ଭୁବନେଶ୍ୱର: ବର୍ତ୍ତମାନ କରୋନା ସମୟରେ ଉଭୟ କେନ୍ଦ୍ର ଓ ରାଜ୍ୟ ସରକାର ମିଳିମିଶି କାମ କରନ୍ତୁ । ଏବେ ବ୍ଲେମ ଗେମ ଖେଳିବା କଥା ନୁହେଁ । ଏଭଳି କହିଛନ୍ତି ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ । ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟିକା ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଚିଠି ଲେଖିବା ପ୍ରସଙ୍ଗରେ ଶ୍ରୀମତୀ ଷଡ଼ଙ୍ଗୀ ଏଭଳି କହିଛନ୍ତି । ସେ କହିଛନ୍ତି ଯେ, ମୋଦୀଙ୍କୁ ନବୀନଙ୍କ ଚିଠି ଲେଖିବାକୁ ସ୍ୱାଗତ କରୁଛି । ପ୍ରଧାନମନ୍ତ୍ରୀଙ୍କୁ ଜଣାଇବା ମୁଖ୍ୟମନ୍ତ୍ରୀଙ୍କ କାମ । ପ୍ରଧାନମନ୍ତ୍ରୀଙ୍କ ନେତୃତ୍ୱରେ ପ୍ରଥମ ଲହର ଭଲଭାବେ ନିୟନ୍ତ୍ରଣ ହୋଇଛି । ଦ୍ୱିତୀୟ ଲହର ବଡ଼ ଆହ୍ୱାନ । ଅକ୍ସିଜେନ, ବେଡ ଓ ଭେଣ୍ଟିଲେଟର ସବୁ ଠିକ ଦରକାର । କେନ୍ଦ୍ର ଓ ରାଜ୍ୟ ସରକାର ମିଳିମିଶି କାମ କରନ୍ତୁ । ଏବେ ବ୍ଲେମ ଗେମ ଖେଳିବା କଥା ନୁହେଁ ବୋଲି ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ କହିଛନ୍ତି । ପ୍ରକାଶ ଯେ, ଖୋଲା ବଜାରରେ କରୋନା ଟିକା ଉପଲବ୍ଧ ହେଉ । ଫଳରେ ଟିକା ପାଇଁ ଅର୍ଥ ଦେବାକୁ ପ୍ରସ୍ତୁତ ଥିବା ଲୋକମାନେ ଟିକା ନେଇପାରିବେ । ଯାହାକି ସରକାରଙ୍କ ପାଇଁ ମଧ୍ୟ ବେଶ ସହାୟକ ହୋଇପାରିବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏଭଳି ମର୍ମରେ ପତ୍ର ଲେଖିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ନବୀନ ତାଙ୍କ ପତ୍ରରେ ଉଲ୍ଳେଖ କରିଛନ୍ତିଯେ, କୋଭିଡ଼ ସଂକଟର ମୁକାବିଲା ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ମିଳିତ ଭାବେ କାର୍ଯ୍ୟ କରିବା ଦରକାର । ଏଯାବତ ଓଡ଼ିଶାରେ ୪୭ ଲକ୍ଷ ଡୋଜ ଟିକା ସ୍ୱାସ୍ଥ୍ୟ କର୍ମୀ, କରୋନା ଯୋଦ୍ଧା ଓ ୪୫ ବର୍ଷରୁ ଉଦ୍ଧ୍ୱର୍ ଲୋକଙ୍କୁ ପ୍ରଦାନ କରାଯାଇଛି । ଆମ ରାଜ୍ୟରେ କମ ଟିକା ନଷ୍ଟ ହୋଇଥିବାବେଳେ ପ୍ରତିଦିନ ୩ ଲକ୍ଷ ଡୋଜ ଟିକା ଦେବା ପାଇଁ ମଧ୍ୟ ଆମେ ସମର୍ଥ । ଟିକା ନେବା ପାଇଁ ଲୋକମାନଙ୍କର ଆଗ୍ରହ ଥିଲେବି ଚାହିଦା ମୁତାବକ ଟିକା ଯୋଗାଣ ହୋଇନପାରିବା ଏକ ଆହ୍ୱାନ ସୃଷ୍ଟିକରିଛି । ଏହି ପରିପ୍ରେକ୍ଷୀରେ ରାଜ୍ୟକୁ ୨୫ ଲକ୍ଷ ଡୋଜ ଟିକା ଯୋଗାଣ ପାଇଁ ସେ ଅନୁରୋଧ କରିଥିଲେ ବୋଲି ନବୀନ ତାଙ୍କ ପତ୍ରରେ ଉଲ୍ଳେଖ କରିଛନ୍ତି । ଯଦି ପୂର୍ଣ୍ଣ ସାମର୍ଥ୍ୟ ଅନୁଯାୟୀ ଟିକା ଦିଆଯାଏ ତଥାପିବି ସମସ୍ତ ୪୫ ବର୍ଷରୁ ଉଦ୍ଧ୍ୱର୍ ଲୋକଙ୍କ ଟିକାକରଣ ପାଇଁ ୧୬୦ ଦିନ ଲାଗିବ । ଏସବୁ ଆହ୍ୱାନର ସମ୍ମୁଖୀନ ହେବା ନିମନ୍ତେ ନବୀନ କେତେକ ପ୍ରସ୍ତାବ ଦେଇଛନ୍ତି । କୋଭିଡ଼ ୧୯ ଟିକା ଖୋଲା ବଜାରରେ ଉପଲବ୍ଧ କରିବାକୁ ପ୍ରସ୍ତାବ ଦିଆଯାଇଛି । ଯାହାଫଳରେ ଯେଉଁମାନେ ଟିକା ପାଇଁ ଅର୍ଥ ଦେଇପାରିବେ ସେମାନେ ନେଇପାରିବେ । ଅପରପକ୍ଷରେ ସରକାର ସମାଜର ବିପଦଶଙ୍କୁଳ ବ୍ୟକ୍ତିଙ୍କ ଉପରେ ଗୁରୁତ୍ୱ ଦେଇପାରିବେ ବୋଲି ନବୀନ କହିଛନ୍ତି । ବିଶ୍ୱସ୍ତରରେ ଯେଉଁସବୁ ଟିକାକୁ ମଂଜୁରୀ ମିଳିଛି ସେହି ଟିକା ଯୋଗାଣ ଉପରେ ଗୁରୁତ୍ୱ ଦେବା ସହ କେନ୍ଦ୍ର ଓ ରାଜ୍ୟ ସରକାର ଟିକା ଉପôାଦନ ୟୂନିଟକୁ ଆବଶ୍ୟକୀୟ ସହଯୋଗ ଦେବା ପାଇଁ ମଧ୍ୟ ନବୀନ ପ୍ରସ୍ତାବ ଦେଇଛନ୍ତି । ଏଭଳି ଏକ ଅସାଧାରଣ ସମୟରେ ଆମକୁ ଆଉ କେଇ ପାଦ ଆଗକୁ ଯିବାକୁ ପଡ଼ିବ । ସେହିପରି ଯେଉଁ ମେଟ୍ରୋସହରମାନଙ୍କରେ କୋଭିଡ଼ ସଂକ୍ରମଣ ଦ୍ରୁତ ଗତିରେ ବ୍ୟାପୁଛି ସେଠାରେ ଟୀକାକରଣକୁ ଅଗ୍ରାଧିକାର ଦେବା ଦରକାର । ସମସ୍ତ ବର୍ଗର ଲୋକଙ୍କର କିଭଳି ଟୀକାକରଣ କରାଯାଇପାରିବ ତାହା ଉପରେ ଗୁରୁତ୍ୱ ଦେବା ଉଚିତ । ସେହି ସବୁ ମେଟ୍ରୋ ସହରଗୁଡ଼ିକ ହେଉଛି ଆମର ଅର୍ଥନୈତିକ ମେରୁଦଣ୍ଡ । ସେଠାରେ ଲକଡାଉନ ହେଲେ ସାରା ଦେଶରେ ଶ୍ରମିକ ସ୍ଥାନାନ୍ତର ଭଳି ସମସ୍ୟା ପରିଲକ୍ଷିତ ହେବ । ଏହି ପରିପ୍ରେକ୍ଷୀରେ ଆବଶ୍ୟକୀୟ ଟିକା ଉପଲବ୍ଧ କରିବା ନିମନ୍ତେ ନବୀନ କହିଛନ୍ତି ।