଲ ନମ୍ବର ବ୍ୟାଙ୍କରେ ଅପଡେଟ ହୋଇଥିବା ଦରକାର । କାରଣ ଗ୍ରାହକଙ୍କ ମୋବାଇଲରେ ହିଁ ଅଟୋ ଡେବିଟ ସହ ଜଡ଼ିତ ନୋଟିଫିକେସନ ଏସଏମଏସ ମାଧ୍ୟମରେ ପଠାଯାଇଥାଏ । ନୂଆ ବ୍ୟବସ୍ଥା ଅଧୀନରେ ବ୍ୟାଙ୍କ ଗୁଡ଼ିକୁ ପେମେଣ୍ଟ ତାରିଖର ୫ ଦିନ ପୂର୍ବରୁ ଗ୍ରାହକଙ୍କ ମୋବାଲରେ ଏକ ନୋଟିଫିକେସନ ପଠାଇବାକୁ ପଡିବ । ନୋଟିଫିକେସନରେ ଗ୍ରାହକଙ୍କ ମଞ୍ଜୁରି ରହିବା ଦରକାର । ୫୦୦୦ ଟଙ୍କାରୁ  ଅଧିକ ପେମେଣ୍ଟରେ ଓଟିପି ସିଷ୍ଟମକୁ ବାଧ୍ୟତାମୂଳକ କରାଯାଇଛି । ବିଶେଷ କରି ବିଭିନ୍ନ ପ୍ରକାର ଠକେଇକୁ ରୋକିବା ପାଇଁ ନୂଆ ବ୍ୟବସ୍ଥାକୁ କାର୍ଯ୍ୟକାରୀ କରାଯାଉଛି ।

Powered by Froala Editor