ନୂଆଦିଲ୍ଲୀ: ଆସନ୍ତା ବର୍ଷଠୁ ଭାରତୀୟ ଦଳର ଦିନିକିଆ ଓ ଟ୍ୱେଣ୍ଟି-୨୦ (ଧଳା ବଲ) କ୍ରିକେଟର କାହାଣୀରେ ଅନେକ କିଛି ପରିବର୍ତ୍ତନ ହେବାର ସମ୍ଭାବନା ରହିଛି ବୋଲି ଆଲୋଚନା ହୋଇଥିଲା । ବର୍ତ୍ତମାନର ଅଧିନାୟକ ବିରାଟ କୋହଲି ଟି-୨୦ ବିଶ୍ୱକପ ପରେ ଏହି ଦୁଇ ପ୍ରକାରର କ୍ରିକେଟର ନେତୃତ୍ୱରୁ ଓହରିଯିବାକୁ ମନସ୍ଥ କରିଥିବା ବଳେ ରୋହିତ ଶର୍ମା ଏହି ଦାୟିତ୍ୱ ନେବେ ବୋଲି ଖବର ପ୍ରଚାରିତ ହୋଇଥିଲା । ହେଲେ ବିସିସିଆଇ ସୋମବାର ଏହାକୁ ଖଣ୍ଡନ କରିଛି । ବିସିସିଆଇ କୋଷାଧ୍ୟକ୍ଷ ଅରୁଣ ଧୁମାଲ ଏହାକୁ ଖଣ୍ଡନ କରିବା ସହ ଖବର ଗୁଜବ ବୋଲି ସୋମବାର କହିଛନ୍ତି । ‘ଏଥିରେ କୌଣସି ସତ୍ୟତା ନାହିଁ, ଗଣମାଧ୍ୟମରେ ଯାହା ପ୍ରଚାର ହେଉଛି ତାହା ଗୁଜବ । ସଂପ୍ରତି ପରିବର୍ତ୍ତନର କୌଣସି ସମ୍ଭାବନା ନାହିଁ । କୋହଲି ସବୁ ଫର୍ମାଟରେ ଅଧିନାୟକ ରହିବେ । ବିଭାଜିତ ଅଧିନାୟକ ପ୍ରସଙ୍ଗରେ କୌଣସି ଆଲୋଚନା ମଧ୍ୟ ହୋଇନି ବୋଲି ଧୁମାଲ ଗଣମାଧ୍ୟମକୁ କହିଛନ୍ତି । ନିକଟରେ କୋହଲି ଟେଷ୍ଟ କ୍ରିକେଟରେ ସଫଳ ଅଧିନାୟକ ଭାବେ ପ୍ରମାଣିତ କରିଛନ୍ତି । ହେଲେ ସୀମିତ ଓଭର କ୍ରିକେଟରେ ସେ ସଫଳ ହେଉନାହାନ୍ତି । ତେଣୁ ସେ ବ୍ୟାଟିଂ ଉପରେ ଅଧିକ ଧ୍ୟାନ ଦେଇ ରୋହିତଙ୍କୁ ସୀମିତ ଓଭର ନେତୃତ୍ୱ ଭାର ଦେବାକୁ ଚିନ୍ତା କରିଛନ୍ତି । କୋହଲି ମଧ୍ୟ ରୋହିତ ଏବଂ ଦଳୀୟ କର୍ମକର୍ତ୍ତାଙ୍କ ସହ ଏହି ବିଷୟରେ ଆଲୋଚନା କରିଥିଲେ ବୋଲି ବିଭିନ୍ନ ଗଣମାଧ୍ୟମରେ ପ୍ରକାଶ ପାଇଥିଲା ।

Powered by Froala Editor