ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତ ସିଂହ ଚନ୍ନିଙ୍କ ବିଷୟରେ ଜାଣନ୍ତୁ
ଚଣ୍ଡୀଗଡ : କ୍ୟାପଟେନ ଅମରିନ୍ଦର ସିଂହ ପଂଜାବର ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବାପରେ ଚରଣଜିତ ସିଂହ ଚନ୍ନିଙ୍କୁ ପରବର୍ତ୍ତୀ ମୁଖ୍ୟମନ୍ତ୍ରୀ ଭାବେ ଘୋଷଣା କରାଯାଇଛି । ୫୮ ବର୍ଷୀୟ ଦଳିତ ନେତା ଚନ୍ନି ରାଜ୍ୟର ଚମକେର ସାହିବ ଆସନରୁ ବିଧାୟକ ଅଛନ୍ତି । ସେ କଂଗ୍ରେସ ଟିକଟରେ ତୃତୀୟ ଥର ପାଇଁ ବିଧାୟକ ନିର୍ବାଚିତ ହୋଇଛନ୍ତି । ଏକଦା ଅମରିନ୍ଦରଙ୍କ ସହ ଘନିଷ୍ଠ ଥିବା ଚନ୍ନି ପ୍ରାୟ ୨ ବର୍ଷ ହେଲା ତାଙ୍କୁ ବିରୋଧ କରି ଆସୁଛନ୍ତି । ୨୦୧୭ରେ ଚରଣଜିତ ସିଂହ ଚନ୍ନିଙ୍କୁ ରାଜ୍ୟ ଉଚ୍ଚଶିକ୍ଷା ମନ୍ତ୍ରୀ କରାଯାଇଥିଲା । ତେବେ ତାଙ୍କର ଶିକ୍ଷାଗତ ଯୋଗ୍ୟତା ଦ୍ୱାଦଶ ଶ୍ରେଣୀରେ ସୀମିତ ଥିବାରୁ ଏହାକୁ ନେଇ ବିବାଦ ହୋଇଥିଲା । ଚନ୍ନି ୨୦୧୫-୨୦୧୬ରେ ରାଜ୍ୟ ବିଧାନସଭାରେ ବିରୋଧୀ ଦଳ ନେତା ଦାୟିତ୍ୱ ତୁଲାଇଥିଲେ । ଏହା ସହିତ ସେ ଅମରିନ୍ଦର ସିଂହଙ୍କ କ୍ୟାବିନେଟରେ ବୈଷୟିକ ଶିକ୍ଷା ମନ୍ତ୍ରୀ ଥିଲେ । ୧୯୬୬ରେ ହୋଇଥିବା ରାଜ୍ୟ ପୁନର୍ଗଠନ ପରଠାରୁ ପର୍ଯ୍ୟନ୍ତ କେହି ଦଳିତ ମୁଖ୍ୟମନ୍ତ୍ରୀ ହୋଇନଥିବା ବେଳେ ଏବେ ଚନ୍ନି ପ୍ରଥମ ଦଳିତ ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି । ଚନ୍ନିଙ୍କ ସହିତ ୨ ଜଣ ଉପମୁଖ୍ୟମନ୍ତ୍ରୀ ନିଯୁକ୍ତି ଦେବାକୁ ମଧ୍ୟ କଂଗ୍ରେସ ଯୋଜନା କରୁଛି ।
Powered by Froala Editor
