ଜଣେ ୫୦ ବର୍ଷିୟ ଭାରତୀୟ ନାଗରିକଙ୍କୁ ବନ୍ଧୁକ ଦେଖାଇ କାବୁଲ୍‌ରୁ ଅପହରଣ କରିନେଇଛନ୍ତି ତାଲିବାନୀ ବନ୍ଧୁକଧାରୀମାନେ । ତାଙ୍କୁ କାବୁଲ୍‌ରୁ ଅପହରଣ କରି ନିଆଯାଇଥିବା କଥା ‘ଇଣ୍ଡିଆନ୍‌ ୱାର୍ଲଡ୍‌ ଫୋରମ୍‌’ର ଅଧ୍ୟକ୍ଷ ପୁନୀତ ସିଂହ ଚା‌ନ୍ଧୋକ୍‌ କହିଛନ୍ତି। ସେ କହିଛନ୍ତି, ଏ କଥା ମୁଁ ବୈଦେଶିକ ବ୍ୟାପାର ମନ୍ତ୍ରାଳୟକୁ ଅବଗତ କରାଇବା ସହ ତୁରନ୍ତ ସେମାନଙ୍କ ହସ୍ତକ୍ଷେପ ଓ ସହଯୋଗ ପାଇଁ ଅନୁରୋଧ କରିଛି।

କାବୁଲର ୧୧ଶ ପୁଲିସ ଡିଷ୍ଟ୍ରିକ୍ଟ ଅଞ୍ଚଳରେ ଏହି ଘଟଣାଟି ଘଟିଛି। ସମ୍ପୃକ୍ତ ଅପହୃତ ଭାତରୀୟ ନାଗରିକଙ୍କ ନାଁ ବଂସରୀ ଲାଲ ଅରେନ୍ଦେହି। ସେ ଶିଖ ସମ୍ପ୍ରଦାୟର, ତାଙ୍କ ବୟସ ୫୦ ବର୍ଷ। କାବୁଲରେ ବଂସରୀ ଲାଲଙ୍କ ଏକ ଔଷଧ ଦୋକାନ ରହିଛି। ତାଙ୍କୁ ତାଲିବାନୀମାନେ ମଙ୍ଗଳବାର ସକାଳ ୮ଟାରେ ଦୋକାନ ନିକଟରୁ ଅପହରଣ କରିନେଇଛନ୍ତି। ଅପହୃତ ହେବା ପୂର୍ବରୁ ସେ ତାଙ୍କର କର୍ମଚାରୀଙ୍କ ସହ ସବୁଦିନ ଭଳି ଦୋକାନ ଖୋଲିବାକୁ ଯାଉଥିଲେ।  

ଅନ୍ୟ ଏକ ସୂତ୍ରରୁ ମିଳିଥିବା ତଥ୍ୟ ଅନୁସାରେ, ସେ ଦୋକାନକୁ ଯାଉଥିବା କାର୍‌ର ପଛପଟେ ମାଡ଼ ହୋଇଥିଲା। ପରେ ତାଙ୍କୁ ବନ୍ଧୁକ ଦେଖାଇ ଅପହରଣକାରୀମାନେ ଗୋଟିଏ ସବୁଜ ରଙ୍ଗର ଟୋୟଟା କୋରୋଲା କାର୍‌ର ନେଇଯାଇଥିଲେ। ତାଙ୍କୁ ଏବଂ ତାଙ୍କ କର୍ମଚାରୀଙ୍କୁ ଅପହରଣ କରି ନିଆଯାଇଥିଲା, କିନ୍ତୁ କୌଣସିମତେ କର୍ମଚାରୀ ଜଣକ ଖସି ପଳାଇ ଆସିବାରେ ସମର୍ଥ ହୋଇଥିଲେ। 

ଏ ସଂକ୍ରାନ୍ତରେ କିଛି ଜାଣି ନ ଥିବା କଥା ‘ଆନ୍ତର୍ଜାତିକ ଗଣମାଧ୍ୟମ’ ନିମନ୍ତେ ନିଯୁକ୍ତ ତାଲିବାନ୍ ମୁଖପାତ୍ର କହିଛନ୍ତି। କିନ୍ତୁ, ସମ୍ପୃକ୍ତ ଅଧିକାରୀମାନଙ୍କ ଠାରୁ ସେ ଏ ବାବଦରେ ସୂଚନା ପାଇଲେ ଜଣାଇବେ ବୋଲି କହିଛନ୍ତି। 

Powered by Froala Editor